నా చదువు మళ్లీ మొదలయింది.
మళ్లీ మొదలైందీ అని చెప్పడానికి నా చదువు ఆగింది ఎప్పుడూ లేదు.
రోజూ ఏదో వొక కొత్త పాఠం - ఎక్కడోక్కడ - ఎవరో ఒకరి దగ్గర - నేర్చుకుంటూనే వున్నాను, వుంటాను కూడా!
నిత్యవిద్యార్థినన్నమాట.
కలిసిన మనిషి
చెప్పిన మాటా, చూసిన చూపూ, చేసిన చేతా
కలయికలో దక్కిన -
ఎవరనే ఎఱుకా, ఏమిటనే చవీ, ఎందుకనే తెలివిడీ
ఈ చదువంతా ఒక ఎత్తైతే
చుట్టూ వున్న చెట్టూ - గుట్టా
చూపుకానే పులుగూ - పసరం
కదల్లేని రాయీ - రప్పా
కదలకుండలేని నీరూ - గాలీ
చెప్పకుండానే చెప్పే చదువు ఇంకో ఎత్తు.
*** *** *** *** *** *** ***
*** *** *** *** *** *** ***
ఇప్పుడొక్కసారి - తొలిగా నాకు చదువు చెప్పిన - చెప్తున్న ఒజ్జలందరిని ఓ సారి తలచుకుని వారికి జోతలిచ్చి ఆ తర్వాత నా చదువు కబుర్లకొస్తా...
గురురేవ గతిః - గురుమేవ భజే |
గురుణైవ సహాస్మి - నమో గురవే ||
న గురోః పరమం - శిశురస్మి గురోః |
మతిరస్తి గురౌ మమ - పాహి గురో ||
అన్నట్టు - ఈ గురువందనశ్లోకంలో ప్రత్యేకత ఏంటంటే ఉకారాంత పుంలింగ శబ్దమైన గురు-శబ్దం యొక్క అష్టవిభక్తుల ఏకవచన రూపాలూ ఈ శ్లోకంలో వరసగా వుంటాయి.
గురురేవ గతిః - గురువే నాకు దిక్కు (ప్రథమా విభక్తి)
గురుమేవ భజే - గురువునే సేవిస్తాను (ద్వితీయా విభక్తి)
గురుణైవ సహాస్మి - గురువు తోనే వుంటాను (తృతీయా విభక్తి)
నమో గురవే - గురువుకి నా నమస్కారం (చతుర్థీ విభక్తి)
న గురోః పరమమ్ - గురువు కంటే ఏదీ మిన్న కాదు (పంచమీ విభక్తి)
శిశురస్మి గురోః - గురువుకి నేను శిష్యుణ్ణి (షష్ఠీ విభక్తి)
మతిరస్తి గురౌ మమ - నా తలపు గురువునందే స్థిరమై వుంటుంది (సప్తమీ విభక్తి)
పాహి గురో! - ఓ గురు! నన్ను కాపాడు (సంబోధన-ప్రథమా విభక్తి)
*** *** *** *** *** *** ***
*** *** *** *** *** *** ***
ఇహ ఇప్పుడు మళ్లీ మొదలైన నా చదువు కబుర్లు.
ఓ పక్కేమో "నా చదువు అగింది లేదు, నేను నిత్యవిద్యార్థిని" అంటున్నానా?
మరి ఆగని చదువు మళ్లీ మొదలవ్వటమేంటి కదా?
మరంటే ఇదేదో ఆగిన చదువేనన్నమాటే కదా!
మరింకా అంటే ఇది అన్ని చదువుల్లాంటి చదువు కాదన్న మాట.
ఈ చదువేంటంటే - ఒక online తరగతిలో చదువుకునే సంస్కృత పాఠం.
సంస్కృతభారతి వారి S2S అంటే "సంభాషణతః శాస్త్రపర్యంతమ్" అనే నాలుగేళ్ల సంస్కృత వ్యాకరణ పాఠాల కోర్స్ 2024 వ సంవత్సరం జూన్ నెలలో పూర్తి చేశాను.
ఆ కోర్సులో చివరి సంవత్సరం - అంటే నాలుగో సంవత్సరంలో రెండు electives ఉంటాయి - శాస్త్రం (న్యాయశాస్త్రం) కానీ, సాహిత్యం (సంక్షేపరామాయణం) కానీ తీసుకోవచ్చు. నేను సాహిత్యం కింద సంక్షేపరామాయణం ఎంపిక చేసుకున్నాను.
అలా నా నాలుగేళ్ల కోర్స్ అయిపోయింది. సంస్కృతభారతి వారి ప్రమాణపత్రమూ (certificate) వచ్చింది.
కానీ నాకు "న్యాయశాస్త్రం" నేర్చుకోవాలని ఎంతో అనిపించేది.
నేనెంతో గట్టిగా అనుకున్నానో ఏమో - సంస్కృతభారతి ఆ నాలుగో సంవత్సరంలో శాస్త్రం చదువుకున్నవారికి సాహిత్యం, సాహిత్యం చదువుకున్నవారికి శాస్త్రం కోర్సులు మొదలుపెడుతున్నామని ప్రకటించారు.
నాలా ఆసక్తి వున్న వారికి "న్యాయశాస్త్రం" నేర్చుకోండీ అని ఇంకో అవకాశం ఇచ్చారు. అలా సెప్టెంబర్ 2024 లో న్యాయశాస్త్రంలో చేరాను.
కానీ అది నేర్పే గురువు గారికి కుదరక ఆగిపోయింది.
మళ్లీ 2025 సెప్టెంబర్లో మళ్లీ ఇంకోసారి "న్యాయశాస్త్రం" లో చేరాను.
నేర్పే గురువుగారికి నేర్పూ, ఓర్పూ వున్నా - నాకు నేర్చుకునే వీలు కుదరక - మళ్లీ ఆగిపోయింది.
ఇక ఈ న్యాయశాస్త్రం నాకు అందని పండే అని వదిలేసుకున్నా.
*** *** *** *** *** *** ***
*** *** *** *** *** *** ***
కానీ ఈ సంవత్సరం ఆగస్టులో "న్యాయశాస్త్రం" సెప్టెంబర్ నుంచి మొదలవుతోంది అన్న సంస్కృతభారతి (SB) ప్రకటన చూడగానే నాకిష్టమైన తర్కం (న్యాయశాస్త్రం) చదువుకోవాలనే ఆశ పుట్టింది.
వెంటనే register చేసుందామని SB site కి వెళ్తే - అక్కడ ఒక "న్యాయశాస్త్రం" బదులు "న్యాయశాస్త్రం 1, న్యాయశాస్త్రం 2" అని రెండు కోర్సులు కనిపించాయి.
అంటే - ఇంతకు ముందు నాతో పాటు 2025 లో "న్యాయశాస్త్రం" క్లాసులో చేరి - బుద్ధిగా మానేయకుండా చదువుకుని పూర్తి చేసి - విస్తారంగా తర్కం నేర్చుకోవాలనుకునే వారి కోసం "న్యాయశాస్త్రం 2" అన్న కొత్త కోర్స్ మొదలుపెట్టారన్నమాట.
న్యాయంగా చదవాల్సిన తర్కం చదవకుండా - అన్యాయంగా మధ్యలోనే మానేసిన నా కోసమేనేమో అన్నట్టు - "న్యాయశాస్త్రం 1" కూడా వుంచారు.
అది చూడగానే ఉత్సాహంగా fees కట్టేసి "న్యాయశాస్త్రం 1" లో చేరిపోయాను.
*** *** *** *** *** *** ***
*** *** *** *** *** *** ***
అప్పుడే నాకు నేనూ మా నాన్న లాగే "పెద్దొకటి" లో చేరుతున్నాననిపించింది.
ఆయనుంటే తప్పకుండా నా "పెద్దొకటి" గురించి ఆయనకి చెప్పి వుండేదాన్ని - ఇద్దరమూ నవ్వుకుని వుండేవాళ్లం.
ఇప్పుడు మాత్రమేమయ్యింది?!
మా నాన్న "పెద్దొకటి" గుర్తు చేసుకుంటూ - నా "పెద్దొకటి" గురించి రాసుకుంటూ - నేను నవ్వుకుంటున్నాను.
ఇదిగో - కిందటి వారమే - అంటే అక్టోబర్ 5 నుంచి నా "పెద్దొకటి" మళ్లీ మొదలయింది.
ఈసారైనా "న్యాయశాస్త్రం 1" జాగ్రత్తగా చదువుకుని - ఈ పెద్దొకటి "ఇంకా ...పే...ద్ద ఒకటి" కాకుండా వచ్చే ఏడాది "న్యాయశాస్త్రం 2" కి ఏ ఆటంకమూ లేకుండా చేరుకుంటానని నాకు నేనే చెప్పుకుంటూ...
ఈ కింద మా నాన్న "పెద్దొకటి" కబుర్లు కూడా పంచుకుంటున్నాను....
*** *** *** *** *** *** ***
*** *** *** *** *** *** ***
అవతారంగారి నారాయణగారి బాబి - 1 - పెద్దొకటి నుంచి .....(మా నాన్న ఐదేళ్ల వయసప్పటి ఫోటోతో)
ఐదేళ్ళ వయసువరకూ పుట్టు వెంట్రుకలు లేవు. నా ఫోటో వుంది - పుట్టువెంట్రుకలు తీయకుండా వున్నది - కింద బూట్లు, పైన గిరజాల జుట్టూ నేను.
ఐదో సంవత్సరంలో నాకు పుట్టు వెంట్రుకలు తీశారు.
ఆరో సంవత్సరంలో అక్షరాభ్యాసం, బళ్ళో వేయడం జరిగింది.
స్కూలుకి వెళ్ళేవాడిని కాదు.
మా వూళ్ళో అనుపిండి రామ్మూర్తిగారని ఉండేవారు - మునసబుగారి అన్నగారు.
ఆయనొక బెత్తం పట్టుకుని వెనకాల నిక్కరు పిఱ్ఱ మీద కొడుతూ బడికి తీసికెళ్ళి అక్కడ పడేసేవారు మమ్మల్ని - నన్నూ, కాళత్తయ్యగారి నాగన్నని.
ఏదో ఏడ్చుకుంటూ కూర్చునే వాళ్ళం బళ్ళో.
ఈలోగా నాతో చేరిన వాళ్ళందరూ ఒకటో క్లాసు నుంచి రెండో క్లాసుకెళ్ళారు.
రాజూ మాష్టారని ఒకాయన - "ఒరే! నువ్వింకా ఒకటేరా" అన్నాడు.
అంటే మనం ఒకటో క్లాసే ఫెయిల్ అన్నమాట.
ఫెయిల్ అంటే ఏడుస్తానని - "నువ్వు పెద్దొకటిరా" - అనేవారు.
అలా పెద్దొకటి కూడా చదివాను నేను.
*** *** *** *** *** *** ***
*** *** *** *** *** *** ***
