ఎక్కడ చూసినా, ఎలా చూసినా ఒక సిన్మాలో మేం చూసుకునే కొన్ని కొలతలు -
1) సినిమాలో కత్తులూ, కటార్లూ వూర్కూరికే వాడెయ్యకూడదు - కూరలు తరుక్కున్నట్టు తలలూ తనువులూ నరుక్కోకూడదు
2) గావుకేకలుండకూడదు - హీరో గొణుక్కోకుండా స్పష్టంగా మాట్లాడాలి
3) అచ్చ తెలుగు సిన్మా ఐతే - ఏ యాసైనా చూసేస్తాం - కానీ మాట బావుండాలి
4) పిల్లలు పిల్లల్లాగే వుండాలి - పెద్ద కబుర్లూ, పిచ్చి వేషాలూ వెయ్యకూడదు
5) హాస్యనటులని హీరో ఉట్టుట్టినే కొట్టకూడదు
6) నవ్వించే మాటలుంటే మాకు బ్రహ్మానందం!
7) పాటలు బావుంటే మాకింకా మహదానందం!
*** *** *** *** *** *** ***
*** *** *** *** *** *** ***
ఒక సిన్మా థియేటర్లో చూడడానికి పైన చెప్పిన కొలతలకి తోడు - మాకున్న కొన్ని లెక్కలు -
1) సూపర్-డూపర్ స్టార్లు లేనివీ
2) వందల కోట్లు ఖర్చు పెట్టనివీ
3) కథ వుంటుందేమో అనిపించేవీ,
4) కథ వుంటే-గింటే బావుంటుందేమో అన్న ఆశ పుట్టించేవీ
5) నేడే చూడకపోతే రేపుండవేమో అనిపించేవీ...
6) "ఎంక సీన నొణ" టైపు సినిమాలేమో అని మాకనిపించేవీ (అంటే ఏంటో చెప్తా...చెప్తా... - ఇది నిన్ననే అపర్ణ దగ్గర నేర్చుకున్నా - నాకు భలే నచ్చేసి ఇలా వాడుకున్నా)
*** *** *** *** *** *** ***
*** *** *** *** *** *** ***
మునుముందుగా ఓ సినీ-అస్వీకరణోపోద్ఘాతం (అంటే ముందుగా ఓ disclaimer ...)
నాకైతే ...
ఏదన్నా సిన్మా చూశాక - ఒక్కో సిన్మా బోల్డు నచ్చేస్తుంది. ఇంకో సిన్మా ఫర్వాలేదనిపిస్తుంది.
ఏ సిన్మా ఎంత నచ్చినా తర్వాత మళ్లీ ఇంకెప్పుడూ చూడాలనిపించదు. .
ఏదన్నా సిన్మా చూశాక - ఆ సిన్మా నచ్చితే - చూశానని చెప్పాక - ఎవరైనా - చూసిన సిన్మా ఎలా వుందీ అనడిగితే నా సమాధానం "నాకు నచ్చింది".
నాకు తెలిసినంతవరకు - నా జీవితంలో నేను చూసినంతవరకు - భక్తి, భుక్తి, మతం, రాజకీయం, పిల్లలూ, సినిమాలూ - చాలా వ్యక్తిగతమైన విషయాలు.
ఏ దేవుడిని ఎలా కొలవాలో - ఏం, ఎలా వండితే ఎవరికి నచ్చుతుందో - ఏ మతం ఎవరికి ఎందుకు సమ్మతమో - ఏ పక్షం ఎవరికెందుకు ప్రతిపక్షమో - పిల్లలనెలా పెంచాలో - ఏ సిన్మాని ఎలా, ఎందుకు చూడాలో - ఇలాంటి ఏ విషయాల్లోనూ - ఏ ఇద్దరి రుచులూ, అభిరుచులూ ఒకేలా వుండాలనే రూల్లేదు - ఒకేలా వుంటాయనుకోవడానికి వీల్లేదు.
అందుకే ఏ సినిమా అయినా నాకు నచ్చితే - బావుందీ - అని generalize చేసి చెప్పి - నేను చెప్పాను కదా అని వెళ్లిన ఒకళ్ళో ఇద్దరో చూసొచ్చి - ఏం బావుంది? నీ మొహంలా వుంది - అని అస్సలు మొహమాటమే లేకుండా నా మొహమ్మీద చెప్పాక - కొంచెం జాగ్రత్త పడి - "నాకు నచ్చింది" అని మాత్రం అని వూరుకోవడం అలవాటు చేసుకున్నాను.
అన్నట్టు సినిమాలు చూసే ముందు రివ్యూలు చదవడం కానీ, ఎవరి వ్యూలు వినడం కానీ నాకలవాటు లేదు. చూడబోయే సినిమా గురించి ఏమీ తెలియకుండా వెళ్లడం బావుంటుంది నాకు.
*** *** *** *** *** *** ***
*** *** *** *** *** *** ***
ఇంత ఉపోద్ఘాతం అయ్యాక - ఇప్పుడు ఈ ఏడాదికి - వచ్చినవి వచ్చినట్టు - భాషాబేధం లేకుండా - మా సిన్మా-కొలతలూ లెక్కలకి సరిచూసుకుని - ఎంచుకుని - మా ఇంటి సోఫాలో కాళ్లు చాపుకుని కూర్చుని - చూసిన తెలుగు, హిందీ, తమిళ-మళయాళ-డబ్బింగు సినిమాలన్నీ ఒకెత్తైతే - అవి కాక - కోరుకుని - ఏదో ఒక కారణం చూసుకుని - థియేటర్‌కి వెళ్లి చూసిన సినిమాలు పుంజీడుకి ఒకటెక్కువ - పంచపాండవుల్లెక్క.
ఈ 2026 సంవత్సరంలో మేము థియేటర్లో చూసిన సినిమాలూ - అవి చూడడానికి ఇంటి నుంచి వెళ్లడానికో ముప్పావు గంట, చూసి ఇంటికి తిరిగి రావడానికో ముప్పావు గంట, చూస్తూ హాల్లో గడిపిన ఓ రెండున్నర గంటలు - అంటే నాలుగ్గంటల సమయం ఒక్కో సినిమాకీ గడపడానికి కొన్ని కారణాలూ ఏంటంటే....
అనగనగా ఒక రాజు - ఈ సినిమా చూడడానికి రెండు కారణాలు - ఒకటి నవీన్ పోలిశెట్టి, రెండు మీనాక్షి చౌదరి. నవీన్ మాట్లాడితే నవ్వొస్తుంది. మీనాక్షి నవ్వితే బావుంటుంది. ఇంకంత కన్నా ఏం కావాలి? థియేటర్లో మాతో కలిపి ఓ ఏడుగురు. అనగనగా ఓ రాజు - ఏడు ప్రేక్షకుల కథ అన్నమాట. అంటే "ఎంక సీన నొణ" టైపు.
సింగ్ గీతం - ఇది చూడడానికి ఒకే ఒక్క కారణం - సింగీతం శ్రీనివాసరావు గారు. ఆయన తీసిన సినిమాల్లో నేను చూసినవి -అమెరికా అమ్మాయి, పంతులమ్మ, సొమ్మొకడిది సోకొకడిది, ఆదిత్య 369, పుష్పక విమానం, మైఖేల్ మదన కామరాజు. అవన్నీ కూడా నాకు నచ్చాయి. కానీ "సింగ్ గీతం" చూడడానికి కారణం మాత్రం ఆ సినిమాలు నచ్చడం మాత్రం కానీ కాదు. 93 ఏళ్ల వయసులో సినిమా తీసిన ఆయన ఉత్సాహానికి ప్రోత్సాహంగా గౌరవపూర్వకంగా చూడాలనుకుని చూసిన సినిమా ఇది. మాటలన్నీ పాటలుగా వున్న సినిమా అక్కడక్కడా బానే అనిపించినా అంత ఎంగేజింగ్‌గా అనిపించలేదు. మా వూళ్లో థియేటర్లో ఈ సినిమా "ఎంక సీన నొణ" టైపు.
ఇరుముడి - మేము ఒకప్పుడు రవితేజ సినిమాలు ఇష్టంగా చూసినా - ఈ మధ్య వచ్చిన రవితేజ సినిమాలు ఓటీటీలో కూడా చూడడం మానేశాము. కానీ "ఇరుముడి" మాత్రం పాత రవితేజని గుర్తు చేసుకుని - ఆ పాత రవితేజ రవితేజ కోసం థియేటర్లో చూద్దామనుకున్నాము. ఏమీ తెలియకుండా వెళ్లినా మాకు బాగానే నచ్చింది. మా వూళ్లో థియేటర్లో ఈ సినిమా "ఎంక సీన నొణ" టైపు.
కామ్రేడ్ కళ్యాణ్ - శ్రీవిష్ణు సినిమాలకి మా వూళ్ళో పెద్దగా జనం రారు. అందుకే చూద్దామనుకున్నాం. సినిమా మాకైతే చాలా నచ్చింది. థియేటర్లో మేమిద్దరం, మా పక్క సీట్లలో ఇద్దరు - మా ముందు సీట్లలో ముగ్గురు. పట్టుమని పది మంది కూడా లేరు. మళ్లీ ఏడుగురే. అందుకే మా వూళ్లో థియేటర్లో ఈ సినిమా కూడా "ఎంక సీన నొణ" టైపు.
గరివిడి లక్ష్మి - ఉత్తరాంధ్రకి చెందిన బుఱ్ఱకథ(?) కళాకారిణి గరివిడి లక్ష్మి అనే ఆవిడ జీవితకథ ఆధారంగా తీసిన సినిమా. మాకు బాగా నచ్చింది. మా వూళ్లో థియేటర్లో ఈ సినిమా అపి (అపి ... అంటే - కూడా...)"ఎంక సీన నొణ" టైపు.
*** *** *** *** *** *** ***
*** *** *** *** *** *** ***
పైదంతా అయ్యాక - ఆనక ఓ రెండు సిన్మాల ఊనికా-పూనికా నచ్చిన కథా-కమామీషూ...
నేను చూసిన సిన్మాల కథలూ, కబుర్లూ అస్సలు చెప్పబోవట్లేదిప్పుడు.
అన్ని సినిమాల కథలూ ఎక్కడో ఒక చోట రివ్యూల్లాగానో, ఇంకో రకంగానో వుండే వుంటాయి.
ఇదివరకట్లా ఆ సిన్మాలు నాకు ఎందుకు నచ్చాయో అని చెప్పాలని కూడా లేదు. మా బద్రి కూడా అన్నారు నువ్వింక బ్లాగ్ రాస్తున్నావూ అంటే అదేదో సినిమా చూస్తేనే రాస్తావు అన్నట్టనిపిస్తోంది - అని. అందుకే నా సినీ-మాయ లోంచి బయటికి వచ్చేద్దామని ఆ కబుర్లెక్కువ చెప్పట్లేదు.
కానీ ఇటీవల చూసిన ఒక రెండు సినిమాల గురించి మాత్రం చెప్పకుండావుండలేకపోతున్నానబ్బా!
అసలా సినిమాలు నచ్చిన కారణం కూడా చెప్పాలని బాగా అనిపిస్తోంది.
అక్కడికి వెళ్లే ముందు నేను బాగా నమ్మి ఆచరించే ఒక విషయమేంటంటే... చిన్నప్పట్నుంచి నేను నమ్మినదీ, నాలో నేను అనుకున్నదీ, నాకు నేను చెప్పుకున్నదీ ఓ మాటుంది. అది If you love, show it. If you feel, say it.
అంటే ఎవరి మీదైనా ఇష్టం కలిగితే, ఎవరిలో ఏమైనా నచ్చితే వాళ్లకి చెప్పాలి. వాళ్ల కళ్లలో ఆ చిన్ని మెరుపోటి చూడాలి.
మనిషి వుండగానే - వారు చక్కగా చూడగలిగి, వినగలిగిన రోజుల్లోనే వారి మీద ఇష్టాన్ని వాళ్లకి తెలియచెప్పాలి, చూపించాలి తప్ప - వాళ్లు వెళ్లిపోయాక - వాళ్లు వినలేని, చూడలేని "ఆహా - ఓహో" లు ఎందుకబ్బా అనిపిస్తుంది నాకు.
అలాంటి సందర్భమే ఇక ఇప్పుడు నేను ప్రస్తావించబోయే ఆ రెండు సినిమాలకి వర్తిస్తుంది - అవి ఏవంటే - సింగ్ గీతం, గరివిడి లక్ష్మి.
*** *** *** *** *** *** ***
*** *** *** *** *** *** ***
ముందుగా సింగ్ గీతం గురించి.
93 ఏళ్ల వయసులో ఇంకా సినిమాలు తీయాలీ అని ఎంతో ఉత్సాహంతో ఉరకలు వేస్తూ వుండేవారు దర్శకులు సింగీతం శ్రీనివసరావుగారు. ఆయన ఇంటర్వ్యూలలో ఆయన పని మీద ఆయనకున్న ఇష్టం ముచ్చటగా అనిపించేది - కానీ నిజంగా ఆలోచిస్తే అంత పెద్ద వయసులో ఆయనంతట ఆయన ఏం చేయగలరబ్బా అని కూడా అనిపించేది.
కానీ ఆయన ఆశనీ, ఆశయాన్ని అర్థం చేసుకుని - ఆయనకున్న పరిథిలో ఆయన ఏం చేయగలరో అంచనా వేసుకుని - ఆయన మీదున్న గౌరవాన్ని, భక్తిని - మెళ్లో వేసే దండల దగ్గర, కాళ్లకి పెట్టే దండాల దగ్గర ఆపేయకుండా - ఆయన కన్న musical కలని magical గా నెరవేర్చిన నాగ్ అశ్విన్ చేసిన పని నాకు బో...ల్డంత నచ్చింది.
ఇప్పుడు సింగీతం శ్రీనివాసరావు గారు లేరు. వెళ్లిపోయారు. కానీ ఖచ్చితంగా వెళ్లిపోయేముందు "హమ్మయ్య! నేను అనుకున్నవన్నీ చెయ్యగలిగాను" అనుకునైతే వుండివుంటారు.
ఆయనకి అలాంటి ఒక సంతృప్తి దక్కే పరిస్థితిని కల్పించిన దర్శక-నిర్మాత నాగ్ అశ్విన్ సింగీతం శ్రీనివాసరావుగారికి ఇంకెవ్వరూ ఇవ్వలేని గొప్ప బహుమతిని ఇచ్చారు. May his tribe increase...
*** *** *** *** *** *** ***
*** *** *** *** *** *** ***
ఇప్పుడు గరివిడి లక్ష్మి సినిమా గురించి.
తన పాట తనది కాకుండా పోయి - తన పాట తన చేతే పాడిస్తానని తనకిచ్చిన మాట కానిదైపోయి - తన ఉనికినే కోల్పోయి - తెరమరుగైన ఓ కళాకారిణి మీద గౌరవంతో, ఆమె పాట మీద ఇష్టంతో - ఆమె బతుకుబాటలో ఎక్కిన మెట్లనూ, దాటిన గతుకులనూ, పడ్డ పాట్లనూ, పాడిన పాటలనూ - సినిమా రూపంగా వెలుగులోకి తెచ్చిన "గరివిడి లక్ష్మి" నాకు ఇంకా బోల్డంత నచ్చింది.
గరివిడి లక్ష్మి అనే ఆవిడ తన కథ తనే చెప్పుకుని - తన కథలో తానే కనిపించేలా ఆవిడని తెర మొందుకి, తెర మీదకి తీసుకొచ్చి - తన పాటకి తనే హక్కుదారని లోకానికి చాటిచెప్పిన - దర్శకులు జమ్ము గౌరీనాయుడు ధన్యజీవి. May his tribe increase...
*** *** *** *** *** *** ***
*** *** *** *** *** *** ***
కొసా...కి ఓ కిసుక్కుమనిపించే కబురు...
మా వూళ్లో థియేటర్లో వచ్చే తెలుగు సినిమాలు చూడడానికి వెళ్లే మా గురించి మేమే వాడుకుని నవ్వుకోదగ్గ ఓ కన్నడ పదసముదాయము..."ఎంక సీన నొణ..."
నేను ముందే చెప్పాను కదా - మేము ఏ సినిమా చూద్దామని వెళ్ళినా - సరాసరికి సరిగ్గా ఏడుగురి కన్నా మించరు సినిమా-చూపఱు,
అది మాతో కలిపి కానీ, కలపకుండా కానీ - ఎప్పుడూ ఏడే.
ఇదే విషయం నా ఫ్రెండ్ అపర్ణతో అంటే తను కన్నడలో అలాంటి సందర్భంలో "యారూ జనానే ఇల్ల రీ - ఏనో ఎంక-సీన-నొణ అష్టే" అంటారని చెప్పింది.
అంటే "ఎవరూ జనమే రాలేదండీ - 'ఏదో ఎంకడూ-సీనా-ఓ ఈగా' అంతే" అన్నట్టు.
నాకది భలే నచ్చేసింది. ఈసారి నుంచి బద్రీ, నేనూ సిన్మాకి వెళ్తే అక్కడున్న మిగిలిన వాళ్లు "ఎంకా-సీనా..." అయితే మేమిద్దరం రెండు "నొణగళు" OR vice versa".
*** *** *** *** *** *** ***
*** *** *** *** *** *** ***
"ఎంకా - సీనా - నొణా" సహిత బోల్డన్ని కబుర్లు చదివినవారికీ - నేను చదవబోగా వినబోయేవారికీ ....
బో....ల్డన్ని న-మస్కా-రాలతో ....
~సినీ-మా-లక్ష్మి వ్రాలు
