వూ-రీ డైరీ - 1 - ముదితల్ నేర్పగరాని విద్యగలదే, భర్తల నేడ్పించకన్?!

ఇంతకు ముందు డైరీ విశేషాలు: వూ-రీ డైరీ - ప్రమాణశ్రీకారం



"మిస్టర్ వూ" అనబడు సుబ్బారావు డైరీ నుంచి ఒక రోజు పేజీ:



హేవిటో! నాకంతా కలలా వుంది. ఇంట గెలిచి రచ్చ గెలవడంలో ఇంత ఆనందముందని ఇప్పుడిప్పుడే తెలుస్తోంది.

ఏడాదంతా కోడు రాసి, బగ్గు లేరి కష్ట పడితే ఆఫీసు వాడిచ్చే Meets expectations - Exceeds sometimes రేటింగూ ఓ రేటింగేనా?

అదసలు ...  ఎప్పటికప్పుడు మా సుందరి బొటనవేలెత్తి, కనుబొమలు లేపి ఇచ్చే 'బా చేశావోయ్, బావా!" అనేలాంటి expression ముందు ఏపాటిది?

ఏ మాటకామాటే చెప్పుకోవాలి. ఇంతకు ముందులా కాదు - ఇల్లంతా నా అధీనంలోకి వచ్చేసింది.

మా పిల్లలిద్దరూ కూడా ఏమన్నా ప్లేటో, గ్లాసో కావాలంటే "డేడీ!" అంటూ నన్నే పిలుస్తున్నారు. సింకులో గిన్నె పడడం ఆలస్యం ... తక్షణం తోమడం తథ్యం అన్నదే నా మంత్రం.

అసలు నేను మొదటి గిన్నె తోమినప్పుడు మా సుందరి గోముగా చూసిన చూపు వెలుగులలో నేను తోమిన గిన్నె తళతళలే వెలవెలలాడాయి. అదే మొదటిసారి మా సుందరి నన్నలాంటి చూపు చూడడం.

అప్పుడే నేను పడిపోయా - తోము-ప్రేమలో.

ఇహ అందులోంచి బయటికి రాలేకపోతున్నాను. ఆ చూపులోని గోము అలాగే ఉండాలని సింకులో గిన్నెలు ఎన్నున్నా లెక్కచెయ్యకుండా, ఎన్నున్నాయో అని లెక్కెయ్యకుండా మళ్ళీ మళ్ళీ తోముతూనే ఉన్నా... ఉంటా కూడా!

Raising the bar in dishwashing!

"మిసెస్ రీ" అని పిలిస్తేనే పలికే సుందరి డైరీ నుంచి అదే రోజు పేజీ: 



అప్పుడెప్పుడో పెద్దవాళ్ళు ఎందుకు చెప్పారో కానీ నాకు నచ్చిన ఓ మాట " పండు పంచివ్వరాదు".

నాక్కావాల్సినట్టు అనుకున్న ఇంకో మాట "పని పంచకుండా ఉంచరాదు".  అసలే మనది మేడె-మోక్రసీ. అందుకే  మా బావ "వూ" కి కూడా పని పంచా.

మొదట్లో ఓ చెంచా కడగడానికే ఇబ్బంది పడిపోయేవాడు. మా అత్తయ్య బొత్తిగా ఏ పనీ నేర్పలేదు మా బావకి. అలా అయితే ఎలా? ఆడుతూ, పాడుతూ పనిపాటలు చేసుకోవాల్సింది మేమే కదా!

నిజం చెప్పకపోవడమేం! మొదట్లో నాకు మా వూ బావ చేత చెప్పీచెప్పకుండా, అడిగీ అడగకుండా ఎలా పని చేయించాలో తెలిసేది కాదు.

ఈలోగా ఓ రోజు మా పక్కింటి క్యాథీ వాళ్ళ కుక్కపిల్లకి బంతి విసిరితే పరుగెత్తుకుంటూ వెళ్ళి తీసుకు రావడం నేర్పుతోంది. ఆవిడ బంతి విసరడం, ఆ కుక్కపిల్ల గెంతుకుంటూ వెళ్ళి ఆ బంతిని పట్టుకురావడం. చూడగా చూడగా ఆ శిక్ష(ణ?) కిటుకు తెలిసిపోయింది నాకు.

అలా ఒక చిన్న గరిటె సింకులో వేసి, తోమమని గోముగా చూసి, అది తోమగానే ఇంకో గంటకి ఓ చిన్న పాల గ్లాసో, కాఫీ కప్పో సింకు లోకి తోసి - తోమిన ప్రతిసారీ బొటన వేలెత్తి, బోల్డు పొగిడి, అలాఅలా ఒక అంతం లేని for(ever) loop లా మొదలు పెట్టి, ఇప్పటికి కదా ... బుట్టెడు గిన్నెలు కడగడం, ఇంటెడు బట్టలు ఉతకడం దాకా తీసుకు రాగలిగాను!

అన్నట్టు ఈ నెల మా ఫేసుబుక్కు వాలు పైన సవాల్ ఏంటీ అంటే...ఎవరి ఇంటాయన తోమిన గిన్నెలు ఎక్కువ తళతళలాడుతున్నాయీ అని.

మా శ్రీవారు వూ-గారి పుణ్యమా అని అది నేనే నెగ్గా...

ముద్దుముద్దుగా చెప్పి ... ముదితల్ నేర్పగరాని విద్యగలదే, భర్తల నేడ్పించకన్?!

కడుగుల్, తోముడు, దులుపుల్, సినిమా వీక్షణంబులున్

వినుట యందనురక్తి, ఎఫ్బీ ఇన్స్టా, వాట్సాప్ సారథ్యముల్

నోరూరించెడి పాకశాస్త్ర విదితం, బేబీల సిట్టింగులున్

ముదితల్ నేర్పగరాని విద్యగలదే, భర్తల నేడ్పించకన్?!

వూ-రీ డైరీ - ప్రమాణశ్రీకారం

నమస్తే! నమస్కార! నమష్కార్! వణక్కం! 

మా పేర్లు :

సీలా సుబ్బారావు (వురఫ్) ఎసెస్. వూ (వురఫ్) వూ 

సీలా సుందరి (వురఫ్) ఎసెస్. రీ (వురఫ్) రీ

మాకు పెట్టిన, మేము పెట్టేసుకున్న ఈ పేర్లే కాక మాకు మరింత పేరు తెచ్చిన ఓ రెండు కథలు మామీదున్నాయి. 

ఆ కథలూ - కమామీషులూ  మా డైరీ మొదటి పుటలో పటం కట్టి మరీ పెట్టుకోవాలనుకున్నాం కానీ పునరుక్తి-దోషం అంటుతుందని లింకులు మాత్రం అంటించుకున్నామిక్కడ: 

ఎసెస్. రీ - ఎసెస్. వూ

వినండి ఇంకోసారి - కబుర్లు ఆఫ్ వూ-రీ  

ఆ కథలు చదివాక మాకనిపించిందేంటంటే - ఎవరో మా కబుర్లని వాళ్ల కబుర్లుగా రాసేస్కోవడమేంటి - వాటిని మేమేదో చాటుమాటుగా చదివేస్కోవడమేంటి - మన రాతేదో మనమే రాసేసుకుంటే పోలా - అని. 

అసలే అనిపిస్తే ఆగకు - కనిపిస్తే వదలకు అనేది మా జంట జంట-మోటో కాబట్టి -

అలా అనిపించిన వెంటనే - పూనుకుని - జంటగా రాసుకుని - వూ-రీ వూ-రీ రాసుకుంటే డైరీ రాలింది అనే సామెత మా పేరు మీదుగా పుట్టించేయాలనుకుని ఇదిగో - ఇలా - మొదలెట్టేశాం. 

కాకపొతే మా డైరీలో దినచర్య రాయము - రాయదగ్గ చర్య వున్న దినమే డైరీ రాస్తాము. 

మేమిద్దరం చేసేది IT  - పగలూ రాత్రీ ఒకటే OT 
మా ఆఫీసులు - వూరికి అటోటీ ఇటోటీ
రోజూ లంచుకి కూరా రోటీ 
ఇంటికి రాగానే ఏదో భేటీ 
వున్నారు మాకు బేటా - బేటీ 
పెంచుతున్నాం పోటా-పోటీ 

వూ (రీ గురించి రాసిన పరిచయం)

ఇహ పోతే - మా రీకి నేనిచ్చే రిక్వైర్మెంటోటి 
ఆవిడిచ్చే ఇంప్లిమెంటేషనోటి
పెళ్లికి ముందు మా మామ చెప్పె - SME మా సుందరని 
SME కర్థం తెలియలేదప్పుడు - Subject Matter Extinguisher అని. 
ఏం చేశావే ఇవాళ పని అంటే - BAU అంటుంది 
BAU కి తన అర్థం వేరే వుంది - Business-As-Usual కాదది
Business-Again-Undetermined మాత్రమే అది 
వరించి పెళ్లాడిన తనకి నేను మేన-హబ్బీ (మేనరికపు మొగుణ్ణి) 
వ్రతాలు చేస్తూ నన్ను "వాలం"టీరు చేయడం తన హాబీ 
(చూడుడు: లక్ష లైకుల నోము ఎసెస్. రీ - ఎసెస్. వూ మరియు వినండి ఇంకోసారి - కబుర్లు ఆఫ్ వూ-రీ  )
ఈ మొదటి పూటకి - మా డైరీ మొదటిపుటకి - ఇది మా రీ పరిచయం 
ముందున్న పూటల - మరిన్ని పుటల్లో - పునరపి చెప్పడం - పునరపి రాయడం.

రీ (వూ గురించి రాసిన పరిచయం) 

అసలు - ఉన్నదున్నట్టు చెప్పాలంటే 
మా వూ అనుకునేదొకటి -
అదే అంటున్నాను అనుకుని పైకనేదొకటి 
పైగా నేను తననుకున్నట్టు చేయలేదని అనడమొకటి 
సాఫ్ట్‌వేర్‌లో మౌసెక్కువసార్లు క్లిక్కిన వీరుడనిపించుకోవాలని ఆశ 
దానికి తగ్గ "హార్డ్‌"వేర్ తలలో వుందో లేదో తనకైనా తెలుసా ?!
ఎప్పటికైనా ట్విట్టరుకి పోటీగా తిట్టరూ.com , eBay.comకి దీటుగా దొబ్బేయ్.com  సృష్టించాలని కల 
చెప్పాలనున్నా తన ప్రవర ఎంతో ఎంతెంతో ఇలా -
ఆపేస్తా ఇక్కడ - అన్నప్రాసన్నాడే ఆవకాయంటే ఎలా?


వూ-రీ (ఇద్దరూ కలిసి డైరీ గురించి రాసుకున్నది):

అందరూ డైరీల్లో ఎవరి గురించి వాళ్లే రాసుకుంటారు. 
మేం మాత్రం ఒకళ్ల గురించి ఒకళ్లు పంచులేసుకుంటూ రాసుకుంటామనిన్నీ -
రాసిందంతా వాసెన కట్టి దాచుకోకుండా అందరికీ పంచిపెట్టుకుంటామనిన్నీ-  
వూ-రీ లనబడే మేము -
డైరీ రాయడానికి శ్రీకారం చుడుతున్నాము - 
మా రాయబోయే డైరీ మీద ప్రమాణం చేసి మరీ!

వినండి ఇంకోసారి - కబుర్లు ఆఫ్ వూ-రీ

[అప్పుడెప్పుడో నేను పుట్టించిన నా అల్లారు ముద్దు పాత్రలు ఎసెస్. రీ , ఎసెస్. వూ లు ఎలా వున్నారా అని మొన్న గురువారం ఒకసారి వాళ్లింటి వైపుకి వెళ్లి వచ్చాను. అక్కడ నేను విన్నవీ - కన్నవీ కొన్ని కబుర్లు ఇక్కడ.  
ఎసెస్. రీ , ఎసెస్. వూ అసలెవరూ అనుకుంటే ఇక్కడకి వెళ్లి తెలుసుకోండి మరి :)]

"నాన్నమ్మ! నాన్నమ్మ!" - రైలు ఇంకా ఆగకుండానే కిటికీ లోంచి కనబడిన సుభద్రమ్మగారిని చూసి చప్పట్లు కొడుతూ గంతులేస్తున్నారు - వైదేహి, విరించీ.

ఎసెస్. రీ కి వరలక్ష్మీ వ్రతం అంటే బాగా పట్టింపు. ఎప్పటికైనా తన పూజలకు మెచ్చి ఏదో ఒక వరలక్ష్మీ వ్రతం రోజు  ఆ వ్రత కథలో చారుమతికి లాగా తనక్కూడా ఆ వరలక్ష్మీ దేవి నిలువెత్తు బంగారం ప్రసాదిస్తుందని నమ్మకం. అందుకే ప్రతీ ఏడాది అమ్మనో, అత్తగారినో తన వ్రతం జయప్రదంగా నడిపించడానికి సాయంగా రమ్మంటుంది. మరి - వరలక్ష్మీ వ్రతం అంటే మాటలా - పొద్దున్నే లేచి చేయాల్సిన పూజా, వండాల్సిన తొమ్మిదిరకాల పిండివంటలూ, సాయంత్రం పిలవాల్సిన పేరంటాలూ  - ఎంత పనీ, ఎంత హడావిడీ ?! అందులోనూ ఈసారి అపార్టుమెంట్ వాళ్ళందరూ కలిసి సామూహికంగా వ్రతం చేద్దామని ప్లాన్ చేశారు. 

అదుగో - అదీ - ఎసెస్. రీ ఉరఫ్ సుందరి మేనత్త-కం-అత్తగారైన సుభద్రమ్మగారి రాకకి కారణం. 
--------------------------------------------------------------------------------------------------------

రైల్వేస్టేషన్ నుంచి ఇంటికి రాగానే స్నానం అదీ పూర్తి చేసుకుని దేవుడికి దండం పెట్టుకుని హాలులోకి వచ్చిన సుభద్రమ్మగారు -  సోఫాలో మఠం వేసుకుని కూర్చుని - రెండు పక్కలా తననానుకుని కూర్చున్న పిల్లలతో సమానంగా - టీవీలో  "కొట్టుకుంటే కోటా చీర" చూస్తూ - చిన్నపిల్లాడిలా చప్పట్లు కొడుతున్న ఎసెస్. వూని   చూసి " ఏంట్రా సుబ్బాయ్! అంత బావుందేంటి ఆ ప్రోగ్రాం ?!",  అంటూ తనూ పక్కనే వున్న మోడా మీద కూర్చున్నారు. 

టీవీ స్క్రీన్ మీద చూస్తే అక్కడ - ఆంధ్రుల అభిమాన ఛానెల్ అయిన మీ-టీవీ వాళ్ల ఏంకరుడు "కొట్టుకుంటే కోటా చీర" కార్యక్రమాన్ని అత్యుత్సాహంతో జరిపిస్తున్నాడు. అతని మొహం చూస్తే మహా-జాబ్-శాటిస్ఫాక్షన్ వున్నవాడిలా వున్నాడు. 

అటు అత్తలూ, ఇటు కోడళ్లూ - రెండు గ్రూపులుగా ఆడవాళ్లను నిలబెట్టి - వాళ్లకి - ఫేస్ బుక్ లో మీ చీరకి లైక్ కొట్టక పోతే మీకేం చేయాలనిపిస్తుంది, మీ వాట్సాప్ లో ఫార్వార్డ్ చేసిన మెసేజ్ కి ఓ దండమో, థంసప్పో రెస్పాన్స్ రాకపోతే ఎలా కొట్టాలనిపిస్తుందీ - అని వెరైటీ వెరైటీ సన్నివేశాలని ఊహించుకోమని చెప్పి - మొదటి రౌండ్ "ముక్కు గిల్లిపో",  రెండో రౌండ్ "లెంపకాయేసిపో" అయ్యాక చివరాఖరుది, ముత్యపు మూడో రౌండ్ "తుక్కు రేగ్గొట్టిపో" లో మొదటి రెండు రౌండ్లలో గెలిచిన గ్రూప్ చేత రెండో గ్రూప్ ని చీపుళ్లతో కొడుతూ తరిమిస్తున్నాడు. 

అది చూస్తూనే - "ఈ ఆడవాళ్ళ ప్రోగ్రాం నీకెందుకురా?" - సుభద్రమ్మగారు ఆశ్చర్యపోయారు.

ఎసెస్. వూ తల తిప్పి తల్లికేసి చూస్తూ 

"అమ్మా ! ముల్లుని ముల్లుతోనే తీయాలి కదా ?!" అన్నాడు 

"అవునూ... " - సుభద్రమ్మగారి ఆశ్చర్యపు ముల్లు కొంచెం పైకి కదిలింది

"మరి - వజ్రాన్ని వజ్రం తోనే కోయాలంటారు కదా?!"

"అబ్బా - అవునురా - సుబ్బాయ్ - చదవేస్తే వున్న మతి పోయిందని - టీవీలో ఆడవాళ్ల ప్రోగ్రాం ఎందుకు చూస్తున్నావురా అంటే ముల్లూ-వజ్రం అంటూ తలా-తోకా లేకుండా ఆ వాగుడేంటీ ?" - విసుక్కున్నారు ఆవిడ. 

"అదే చెప్పబోతున్నా - ఆ వరుసలోనే - ఆడవాళ్లని ఆడవాళ్లే కొట్టాలి - అని ఈ మీ-టీవీ షో చూస్తేనే తెలిసింది నాకు. అబ్బబ్బా! అటు చూడు - ఆ చీరలు లాక్కోవడం, ఒకళ్ళ జుట్టు ఒకళ్లు పీక్కోవడం - అసలే మొగాడన్నా అంత ధైర్యం చేయగలడా !?",  అంటూ మళ్లీ చప్పట్లు కొట్టుకుంటూ ఆ షో చూడ్డంలో మునిగిపోయాడు. 

"ఒరే సుబ్బాయ్ - మీ నాన్నా ఇంతే - గృహప్రవేశం సినిమాలో జయసుధ ఎస్వరలక్ష్మి మీద చెయ్యి ఎత్తే సీను మళ్లీమళ్లీ రివైండ్ చేసుకుని చూసి మరీ ఇలాగే నవ్వుకుంటూ వుంటారు - ఏం  చేస్తాం - సిరబ్బదు కానీ చిడుమబ్బుతుందంటే ఇదే కాబోలు" అనుకుంటూ లేచి వంటింట్లోకి వెళ్లారు సుభద్రమ్మగారు. 

 -----------------------------------------------------------------------------------------------------------------------

వంటింట్లో బ్రేక్ ఫాస్ట్ కోసమని ఇడ్లీ కుక్కర్ స్టవ్ మీద పెట్టి పచ్చడి కోసమని పోపు వేయిస్తోంది ఎసెస్. రీ . 

వస్తూనే సుభద్రమ్మగారు, " అవునే సుందీ! ఆ మధ్య అమెరికా వెళ్లొచ్చినప్పట్నుంచీ మీ పేర్లవన్నీమార్పించేశావట కదా -  రీ, వూ, హీ, చీ - అని  ?" - అంటూ కోడలు తన కోసం కలిపి పెట్టిన కాఫీ గ్లాసు తీసుకున్నారు. 

ఎసెస్. రీ జవాబు చెప్పేలోగా - "నా మటుకు నాకు నచ్చాయి మీ పేర్లు - కానీ నన్ను మాత్రం అలా పిలవమని అడక్కు. అది సరే గానీ - నువ్వు చైనా వాళ్ళ చేత మన పంచాగం చదివించేస్తున్నావట కదా? అదెలా కుదిరిందే ?" - అని మళ్లీ ఆశ్చర్యపోయారు. 

"అవునత్తయ్యా ! ఏదో వర్క్ విషయంలో నాతో చాలా సేపు వాదించి నన్ను కన్విన్స్ చేయలేకపోయినప్పుడు మా టీమ్-లీడ్ చాంగ్ అడిగాడు - అసలు ఇలా తిమ్మిని-బమ్మి చేసే తెలివితేటలు నీకెలా వచ్చాయి - ఏం చదువుకున్నావూ అని. క్లాసు పుస్తకాలూ, ఏడాదికోసారి రాశి-ఫలితాల కోసం చదివే పంచాంగం తప్ప ఇంకేం చదవలేదని చెప్పాను. అంతే అప్పట్నుంచీ ఆ పంచాంగం చదివితే  నాలా - ఏదైనా, ఎవరినైనా - సాధించెయ్యొచ్చని మొదలుపెట్టి, ప్రతీ ఏడాది కొత్త పంచాంగం తెప్పించుకుని మన తిథులూ-నక్షత్రాలూ-వర్జ్యాలూ-రాహుకాలాలూ అన్నీ ఫాలో అయిపోతుంటాడు" - సంబరం గా చెప్పింది సుందరి 

"నీదీ నాదీ ఒకటే నక్షత్రం - భరణి - ధరణి నేలుతామని ఊరికే అన్నారా? మేనత్త చాలు నీది" - అచ్చు తన నోట్లోంచి వూడిపడ్డట్టు - "నోరారా" తననే పోలిన మేనకోడలి  ప్రతిభకి మురిసిపోయింది అత్తగారు. 

 టీవీ షో అయిపోయిందని కాలు కొంచెం సాగదీసుకుని రెండోసారి కాఫీ కోసమని వచ్చిన ఎసెస్. వూ  " అవునూ - మీ చాంగ్ ఏ విషయంలో నీతో ఓడిపోయాడు? అతను చాలా గట్టి సొల్యూషన్ ఆర్కిటెక్ట్ అని విన్నానే ? - అనడిగాడు ఎసెస్. రీ ని.

కొడుకు-కోడళ్ల మధ్య తనెందుకన్నట్టు మనవలతో కబుర్లు చెప్పడానికి హాలులోకి వెళ్లారు సుభద్రమ్మగారు. 

పోపులో ఎండు మిరపకాయలు వేస్తూ - "చాంగ్ గట్టివాడే ! నా అప్లికేషన్ కి రిక్వైర్మెంట్స్- డిజైన్ ఇచ్చి టెస్ట్ కేసెస్ రాయమన్నాడు. అందులో - సర్వర్ కి రిక్వెస్ట్ పంపించకపోతే రెస్పాన్స్ రాదు - అన్నదానికి నేనొక టెస్ట్ కేస్ రాశాను. 

- Don't send a request to server
- Verify that no response is returned to the client - అని. 
అదెలా కుదురుతుంది వెరిఫై చేయడం అన్నాడు. అలా చేయడం కుదరకపోతే రిక్వైర్మెంట్ ఎలా రాశావు అని వాదించాను. ఒక గంట అయ్యాక "ఐ గివ్ అప్ " అని వెళ్ళిపోయాడు. అంతే !" -  పచ్చడిలో పోపేస్తూ గీరగా చెప్పింది ఎసెస్.రీ. 

అద్వితీయమైన ఆ టెస్ట్-కేస్ గురించి విన్నందుకో, పోపులో మిరపకాయ ఘాటుకో - మొత్తానికి ఎసెస్. వూకి పొలమారింది. 

"సరే గానీ,  వూ ! ఈ సాయంత్రం మన అపార్టుమెంట్ కమిటీ అంతా  కలిసి రేపటి  సామూహిక వరలక్ష్మీ వ్రతానికి మంటపం కడుతున్నారు. దానికి డెకరేషన్ కి  వాలంటీర్ గా నీ పేరు ఇచ్చాను. "

"అదేంటీ? నన్నడక్కుండా నన్నెలా వాలంటీర్ చేస్తావు?" - వూ ఉక్రోషంతో కూడిన ఆక్రోశం 

"వాలంటీర్ అవ్వాలంటే ఎంతో పుణ్యం చేసివుండాలి . అసలు వాలం అంటే ఏంటి? భజే వాయుపుత్రం-భజే వాలగాత్రం - హనుమంతుడి గుర్తు. త్రేతాయుగంలో  శ్రీరాముడు సీతాదేవిని వెతకడానికి వానరుల సహాయం అడిగినప్పుడు మొట్టమొదటిసారిగా "నేను సీతామాతను వెదకడానికి వెళ్తాను" అని ముందుకొచ్చిన ఆంజనేయుడి పేరు మీదుగా ఈ వాలంటీర్ అనే పదం వచ్చింది. నువ్వెళ్లి ఆ మంటపం కట్టడానికి హెల్ప్ చేస్తే వరలక్ష్మీ-కటాక్ష-లిస్ట్ లో మన పేరు ముందుంటుంది కదాని ఆశ పడ్డాను" అని ఎసెస్.రీ ముక్కు చీదుతూ ఉంటే ఏం చెప్పాలో తోచక  - తక్షణమే వెళ్లి పరోపకారార్థం "ఇతని" శరీరం - అన్న రీ మాట నిలబెట్టటం కోసం "వాలంటీరింగ్ ఫర్ వరలక్ష్మీ వ్రతం" టీంలో చేరిపోయాడు.

ఎసెస్. రీ - ఎసెస్. వూ

తెల్లవారింది .

ఎసెస్. వు   లేచి బెడ్రూం లోంచి బయటకి రాబోయి కాలు చటుక్కున లోపలి తీసుకున్నాడు. అలాగే వెళ్ళిపోతే ఇంకేమయినా ఉందా?! గబగబా వెనక్కి వెళ్లి వార్డ్రోబ్ లో తగిలించి వున్న నైట్-గౌన్ తీసి వేసుకుని ఈపాటికి చిన్న సైజ్ కిష్కింధలా కోలాహలంగా వుండాల్సిన ఇల్లు - అదీ ఆదివారం పూట ఇంత నిశ్శబ్దంగా వుందేంటా అనుకుంటూ ఎసెస్. రీ ని వెతుక్కుంటూ  వంటిటికి అవతల వున్న బాల్కనీ లోకి వెళ్ళాడు.

అక్కడ రెయిలింగ్ కి దగ్గరగా కుర్చీ వేసుకుని ఐఫోన్ చూసుకుంటూ ఎసెస్. రీ కనిపించింది.

అటు పక్కగా పనిమనిషి వాషింగ్ మెషీన్ లో బట్టలు వేస్తూ "నా నిన్నా మరియలారే" అని కన్నడ కంఠీరవ రాజకుమార్ పాటేదో పాడుకుంటోంది.

 ఎసెస్. వు రావడం చూసినా వాళ్ళిద్దరూ చూపు తిప్పలేదు - పాట ఆపలేదు - రెస్పెక్టివ్లీ.

ఒక నిముషం అక్కడే నించుని ఇంక ఉండబట్టలేక అడిగేశాడు - "సుందరీ - వైదేహి, విరించి ఏరీ?" అని.

 పెళ్ళైన పదేళ్ళకి రకరకాల వేడుకోళ్ళు-మొక్కుబళ్ళు అందరు దేవుళ్ళకి కిట్టించాక పుట్టిన వరప్రసాదాలు - వైదేహి, విరించి. లేవగానే వాళ్ళని చూడందే ఎసెస్. వు కి తోచదు.

"అబ్బ! హౌ మెనీ టైమ్స్ ఐ టోల్డ్ యు వూ? కాల్ దెం హీ అండ్ చీ. ", ఫోన్ మీంచి చూపు తిప్పకుండానే విసుక్కుంది రీ.

ఒక ఆరు నెలలు ఆన్ సైట్ అమెరికా వెళ్లి వచ్చింది సీలా సుబ్బారావు గారి భార్య సీలా సుందరి. అక్కడ వున్నప్పుడు వాళ్ళ క్లైంట్ మేనేజర్ ఎప్పుడూ వాళ్ళ టీం లీడ్ చాంగ్ ని తెగ పొగిడే వాడట. పైగా టైగర్ మదర్ పుస్తకం రాసిన ఏమీ చౌ ఆ చాంగ్ కి స్వయానా కజిన్ అట. ఒక ఆటోగ్రాఫుడు కాపీ ఒకటి సుందరి కి ఇచ్చాడు. అసలు కజిన్స్ అయిన ఆ చాంగు, చౌవూ ఎంత దగ్గర కజిన్సో తెలీదు కానీ ఆ పుస్తకం చేతికి వచ్చిన దగ్గర్నుంచీ సీలా సుందరి కాస్తా  ఎసెస్. రీ అలియాస్ టైగర్ మామ్ (ఆవిడ వాట్సాప్ గ్రూప్ పేరు అదే మరి) గా మారిపోయింది.


ఇంక ఇండియా కి తిరిగి వచ్చినప్పటినుంచీ అందరి పేర్లూ మార్పించేసింది - అఫిడవిట్లూ, న్యూస్ పేపర్ , గజెట్ నోటిఫికేషన్స్ తో - అప్పటినుంచీ వాళ్ళు నలుగురూ - ఎసెస్. వు, ఎసెస్. రీ, ఎస్వీ. హి , ఎస్వీ. చి.

పేర్ల మార్పుతో పాటు ఇంకా రకరకాల మార్పులు తెచ్చింది తన ఇంటికి - వూ కి నైట్-గౌన్, తనకి బాత్ రోబ్ తో సహా. హాయిగా లుంగీ కట్టుకుని రంగురంగుల నెమలిలా తిరిగే వూ కి ఆ నైట్-గౌన్ అసలు నచ్చలేదు. కానీ రీని కాదనే ధైర్యం చేయలేకపోయాడు.

 అన్నిటికన్నా వూ కి ఎంతో ఇష్టమైన బారెడు జడని బాబ్ చేయించేసుకుంది. అదేంటీ అని బాధపడిన అమ్మ-అత్తలని "మీరేగా ఎప్పుడూ అనేవారు బుద్ధిమంతుల జుట్టు భుజాలు దాటదని" అని దబాయించేసింది.

ఎవరైనా అమెరికా అంటారు, లేకపోతే యూరప్ అంటారు నీకెందుకు చైనా అంటే అంత ఇష్టం అంటే - అమెరికా అంతటి దేశమే వాళ్ళ జండా దగ్గర్నుంచీ "మేడ్ ఇన్ చైనా" వస్తువులే వాడుతుంది. నాకందుకే చైనా నచ్చుతుంది - అంటుంది రీ. అంతకన్నా ఎక్కువ మాట్లాడితే ఎక్కడ చైనీస్ నేర్చుకుందామంటుందో - ఈ వయసులో ఆ బాధ పడలేను అని భయపడి దాదాపు ఆరడుగులు పొడుగుండే  సీలా సుబ్బారావు "పేరు"కే  కదా అని ఎసెస్. వు గా కుదించబడడానికి ఒప్పుకున్నాడు. పిల్లలదేముంది - అమ్మతో పాటు చీనా మాయ లో పడిపోయారు .

"ఓకే ఓకే ! వేర్ ఆర్ హీ అండ్ చీ ?"

"దే విత్ సుమీ మామీ డౌన్ స్టెయిర్స్ "

అమెరికా ఆన్ సైట్ వెళ్ళాల్సిన అమ్మాయికి పెళ్లి కుదరడం తో అనుకోకుండా అవకాశం వచ్చి వెళ్ళింది కానీ - సుందరమ్మది అచ్చ తెలుగు బ్రాండే. నోరారా చక్కగా పలకగల తెలుగు వచ్చినా - అబ్బే - అసలు పొరపాట్న కూడా అందమైన తెలుగుతనాన్ని ఒప్పదు - వచ్చీరాని ఇంగ్లీష్ లోనే ముద్దు ముద్దు గా "యా... యా...యయయ్య... యా...యా..." అని యా-భాషే టాకుతూ వుంటుంది.

"అదేంటి? ఇంత పొద్దున్నే వాళ్ళింటికి ఎందుకు వెళ్లారు? బ్రేక్ ఫాస్ట్ ఏమైనా తిన్నారా?"

"ఇవాళ ఇంట్లో నో కుకింగ్"

"బట్ వై?"

"టుడే మై స్టార్స్ ఆర్ నాట్ గుడ్"

"నీ నక్షత్రాలు బాలేదా? అదేంటి?" - వూ నోరు తెరిచేశాడు.
"7:49 టు 9:19 ఎయం - రాహుకాల; 12:54 టు 3:24 పీఎం యమగండ; 8:23 టు 9:46 పీఎం వర్జ్య"

నోరు తెరిచేశాడు ఎసెస్. వు "ఇదెప్పట్నుంచీ ?"


"యు డోంట్ నో వూ -  మై  టీం లీడ్ చాంగ్ వాంటెడ్ మీ టు  షిప్ హిం పంచాంగ. ఐ గో బై  దట్ టూ"

పొద్దున్నే శోష వచ్చినట్టయ్యి సీలా సుబ్బారావు / ఎసెస్. వు శిలలా నిల్చుండిపోయాడు. వంటక్కూడా నక్షత్రాలు, తిథులూ చూడడం మొదలు పెట్టింది అంటే తన జీవిత నౌకకి టైటానిక్ స్టేటస్ వచ్చినట్టు అనిపించి ఒక్క నిముషం ఉక్కిరిబిక్కిరి అయాడు.

ఇంతలో పనమ్మాయి పరిమళ పరిగెత్తుకుంటూ వచ్చింది - "అక్కా! హాలు - బుస్ బుస్! " అంటూ.

ఉత్తర కర్నాటక నుంచి వచ్చిన పరిమళకి కన్నడ, తుళు  తప్ప వేరే భాష రాదు. ఎసెస్. రీ తెలుగు నేర్వనివ్వదు.

గ్యాస్ స్టవ్ మీద పెట్టిన పాలు పొంగి పోతున్నాయి అని ఇంకెలా చెప్పాలో తెలీక అలా కన్నడలో అరుచుకుంటూ వచ్చింది.

ఒక్క ఉదుటున వంటింటిలోకి పరిగెత్తాడు ఎసెస్. వు - క్రితం సారి అలాగే అయితే స్టవ్ కడిగిన అనుభవం మరి.  అప్పటికే పాలు పొంగి వేడికి స్టవ్ మీద అట్ట  కట్టేశాయి.

గ్యాస్ స్టవ్ ఆపి ఇవతలకి రాగానే ఎసెస్. రీ ఎవరితోనో మాట్లాడుతోంది ఐఫోన్లో.

"వాట్? యు డోంట్ హావ్ స్కైప్ ఐడీ? వాట్ యార్ - యూ టెల్లింగ్  మీ నౌ?"

ఏదో చెప్పబోయిన వూ ని చెయ్యి పైకెత్తి మణికట్టు దగ్గర వంచి ఆపు అన్నట్టు సైగ  చేసింది.

పక్క నుంచి పరిమళ నెమ్మదిగా అంటోంది "అక్క ఈవత్తు వ్రత మాడ్తిద్దారె. అదిక్కే మక్కళన కెళగడె అవురి మనేగే కళుసిద్దారె" (అక్క ఈరోజు వ్రతం చేసుకుంటున్నారు. అందుకే  పిల్లలను కిందవారి ఇంటికి పంపారు"

దగ్గరలో పండగలేమీ లేవుగా ఏ వ్రతమో అర్థం కాక అమెరికా నుంచి వచ్చిన కొత్త అలవాటైన నైట్-గౌన్ ని జారిపోకుండా సర్దుకుంటూ, ఇంకో చేత్తో బుర్ర గోక్కుంటూ రీ మాటలు వింటూ నించున్నాడు వూ.

ఓ పది నిముషాలయాక స్కైప్ ఐడీ ఎలా క్రియేట్ చేయాలో చెప్పి "*$%!" అనుకుంటూ ఫోన్ ఆఫ్ చేసింది.

"ఏంటి రీ ఈ హడావిడి?"

"ఇవాళ ఈవెనింగ్ అయాం డూయింగ్ లక్ష లైకు నోం "

"అబ్బ సుందరీ ! ఈ ఒక్కసారికీ తెలుగు లో చెప్పవా ప్లీజ్ ! అమెరికా వెళ్లి వచ్సినప్పటినుంచీ నీ యాక్సెంట్ పట్టుకోవడం కష్టం అవుతోంది"

పడిపోయింది సుబ్బారావు మెచ్చుకోలుకి.

"అదే ! లక్ష లైకుల నోము"

"అదెక్కడి నోము ? మీ అమ్మ, మా అమ్మ ఎపుడూ చేసినట్టు గుర్తు లేదే" మేనమామ కూతుర్నే పెళ్ళాడిన సుబ్బారావు ఆలోచనతో కూడిన ఆక్రోశం.

"అదే మరి! అన్నీ పాతవే చేస్తామేంటి ఈ ట్వంటీ ఫస్ట్ సెంచరీ లో కూడా. ఇది నా డిజైనర్ నోము"

"నువ్వు డిజైన్ చేశావా?"

"ఊ ! నేనే . చాంగ్ పేటెంట్ కూడా చేయమన్నాడు"

"ఆ చాంగ్ కనిపిస్తే వాడిని మడిచి చిమీ చాంగా చేస్తాను" పళ్ళు కొరుక్కున్నాడు ఎసెస్. వు.

"అలా అయితే నేను చెప్పనంతే"

"అబ్బే! చాంగ్ ఎంత మంచి ఐడియా ఇచ్చాడో అని ఆశ్చర్య పోతున్నాను. నీకు తెలుసుగా ఐ అప్రిషియేట్ సచ్ క్రియేటివ్ ఐడియాస్. టెల్ మీ అబౌట్ లక్ష లైకు నోం"

"యూ ! చో చ్వీట్ " సుబ్బారావు బుగ్గని ఓ మైలు దూరం లాగి వదిలింది సుందరి.
పళ్ళ బిగువున భరించాడు.

"ఇవాళ సాయంత్రం అయిదింటికి మొన్న ఉత్సవ్ డాట్ కామ్ లో కొన్న పటోలా చీర కట్టుకుని నేను మన ఐమాక్ లో స్కైప్ ఆన్ చేసి కూర్చుంటాను. అదే టైం కి నా వాట్సాప్ టైగర్ మామ్ గ్రూప్ వాళ్ళందరూ వాళ్ళ వాళ్ళ ఇళ్ళల్లో స్కైప్ లో లాగిన్ అయి నా చీర చూసి వెంటనే ఫేస్బుక్ లో లైక్ కొడతారు. వెంటనే వాళ్ళ ఫేస్బుక్ ఫ్రెండ్స్ లైక్ కొడతారు. అలా ఫ్రెండ్స్, ఫ్రెండ్స్ ఫ్రెండ్స్ కొట్టిన లక్ష లైకులు ఓ గంట లో వచ్చేస్తాయి. లక్ష లైకులూ పూర్తవ్వగానే అప్పుడు ఉద్యాపన చేసుకుంటాను"

"దీనికి స్కైప్ ఎందుకు? నీ ఫేస్ బుక్ లో పెడితే సరిపోతుంది కదా! మళ్ళీ ఆ ఉద్యాపన ఏంటి?"

"సర్లే  ! మొన్న ఆ శ్రీవారి ముచ్చట్ల బ్రాండ్ ఎంబాసడర్ లేడూ - అదే ఆఫీస్-స్పౌస్ వుందని పోజ్ కొడితే వున్న స్పౌస్ వదిలేసింది - ఆ భుజంగ రావు గారు - ఆయన "Without Spouse There Is No Spice in Life" అని ఫేస్-బుక్ స్టేటస్ పెడితే మా తింగర మేళం అంతా  కలిసి 100 లైకులు, కీపిటప్పులు పెట్టారు. ఎవరు ఏం పెట్టినా వాళ్లకి లెక్క వుండదు. అందుకే వాళ్ళ లైకుని లైవులో కేప్చర్ చేద్దామని ఈ వ్రతం డిజైన్ చేశా. స్కైప్ లో ముందు జాయిన్ అయిన రెండు డజన్ల మందికి స్క్రీన్-ప్రైజెస్ ఉంటాయని చెప్పా. అవి వుద్యాపనలో ఇస్తానని ఈ-వైట్ పంపా " ఎలా వుంది నా ఐడియా అన్నట్టు చూసింది రీ.

అసలే పొద్దున్నించి బాగాలేని గ్రహ-స్థితుల, వక్ర నక్షత్రాల గమనం వల్ల కనీసం కాఫీ కూడా అందక నీరసం గా వున్నాడేమో రీ పక్కనే వున్న కుర్చీలో నెమ్మదిగా కూర్చుని అడిగాడు - "ఇంతకీ ఎం ప్లాన్ చేశావు నీ స్క్రీన్-ప్రైజెస్ కి ?"

 "ఏముందీ! మొన్న వచ్చిన బోనస్ తో ఓ ఇరవై నాలుగు ఉప్పాడ చీరలు కొన్నా. ఇవాళ సాయంత్రం స్కైప్ లో లైకుల వ్రతం అయిపోగానే మనింటికి వస్తారు - నువ్వూ పిల్లలూ ఓ రెండు గంటలు ఎక్కడికయినా వెళ్లి రండి ... " అని ఇంకా ఏదో ప్లాన్ చెప్తూ వుంది రీ - అప్పటికే వూ కి వూపిరాడక శోషొచ్చి పడి పొయాడు .