ఈ పూటకి నే ఏరికోరి తెచ్చుకున్న పాట - "మలరే ... మౌనమా!". పాటున్న సినిమా తమిళ "కర్ణ". పాటలో వున్నవారు - అర్జున్, రంజిత.
ఇది ఒక తీపిరాగాల మధుమంత్రం. ఎదను గిల్లు గాలిగానాల హాయిజంత్రం.
ఈ పాటకి సంగీత దర్శకుడు - తెలుగులో అంతగా ఎవరూ తలుచుకోని విద్యాసాగర్.
విద్యాసాగర్ ఎవరబ్బా అని కదా? అప్పుడెప్పుడో "ముగ్గురు మొనగాళ్ళు" లాంటి కొన్ని తెలుగు సినిమాలకి వృత్తిధర్మ-మాత్ర సంగీతం చేసి ఆ తర్వాత తమిళ, మలయాళ సినిమాల్లో మనోధర్మ-పాత్రమైన అద్భుతమైన పాటలు కూర్చిన సంగీత-స్వర-మాంత్రికుడు.
ఇంకా చప్పున ఈయనెవరో తలచుకుని-గుర్తు పెట్టుకోవాలంటే - ఇంకో పాట గురించి చెప్తా.
నయనతార గాలిపటాలెగరేసి, రజనీకాంత్ పిల్లిగడ్డమెట్టుకుని లకలకలాడిన సినిమా ఒకటుంది చూశారూ?
అదే... అందులో జ్యోతిక టార్చ్‌లైట్లలా వెలుగుతున్న కళ్ళ చుట్టూ ఇంత కాటుక పూసుకుని, జుట్టంతా పీక్కుని వినీత్‌తో కలిసి డాన్స్ చేస్తుందే - "రారా సరసకు రారా" అంటూ - గుర్తుందా? ఆ సిన్మా ఏదో మీరే కనుక్కోండి. ఆ పాటకు జాతీయపురస్కారం కూడా దక్కింది మన సంగీత-విద్యాసముద్రుడికి.
అదే కాదు - కాశీనాథుని విశ్వనాథుడి "స్వరాభిషేకం" సిన్మాకి కూడా విద్యాసాగరుడే సంగీత-గంగావతరణ-భగీరథుడు. సంగీతం బావుంటుంది - కాకపోతే ఆ సినిమా నాకంతగా సొక్కలేదు.
ఇవే కాకుండా - ఇంకో ఊరూపేరూ లేని రీలుముక్క లాగా గాలికెటో కొట్టుకుపోయిన ఒకానొక సినిమాలో ఒక అద్భుతమైన పాట వుంది ఈ విద్యాసాగర్‌దే. దాని గురించిన కబుర్లు మళ్ళింకోసారి చెప్తా. ఎందుకంటే ఆ పాట నాకు చాలా ఇష్టం. ఇక్కడ ఓ రెండు ముక్కలు చెప్పేసి ఆ ఇష్టాన్ని కొంచెపఱచుకోవడం నాకిష్టం లేదు.
అన్నట్టు ఈ విద్యాసాగర్‌గారిది మా అమలాపురమేనట. భలే!
*** *** *** *** *** *** ***
*** *** *** *** *** *** ***
ఇహిప్పుడు - అసలు పాట పాట గురించి.
నేనిన్ని కబుర్లు చెప్తుంటాను కానీ - మా ఇంట్లో లేస్తూనే పాట వింటూ - చెవికి నచ్చిన పాటనల్లా పాడుకుంటూ - రాత్రి పాట వింటూ నిద్ర లోకి జారుకుంటూ - ఎప్పటికైనా తనకు నచ్చిన పాటలన్నీ పాడుకోవాలనుకునే వీర-పాటాభిమాని బద్రి.
తను రకరకాల పాటలు వింటూ అందులో అనుకోకుండా దొరికిన మిణుకు-చుక్కల్లాంటి పాటల్ని పట్టి నాకిస్తూ వుంటారు. అలా దొరికిన బాల-గంధర్వ-జానకీ-మధురయుగళజనిత-గానమే ఈ "మలరే...మౌనమా?" పాట.
వేణుగానంతో మొదలయ్యే విద్యాసాగరుడి మధుర సంగీతం...
చెవికింపైన వైరముత్తు రాసిన తమిళ-పలుకులు...
పాలూ-తేనె-మీగడ-పంచదార-నవ్వు-అచ్చర పరిచే అచ్చరపు పలుకు... అన్నీ కలిపి చిలికిన హాయిపాటల మా సుబ్బయ్య గొంతు...
తమిళసలు పాటలో వున్న ఈ పూల-గాలి మాటలు నాకు బోల్డు నచ్చాయి.
కాట్రే! ఎన్నై కిళ్ళాదిరు...
(గాలీ! నన్ను గిల్లెయ్యకూ ...)
పూవే! ఎన్నై తళ్ళాదిరు...
(పూవా! నన్ను తోసెయ్యకూ!)
కాకపోతే ఈ పాటలో వినిపించే "అన్బే" అన్న మాట అనునాసిక / అనుస్వార సూత్రానికి విరుద్ధంగా అనిపించింది. లెక్కప్రకారం అది "అమ్బే" అన్నట్టు పలకాలి - కానీ ఎస్జానకి తమిళ ఉచ్చారణలో "అన్బే" అన్నట్టు వినిపిస్తుంది.
