ఈలపాటల గాలి ఆగి ఆగి వీచె
తూలు గాలి అలల మీద
మెఱుపంచు కోక గట్టి
తువ్వర మువ్వ గజ్జె కట్టి
తూగి సోలుతున్నదెవరది?
చిందులేయు చిన్నారి
చినుకుదారి చిఱుతుక
నీలిమబ్బు తునక కాక
ఇంకెవరది?
ఆగి ఆగి వీచు గాలి తోన తానె సాగివచ్చె
పాట వినగోరు వీనులకి
గాలి అలల ఈలపాట...
గాలి పాడు పదమది ముందో?
గాలి యీల విన్న మబ్బుకన్నె తానాడెనో?!
ఆట కనగోరు కనులకి
నీలిమబ్బు తునక ఆట...
చింది కదులు పదమది ముందో?
మొయిలు చిందు కన్న గాలి పాట పాడెనో!?
గాలిమబ్బుల వెనకముందుల పంతాల్లో
ఆటపాటల వేడుకలు నా సొంతాలే!
నే జెప్పబోవు ఊసుపోని ఉదంతాలు
ఆ సంగతుల-గతుల సంగతులే!
*** *** *** *** *** *** ***
*** *** *** *** *** *** ***
ఎప్పట్నుంచో - ప్రతి వారం వారం - "స్మర వారంవారం" - అనుకుంటూ వింటుంటున్నా - వింటూ వింటూ ఆ పాటలో లీనమై తేలిపోతూ వుంటున్నా - ఇప్పటి దాకా ఆ పాట గురించి చెప్పాలనుకున్నది చెప్పడానికి కుదరలేదు - కుదురూ చిక్కలేదు.
ఇవాళ మాత్రం - ఎలాహైనా రాహెయ్యాలంతే! - అని కూర్చున్నా.
సూద్దారి... ఈ దారి నెంత మాత్రం సాగుతానో మరి!
అస్సలిదీ... - ఇదంటే - ఈ పాట వుందే - ఇది నిజ్జంగా ఓ గాలిపాట.
*** *** *** *** *** *** ***
*** *** *** *** *** *** ***
గాలికి మొదలు ఎక్కడైనా వుండొచ్చు కదా!
అప్పటిదాకా
సద్దు లేకుండా
స్తబ్దుగా వున్న గాలి
అలలు అలలుగా
కదలి మెదలి
ఒక్కసారిగా
పాలుమాలిక వీడి
పడి లేచే కెరటమైతే
ఎక్కడ సడి అడుగులు పడితే
అక్కడే మొదలనుకుంటే
అదుగో...అచ్చంగా అల్లాగే వున్నట్టుండి వున్నపాటున మొదలైన పాట గాలిపాట కాక ఇంకేంటి మరీ?!
*** *** *** *** *** *** ***
*** *** *** *** *** *** ***
మరసలు ...కుదురైన పాటంటే ఏమిటీ...?
తాళాలూ, కాలాలూ, స్వరాలూ, రాగాలూ, జతులూ, శ్రుతులూ, గతులూ, సంగతులూ - ఇన్ని వరసలూ వ్యవహారాలూ వున్నదే కదా... !
పలకరింపు లాంటి పల్లవి
వెనువెంటనే చిరునవ్వు చిలకరింపు లాటి అనుపల్లవి
ఆ తర్వాత వడివడిగా కలివిడిగా సాగే కబుర్ల లాంటి చరణాలు
కదా!
కానీ అదే -
తొరపడో, తడబడో -
వాక మార్చి వరస విడిచి -
పల్లవిని దాటి వురికి
అనుపల్లవి మాటే మరిచి
సరాసరి చరణానికి చరచరలాడితే ?!
అది ఖచ్చితంగా గాలి తోడైన పాటే!
గాలికీడూజోడైన పాటే!
*** *** *** *** *** *** ***
*** *** *** *** *** *** ***
"ఈ పాటికి ఆ పాటేదో చెప్పెయ్యకుండా -
ఇప్పటి దాకా -
ఇదిగో పాటా, అదో గాలిపాటా -
అని ఆకుకి అందకుండా, పోకకి పొందకుండా -
గాలికబుర్లాడడమే తప్ప -
అసలా పాటేదో చెప్పడానికి పాటు పడకుండా -
అలాగని మా పాటికి మమ్మల్నొదిలేసి
మా పాట్లేవో మమ్మల్ని పడనీకుండా -
ఈ పాట-పోటు మాకేమిటి బాబోయ్!"
అని పాట కట్టి పాడేసుకోవాలనిపిస్తోందా?
*** *** *** *** *** *** ***
*** *** *** *** *** *** ***
ఇంతసేపు ఎలాగూ ఆగారు - ఇంతవరకు ఎలాగోలా చదివారు.
ఇంకో గాలిపాట గురించి ఇంకొన్ని మాటలు కూడా చదివేస్తే - పాటమర్యాద పాటించినవారవుతారు.
అప్పుడెప్పుడో - బోల్డంత కథున్నా కూడా - "ఇది కథ కాదు" అనే ఓ సిన్మా వచ్చింది.
దాన్ని తీసింది బాధే చందమనే బాలచందర్.
అందులో "గాలికదుపు లేదు... కడలికంతు లేదు" అనే పాటొకటుంది.
నేనీ రోజు రాయబోతున్న హిందీ పాటుందే... అది విన్నప్పుడల్లా - వెంటనే ఈ తెలుగు పాట కూడా గుర్తొస్తుంది.
ఆ పాటలో కొన్ని వాక్యాలు....
ఆ నింగిలో మబ్బునై పాడనా పాటలు ఎన్నో...
ఈ నేలపై నెమలినై ఆడనా ఆటలు ఎన్నో...
తుళ్ళితుళ్ళి గంతులు వేసే లేడికేది కట్టుబాటు...?
మళ్ళిమళ్ళి వసంతమొస్తే మల్లెకేల ఆకుచాటు...?
ఆ పైన రాసిన తెలుగు పాట చరణం అచ్చు ఈ కింద రాసిన హిందీ పాట చరణం లాగానే అనిపిస్తుంది నాకు....
విన్న ప్రతిసారీ మాటలు కొంచెం అటూ-ఇటూగా వున్నా - మొత్తమ్మీద రెండిట్లో వున్న పాటాత్మ ఒకటేలా వుంటుంది.
కల్ కే - అంధేరోం సే - నికల్కే
దేఖా హై - ఆంఖే - మల్తే మల్తే
హో... కల్ కే - అంధేరోం సే - నికల్కే
దేఖా హై - ఆంఖే - మల్తే మల్తే
హో...ఫూల్ హీ ఫూల్ - జిందగీ బహార్ హై
తయ్ కర్ లియా ఆ... ఆ... ఆ...
ఇహిప్పుడు అసలు విషయానికొస్తా!
*** *** *** *** *** *** ***
*** *** *** *** *** *** ***
మన స్వామీ, వాడి స్నేహితుల గురించి మాల్గుడి కబుర్లు చెప్పిన ఆర్కే నారాయణ్ రాసిన "The Guide" అనే నవల ఆధారంగా తీసిన హిందీ సినిమా "గైడ్" అని ఒకటుంది.
బావుంటుంది.
యూట్యూబ్లో వుంటుంది.
ఇప్పటిదాకా చూసుండకపోతే ఓ పాలి చూసొచ్చేస్తే కూడా బావుంటుంది.
దాంట్లో కథానాయకుడు దేవానంద్. దానికి దర్శకుడు ఆతని తమ్ముడు విజయ్ ఆనంద్. కథానాయిక వహీదా రెహమాన్.
అన్నట్టు ఈ సినిమాని అమెరికాలో ఇంగ్లీషులో కూడా తీశారట. కానీ అందులో వహీదా లేదట. ఫ్లాప్ అయిందంటే అవదా మరి?!
సరి! ఆ సినిమా ఇంగ్లీషులో హిట్టు కాదు ఫట్టు అని చెప్పేసుకున్నాం కదా!
హిందీ సినిమాలో బావుండే అన్ని పాటల్లోంచి అన్నిటి కన్నా నాకు బాగా అనిపించే పాట గురించి - హమ్మయ్య! - ఇహిప్పుడు చెప్తా.
ఆ పాట "కాంటోం సే - ఖీంచ్కే - యే ఆంచల్".
రాసింది శైలేంద్ర.
పాట కట్టింది సచిన్ దేవ్ (SD ) బర్మన్.
పాడింది లతా మంగేష్కర్.
పాటకు ముందు మాట్లాడింది దేవానంద్.
పాటలో ఆట్లాడింది వహీదా.
*** *** *** *** *** *** ***
*** *** *** *** *** *** ***
ఈ పాటలో అన్నిటి కన్నా ముందు, వెనక, ఆ తర్వాత కూడా వహీదా గురించి చెప్పుకోవాలబ్బా!
మెరుపుతళుకులు కుట్టిన పచ్చనీలపు చీరా...
జడ మొదట్లో మువ్వల జడబిళ్ళా...
ఆ కింద జడ మధ్యలో పొదిగిన ఓ మువ్వ
పొడుగాటి జడకి వేలాడుతూ జడకుచ్చులూ...
చెవులకి లోలకాల్లా వూగుతున్న లోలాకులూ...
కంబువంటి కంబువున తాల్చిన మిలమిలలదౌరు
మోచేతిని తాకుతున్న చోళీ చేతులకి తళతళ మెరుస్తున్న గాజులు
ఎడమచేతి ఉంగరంవేలికో పూలవుంగరం
చీర మీదున్న మెరుపులని మించి తళతళలాడుతూ తళుకులీనే కళ్ళూ...
ఆ కళ్ళని వెలిగించి - వాటిని మించి - పెదవుల మీద మించిమించారిన నవ్వులూ...
ఆ నడకలో లయలూ - నటనలో హొయలూ...
చిత్తోడ్ఘర్ కోట మీద గాలి అలలలో అలలా - కలలోని కలికిలా - చిలికించిన అలవోక కదలికలూ...
బావుంది వహీదా...
ఎండుగడ్డిలో దొర్లుతూ
కుండ ఎత్తి బద్దలుగొడుతూ
ఒంటె మీద ముసుగులో కులుకుతూ
కోటగోడల మీద కెరటంలా ఉరుకుతూ
"కహీ న ఖో న జాఊ..." అని పరిసరాలు మరిచి మైమరచిపోతూ
గుడి గోడల మీదున్న నాట్యాంగనల్లా భంగిమలు పెడుతూ
అల్లా-ఉద్దీన్-ఖిల్జీ చూసిన రాణీ పద్మినిలా అద్దంలో కనిపిస్తూ
కాదనుకున్న నిన్నని వదిలి రేపటి ఆమని నాదేనని ధీమాగా చెప్తూ...
దాక్కుంటూ ... దోబూచులాడుతూ...
ఎగురుతూ....గెంతుతూ... పరిగెడుతూ...
పాదాలు గాలిలో తేలుతున్నట్టు సోలుతూ ...
ఎలా చూసినా - ఎన్నిసార్లు చూసినా
పాట ప్రతి frame లో
ఎంత బావుందో... వహీదా...
నాకు ఈ పాట చూసినప్పుడు కనిపించేది వహీదా మాత్రమే!
ఊపిరి సలపని బంధనాలు దాటి బయటపడిన గాలి సంబరంగా వేసే చిందులు - కళ్ళకి కట్టినట్టు నర్తించి చూపిన వహీదా నటన ఎంత బావుందో చూసే కళ్ళకి రాయడం వస్తేనే సరిగ్గా చెప్పడానికి కుదురుతుంది.
కెమెరా కూడా వహీదాని ఎంత అందంగా చూపిద్దామా అని తహతహలాడినట్టనిపిస్తుంది.
ఆ కెమెరాని పట్టుకుని వహీదా ఎటెళ్తే అటు - ఆమె చుట్టూ తిప్పిన - ఫాలి మిస్త్రీకి కోటి దండాలు!
*** *** *** *** *** *** ***
*** *** *** *** *** *** ***
అప్పుడే జీవించాలనే ఆశ -
అలా జీవిస్తూనే మరణించాలనే లాలస -
అదే .... ఈ పాటలో వినిపించే స్వేచ్ఛాన్వేషిత లిలీష!
అవన్నీ కలిసున్న ఈ పాట ఇష్టం.
ఈ పాటలో వహీదాని చూడడం ఇష్టం.
ఈ పాటలో వహీదానే పాడిందా అనిపించేంత లలితంగా పాట పాడిన లతా మంగేష్కర్ గొంతు ఇష్టం.
ఈ పాటలో వినిపించే వేణునాదం ఇష్టం,
ఈ పాటకి వున్న ప్రత్యేకత - పల్లవితో కాకుండా చరణంతో మొదలవడం.
ఈ పాటలో పల్లవి "ఆజ్ - ఫిర్ - జీనే కీ తమన్నా హై... ఆజ్ - ఫిర్ - మర్నే కా ఇరాదా హై... ".
కానీ మొదలవడం "కాంటోం సే - ఖీంచ్కే - యే ఆంచల్" అనే చరణంతోనే మొదలవుతుందనేమో -
ఎదురు చూడనపుడు వీచడం మొదలు పెట్టే కుదురు లేని గాలిలా అనిపిస్తుంది ఈ పాట.
*** *** *** *** *** *** ***
*** *** *** *** *** *** ***
ఈ పాటకి యూట్యూబ్ లింక్:
పాట కూడా రాసి పెట్టా ఈ కింద!
కాంటోం సే - ఖీంచ్కే - యే ఆంచల్
తోడ్కే బంధన్ - బాంధీ పాయల్
హో...కోఈ న రోకో - దిల్ కీ - ఉడాన్ కో
దిల్ వో చలా... ఆ... ఆ... ఆ...
ఆజ్ - ఫిర్ - జీనే కీ తమన్నా హై...
ఆజ్ - ఫిర్ - మర్నే కా ఇరాదా హై...
ఆజ్ - ఫిర్ - జీనే కీ తమన్నా హై...
ఆజ్ - ఫిర్ - మర్నే కా ఇరాదా హై...
అప్నే హీ బస్ మే - నహీ మై
దిల్ హై కహీ - తో - హూ కహీ మై
హో...అప్నే హీ బస్ మే - నహీ మై
దిల్ హై కహీ - తో - హూ కహీ మై
హో... జానే క్యా పాకే - మేరీ జిందగీ నే
హస్కర్ కహా... హా... హా... హా...
ఆజ్ - ఫిర్ - జీనే కీ తమన్నా హై...
ఆజ్ - ఫిర్ - మర్నే కా ఇరాదా హై...
ఆజ్ - ఫిర్ - జీనే కీ తమన్నా హై...
ఆజ్ - ఫిర్ - మర్నే కా ఇరాదా హై...
మై హూ గుబార్ - యా - తూఫాన్ హూ
కోఈ బతాయే - మై కహా హూ
హో... మై హూ గుబార్ - యా - తూఫాన్ హూ
కోఈ బతాయే - మై కహా హూ
హో... డర్ హై - సఫర్ మే - కహీ ఖో న జాఊ మై
రస్తా నయా... ఆ... ఆ... ఆ...
ఆజ్ - ఫిర్ - జీనే కీ తమన్నా హై...
ఆజ్ - ఫిర్ - మర్నే కా ఇరాదా హై...
ఆజ్ - ఫిర్ - జీనే కీ తమన్నా హై...
ఆజ్ - ఫిర్ - మర్నే కా ఇరాదా హై...
కల్ కే - అంధేరోం సే - నికల్కే
దేఖా హై - ఆంఖే - మల్తే మల్తే
హో... కల్ కే - అంధేరోం సే - నికల్కే
దేఖా హై - ఆంఖే - మల్తే మల్తే
హో...ఫూల్ హీ ఫూల్ - జిందగీ బహార్ హై
తయ్ కర్ లియా ఆ... ఆ... ఆ...
ఆజ్ - ఫిర్ - జీనే కీ తమన్నా హై...
ఆజ్ - ఫిర్ - మర్నే కా ఇరాదా హై...
ఆజ్ - ఫిర్ - జీనే కీ తమన్నా హై...
ఆజ్ - ఫిర్ - మర్నే కా ఇరాదా హై...
*** *** *** *** *** *** ***
*** *** *** *** *** *** ***
ముందు వెనకైన గాలిపాట
గాలి లాగా అదాటుగా తేలి వచ్చి
చెవికి సోకె ఈ పాట
ఈ పాట విన్న - దిల్ వో చలా... ఆ గాలిలో అలా...అలా...
~ పాటల భైరవి
