కలత పడిన మదికి మఱపు...
మఱచి పోలేని వెలితికి తెరిపి...
ఎప్పుడూ ఓ పాటే!
ఆ పాట...
విన్నపాటున ఎదకు చేరుకుంటుంది
చేరుకున్న చోట ఒదిగి చుట్టుకుంటుంది
చుట్టుకున్న మదిని పట్టిపట్టి పలకరించి
పలకరించిన ప్రతీ పూటా పలవరింతై
పెదవుల మీద పదేపదే పలుకుతుంటుంది
అదుపులేని - కలవరమై
ఆపలేని - కలరవమై
అదుపు లేని - ఆపలేని - కూనిరాగమౌతుంది
ఆగలేక - ఉలికిపాటుగా
సాగిపోతూ - ఉనికిపాటగా
ఆగలేక - సాగిపోతూ - ఊపిరి-పాటౌతుంది
పలికి పలికి
వెలితి తరిగి
కలత కరిగి
కలల మరిగి
వెలుగుతున్న
మదికి మెరుపు
అప్పుడూ ఆపాటే!
అది ఎప్పటికీ నా పాటే!
*******
*******
ఒక్కో జ్ఞాపకం ఎంత బాధ పెడుతుందంటే ఆ జ్ఞాపకం గురించిన జ్ఞానమే లేకపోతే ఎంత బావుండునో అనిపించేంత.
కానీ ఒకసారి ఏదైనా జరిగిపోయాక దాని గురించిన జ్ఞానమూ, జ్ఞాపకమూ ఎంత విదిలించినా వదిలిపోవు. వదిలించుకోవాలనుకున్నా మరపు రావు.
విదిలించిన కొద్దీ మొండిగా, వద్దన్నా వదలక పెంకిగా వెంటనంటి వస్తూనే ఉంటాయి. వాటినల్లాగే రానిచ్చేస్తే ఇంకేమన్నా ఉందా?
ఉన్నచోట ఉండనీయక, తిన్న తిండి ఒంటబట్టనీయక, కంటి మీద కునుకు రానీయక - చికాకు పెడతాయి.
సరిగ్గా ... అలాంటప్పుడు హడావిడిగా ఓ పాట కోసం వెతుక్కుంటా. ఆ పాటతో పాటు - ఆ నొప్పి పెట్టే గురుతులని తిప్పి కొట్టే ఇంకో మంచి జ్ఞాపకం తోడు తెచ్చుకుంటా.
కన్నడద "నగువ నయన, మధుర మౌన ":
అలా ఎప్పటి రోజులదో అప్పు తెచ్చుకున్న పాటొహటి - ఇవాళ్టి కవల పాటల్లో మొదటిది - అమ్మనుడి-తెలుగు తర్వాత బహు కమ్మగా అనిపించే కన్నడ భాషలో వచ్సిన "పల్లవి-అనుపల్లవి" సినిమా లోది.
ఆ పాటేంటంటే ఎస్పీబీ-ఎస్జానకి పాడిన ఇళయరాజా సంగీత-మంత్రజాలం "నగువ నయన, మధుర మౌన..." అన్న పాట.
ఈ కన్నడ సినిమా మణిరత్నం దర్శకత్వంలో వచ్చిన మొదటి సినిమా. ఇందులో నటించిన హీరో-హీరోయిన్లు అనిల్ కపూర్-కిరణ్ హిందీ సినిమాల్లోంచి వచ్చినవాళ్ళే . వీళ్ళిద్దరితో పాటు లక్ష్మి కూడా ఉంది ఈ సినిమాలో. ఇప్పటి వరకు ఈ పాట వినడమే కానీ సినిమా చూడలేదు. యూట్యూబ్లో ఉన్న ఈ కన్నడ సినిమా వచ్చేవారం చూడ్డానికి టిక్కు పెట్టుకుని ఉంచుకున్నాం.
ఈ పాట విన్నప్పుడల్లా, చూసినప్పుడల్లా గుర్తుకొచ్చే తీపి జ్ఞాపకాలు - ఒకప్పటి బెంగుళూరు రోజులు.
కళ్ళ ముందు కలలా కదిలే ఆ జ్ఞాపకాల్లో కనిపించేవి - MG రోడ్ కావేరి ఎంపోరియం ముందు నుంచి తిరిగిన దారులు - కబ్బన్ పార్క్ వెదుళ్ళ బాటల్లో మాటలూ - చెట్ల ఆకుల సందుల్లోంచి కురిసే వెచ్చటి నీరెండ వేసిన నీడ ముగ్గుల్ని తొక్కకుండా నడవాలంటూ ఆటలూ - చలిచలి నడకల్లో రోడ్డు పక్క బండి మీద కొనుక్కుని ఊదుకుంటూ తిన్న వేడివేడి మొక్కజొన్న పొత్తులు - ఎండ పొడకి ఉలిక్కిపడిన మబ్బు అలిగి ఉన్నట్టుండి కురిసిన పూలలాంటి చినుకులు - వడి పెరిగి చినుకులకి పరుగులిడిన నడకలకి గొడుగెత్తిన చెట్లు.
ఇవన్నీ ఒకెత్తు అయితే - రాత్రి కాగానే మంచు మేలిముసుగు చాటున రంగురంగు రత్నాల హారాలూ, తళతళలాడే వజ్రాల వడ్డాణాలూ అలంకరించుకుని మురిసిపోతున్నట్టుండే దీపకాంతుల బెంగుళూరిణి అందం ఇప్పటికీ కళ్ళ ముందు మెదిలి మురిపిస్తుంది.
బెంగుళూరుని ఇంతగా గుర్తు తెచ్చే ఈ పాటంటే నాకు చాలా ఇష్టం. నాకిష్టమైన ఈ పాటని మళ్ళీమళ్ళీ తలుచుకోవడానికి వీలుగా ఈ రోజుకి ఇలా కవల-పాటల్లో రాసుకున్నా!
అన్నట్టు ఈ కవల-పాటల్లో తెలుగు పాటలో రొటీనుగా - తెలుగుని రోట్లో వేసి రుబ్బి - మీటర్ల కొద్దీ మేటర్ రాసినట్టు - ఎప్పట్లాగే అవే మాటలు - మందారాలు, శ్రీకారాలు, శృంగారాలు - గట్రాలు, ఎట్సెట్రాలు.
కన్నడ పాటలో మాత్రం కొన్ని మాటలు ఎంత బావున్నాయో! అందులో ఒకటి "ఎందెందు అళిసద రంగోలి" - అంటే అర్థం "ఎప్పటికీ చెరగని ముగ్గు".
ఇంకో సొగసైన మాట "హొంగణసను". ఈ మాటకి అర్థం "బంగారపు కలను" (హొన్ను + కణసను). ఈ సంధి ఏంటో తెలుసుకోవాలి :)
కన్నడ పాట యూట్యూబ్ లింక్: https://www.youtube.com/watch?v=Dajcwrykmf8
లలల్లా ...లలల్లా ..లలల్లా ..లలల్లా ...
లలల్లా ...లలల్లా ..లలల్లా ..లలల్లా ....
ఉహు...హూహుహుహూ...అహ...హాహహహా...
లలలా..లలలల ...లాలా....
నగువ నయన... మధుర మౌన...
మిడివ హృదయ ఇరె మాతేకె?
హొస భాషెయిదు - రస కావ్యవిదు
ఇద హాడలు కవి బేకె?
నగువ నయన... మధుర మౌన...
మిడివ హృదయ ఇరె మాతేకె?
నింగాగి హేళువె కథె నూరను
నానిందు నగిసువె ఈ నిన్నను
ఇరుళల్లి కాణువె కిరునగెయను
కణ్ణల్లి హుచ్చెద్ద హొంగణసను
జొతెయాగి నడెవె నా మళెయలు
బిడదంతె హిడివె ఈ కైయ్యను
గెళెయ! జొతెగె - హారీ - బరువె...
బాణ ఎల్లె దాటి నలివె...
నగువ నయన... మధుర మౌన...
మిడివ హృదయ ఇరె మాతేకె?
ఈ రాత్రి హాడో పిసుమాతలె
నా కండె ఇనిదాద సవి రాగవ
నీనల్లి... నానిల్లి... ఏకాంతవె
నా కండె నమ్మదె హొస లోకవ
ఈ స్నేహ తందిదె ఎదెయల్లి
ఎందెందు అళిసద రంగోలి
ఆసే ... హూవా... హాసీ... కాదే...
నడె నీ - కణసా... హొసకీ బిడదే...
నగువ నయన... మధుర మౌన...
మిడివ హృదయ ఇరె మాతేకె?
హొస భాషెయిదు - రస కావ్యవిదు
ఇద హాడలు కవి బేకె?
లలల్లా ...లలల్లా ..లలల్లా ..లలల్లా ...
లలల్లా ...లలల్లా ..లలల్లా ..లలల్లా ....
తెలుగులో "కనులు, కనులు -కలిసే సమయం":
ఇదే పాట తెలుగులో కూడా ఉంది - కానీ తెలుగులో జానకి బదులు చిత్ర పాడినట్టు అనిపించింది. తెలుగు పాటకి యూట్యూబ్ లింక్: https://www.youtube.com/watch?v=skxfOtR9XOE
లలల్లా ...లలల్లా ..లలల్లా ..లలల్లా ...
లలల్లా ...లలల్లా ..లలల్లా ..లలల్లా ....
ఉహు...హూహుహుహూ...అహ...హాహహహా...
లలలా..లలలల ...లాలా....
కనులు... కనులు... కలిసే సమయం
మనసు... మనసు... చేసే స్నేహం
నీ చేరువలో - నీ చేతలలో
వినిపించెను శ్రీ రాగం
కనులు... కనులు... కలిసే సమయం
మనసు... మనసు... చేసే స్నేహం
నీ నవ్వులో విరిసె మందారము
నీ చూపులో కురిసె శృంగారము
నీ మాటలో ఉంది మమకారము
నా ప్రేమకే నీవు శ్రీకారము
పరువాలు పలికేను సంగీతము
నయనాలు పాడేను నవగీతము
నేనే నీకూ కానా ప్రాణం?!
నీవే నాకు కావా లోకం?!
కనులు... కనులు... కలిసే సమయం
మనసు... మనసు... చేసే స్నేహం
నీ గుండె గుడిలో కొలువుండనీ
నీ వెంట నీడల్లె నను సాగనీ
నీ పూల ఒడిలో నను చేరనీ
నీ నుదుట సిందూరమై నిలవనీ
చెవిలోన గుసగుసలు వినిపించనీ
ఎదలోన మధురిమలు పండించనీ
నీలో నేనే కరగాలట
రోజూ స్వర్గం చూడాలంట!
కనులు... కనులు... కలిసే సమయం
మనసు... మనసు... చేసే స్నేహం
నీ చేరువలో - నీ చేతలలో
వినిపించెను శ్రీ రాగం
లలల్లా ...లలల్లా ..లలల్లా ..లలల్లా ...
లలల్లా ...లలల్లా ..లలల్లా ..లలల్లా ....
*******
*******
అప్పుడెప్పుడో లేతమనసులు సినిమాలో ఓ పాటలో ఆరుద్ర రాసిన ఓ వాక్యముంటుంది "మాట కలుపుకున్న కోపమే చెలిమి అగునులే" అని.
అది బావుంటుంది.
కానీ నాకు మాత్రం దాన్ని ""మాట కలుపుకున్న మౌనమే చెలిమి అగునులే" అని పాడుకోవడం poetic గా అనిపిస్తుంది. అలాగే పాడుకుంటూ ఉంటా కూడా.
అలాగే నాకిష్టమైన జ్ఞాపకాల పాటల్ని ఎప్పటికప్పుడు తలుచుకుంటూ నా మాటల్లో - నా పాటగా "పాట నిలుపుకున్న జ్ఞాపకం పదిలమౌనులే" అని కూడా పాడుకుంటా.
అలా పాడుకుంటూ ...
~ పాటల భైరవి
