ఆర్గానిక్ జీవితాలు ("విహంగ"ప్రచురణ)

నా "ఆర్గానిక్ జీవితాలు" వ్యాసం అంతర్జాల పత్రిక "విహంగ" లో  ఇక్కడ  చదవండి.
~లలిత 


                               ఆర్గానిక్ జీవితాలు 

ఈ మధ్య ఎక్కడ చూసినా ఆర్గానిక్-అవే కొనండి, ఆర్గానిక్-ఇవే తినండి అని ప్రకటనలు, ప్రక్కనే వాటి ధరలకి మనం పెట్టే డబ్బుల తేడాలు,  ఇంకొంచెం ప్రక్కకి జరిగితే – అదే… చూపు జరిపితే – పాలకూర, ద్రాక్ష వగైరావి ఆర్గానిక్ కానివి తింటే వచ్చే రకరకాల – పేరు ఎప్పుడూ వినని-నోరు తిరగని జబ్బుల వివరాలు… అవి చదివిన మైకంలో ఏదో కలకాలం భూమ్మీద వుండిపోదామనే ఆశతో సరే-వాళ్ళు చెప్పినట్టే అన్నీ ఆర్గానిక్ కూరలు, పప్పులు కొనుక్కుందామని అటువేపు వెళ్లి వచ్చినా, హస్తి-మశకాంతరం అన్నట్టు వుండే ఆ ఆర్గానిక్ , ఆర్గానిక్-కాని ధరల వల్ల – ఆరోగ్యం మాట ఎలా వున్నా బస్తాల్లో డబ్బులు తీసుకువెళ్ళి సంచీలో సరుకులు తెచ్చుకోవాలనే బెంగతో, ఆలోచనతో మనుషుల ఆయుర్దాయం తగ్గిపోతోంది.

కూరలు, పప్పులు ప్రక్కన పెడితే ఈమధ్యనే ఎవరో చెప్తూవుండగా విని “హా”శ్చర్యపోయాను – మన ఆంధ్ర రాజధానిలో ఒక డిపార్టుమెంటల్ స్టోర్ లో ఆర్గానిక్-కుంకుడు కాయలు, ఆర్గానిక్-చింతపండు అమ్ముతున్నారట.    ఔరా కలికాలం అంటే ఎక్కడో లేదు అనిపించింది. అడవుల్లో ఎక్కడో మబ్బులు పోసిన నీళ్ళు త్రాగి, తమ నుంచి రాలి, వడలిన ఆకులే ఎరువుగా అమాయకంగా పెరిగి, తమకన్నా అమాయకమైన కోయవాళ్ళు, భిల్లులు కోసి తలకెత్తుకుని, మోసి సంతలలో దళారీలకి ఐదు, పది రూపాయలకి అమ్మితే – ఆ కుంకుడు కాయలకి, చింతపండుకి దుమ్ము దులిపి, అందమైన ప్లాస్టిక్ కవర్లో పోసి వందల రూపాయలకి అమ్మే మనిషి దురాశ వినాశాహేతువే కదా!

అమెరికా ఆర్గానిక్ స్టోర్ లో ఆర్గానిక్-క్లోత్స్ వాషర్ ఒక పౌండ్ ఇరవై డాలర్లు – అని షోగ్గా ఒక గోనెసంచి (ఇదే సంచి మన వూళ్ళో కాళ్ళకడ్డం వస్తే   గోనె అని తన్నేసి పడేస్తాము – ఇక్కడ షాప్ లో ఇస్తే మాత్రం ఆ షాప్ లోగో కనిపించేలాగా ముందు రూం గోడ మీదో, వంటింటి గోడలమీదో స్టైల్ గా “డిస్ప్లే”పెడతాము.) కనిపిస్తే  ఏంటా అని కుతూహలం ఆపుకోలేక విప్పి చూశాను – అందులో ఏమున్నాయో ఊహించగలరా – కుంకుడు కాయలు. వెంటనే చిన్నప్పట్నుంచి తన పట్టుచీరలని  కుంకుడుకాయ రసంతో వుతుక్కునే మా  లక్ష్మి దొడ్డ ని తలుచుకుని – అబ్బా! మా దొడ్డ చెప్తే వినలేదే నేను – ఇప్పుడీ అమెరికా వాడు చెప్తే కాని నా తలకంటలేదు – నిజంగా నా తల కుంకుడుకాయతో తలంటుకుని శుభ్రం చేసుకోవాల్సిందే – అని మనసులోనే చెంపలు వేసుకున్నాను.
అంతా సహజంగా జరిగిపోయే రోజుల్లో – ఆవులకి బలం కోసమని, ఎక్కువ పాలిస్తాయని, అలా వచ్చిన  పాలు త్రాగితే పిల్లలకి బలమని చెప్పి – పాలల్లో డి-విటమిన్ అనీ, ఇంకోటనీ రకరకాల హోర్మోన్స్ కలిపి, పాలు కాచకపోయినా పర్వాలేదు అని చెప్పి  ఇన్నేళ్ళూ కొన్ని తరాలకొద్దీ చల్ల పాలు త్రాగించి ఇప్పుడు హఠాత్తుగా , అదేదో కొత్తగా కనుక్కున్న సత్యంలాగా – హార్మోన్స్ కలిపిన పాల వల్ల పిల్లలు తొందరగా, ఎక్కువగా వయసుకు మించి ఎదిగిపోతున్నారని, చల్ల పాల వల్ల కూడా నష్టాలు వున్నాయని, ప్లాస్టిక్ డబ్బాలో పాలు మంచివి కావని  చెప్పి – మళ్ళీ గాజు సీసాల్లో పాలని బంగారంలా రెట్టింపు రేటుకి అమ్ముతున్నారు – దట్ ఈజ్ కార్పోరేట్ అమెరికా అని. మన దురదృష్టమేంటంటే ఇదే గొప్ప అని ఇలాంటి ఎన్నో అవలక్షణాలను దిగుమతి చేసుకుంటోంది మన భారత దేశం.
అన్నట్టు ఇంకో విషయం అండోయ్  - సహజంగా పెరిగి దొరికేవి ఆర్గానిక్ అయితే మన పిల్లల్లో కూడా ఆర్గానిక్, ఆర్గానిక్ కాని వాళ్ళు వున్నారు – ఎలాగో తెలుసా – నార్మల్ డెలివరీ అయితే ఆర్గానిక్-బేబీ, సిజేరియన్ తో పుడితే నాన్-ఆర్గానిక్-బేబీ ) డాక్టర్లు అలాంటి బోర్డులు అంటే- “ఆర్గానిక్-బేబీ మా ప్రత్యేకత” – అని పెట్టే రోజులు ఎంతో దూరంలో లేవు.
ఆలోచించాల్సిన విషయమే మరి !!!!

-లలిత

మా కుట్టి పాడిన పాటలు-1-మంచి గంధం ముద్ద మీద

(మా చిన్న చెల్లి కుట్టి చాలా బాగా పాడేది. కొన్ని సంవత్సరాలు కర్ణాటక సంగీతం మరియు లలిత సంగీతం కూడా నేర్చుకుంది. తను ఇప్పుడు లేకపోయినా తన పాట మాతోనే వుంది. కుట్టి  పాడిన  లలిత సంగీతం పాటల్లో నాకు గుర్తున్నవి ఈ బ్లాగ్ లో పొందు పరుస్తున్నాను.)


మంచి గంధం ముద్ద మీద 
నల్ల కస్తూరి బొట్టు లాగ 
చందమామ ఆకసంలో
అందగించాడు...చిందులేశాడు  


నీలి నీలి సాగారానా ఆ ఆ ఆ 
నీలి నీలి సాగరాన
తెల్ల తెల్లని తెరచాపెత్తి             ||నీలి||
సాగిపోయే పడవలాగా ఆ ఆ ఆ 
సాగిపోయే పడవలాగ
చందమామ ఆకసంలో

అందగించాడు...చిందులేశాడు  ||మంచి||

నల్ల నల్లని కొప్పులోనా ఆ ఆ ఆ 

నల్ల నల్లని కొప్పులోన 

తెల్ల మల్లియ దండవోలె          ||నల్ల||

చీకటింట్లో దివ్వెలాగా ఆ ఆ ఆ 

చీకటింట్లో దివ్వెలాగ 

చందమామ ఆకసంలో

అందగించాడు...చిందులేశాడు  ||మంచి||

నాకు కోపం పోతోంది... :)

మా సుహాస్ సెయింట్ లూయిస్ "మన బడి" లో నాలుగో సంవత్సరం - ప్రభాసంలో తెలుగు చదువుతున్నాడు. అప్పుడప్పుడు ఇంగ్లీష్ నుంచి తెలుగులోకి అనువాదం చేసేటప్పుడు కొంచెం తికమక పడతాడు :) 


ఒకసారి ప్రభాసం తరగతి గదిలో మాస్టారు "I lost my temper" అంటే "నాకు కోపం వస్తోంది" అని అర్థం చెప్పారట. వెంటనే మా బుజ్జి సుహాస్ కి సందేహం వచ్చేసింది. మాస్టారుని ఇలా అడిగాడట - అంకుల్! "losing" అంటే పోవడం కదా అందుకని "నాకు కోపం పోతోంది" అనాలి కదా అని :)) 


కోపమేమో గాని నేనే అక్కడ టీచర్ ని అయుంటే నేను తరగతి గది బయటికి "పోయి" వుండేదాన్ని. ఆ తెలుగు చెప్పే ఆయన మంచివారు కాబట్టి సందర్భానుసారంగా సుహాస్ కి బదులిచ్చారు.


ఇంక మాబుల్లి తెలుగు పండితుడు ఇంటికి రాగానే కిరణ్ ఏదో అల్లరి చేస్తుంటే - తమ్ముడూ! అలా చేయకు. నాకు కోపం పోతోంది - అని అల్లరిగా నవ్వాడు. అదేంట్రా అని అడిగిన మాకు (అమ్మా, నాన్నగార్లకి) తెలుగు తరగతి గదిలో జరిగిన సంభాషణ గురించి చెప్పాడు.

కళా రత్నం గీతం...

నాన్నమ్మ పద్యం:


 (చిన్నప్పుడు మా నాన్నమ్మ పాడగా విన్న శ్లోకాలలో ఇది ఒకటి...ఆవిడ ఈ శ్లోకం పాడిన ఆడియో టేప్ కూడా వుంది నా దగ్గర.)


కళా రత్నం గీతం
శ్రవణ సుఖ రత్నం హరికథా
రణే రత్నం వాజీ
గగనతల రత్నం దినకరః
నిశా రత్నం చంద్రా 
శయన సుఖ రత్నం శశిముఖీ
సభా రత్నం విద్వాన్ 
నృపతికుల రత్నం రఘుపతీ

శ్రీ ఖర నామ ఉగాది - పొద్దున్న పులిహోరు, సాయంత్రం సాంబారు - గులాబ్ జామూన్ గుర్!

శ్రీ ఖర నామ ఉగాది శుభాకాంక్షలు ....


మాకు ఈఉగాదికి వేపపూత దొరకలేదు. పోన్లే కొంచెం సర్దుకుందాం అనిచెప్పి కాకరకాయ పైచెక్కుతో ఉగాది పచ్చడి చేసుకుని వేపపూతని ఊహించుకుంటూ ఉగాది పండగ చేసుకుందామూ అనుకుంటే ఎందుకో అంత బాగా అనిపించక కలిపిన పచ్చడి అలాగే ఉంచేశాను. ఇంతలో సోమవారం కదా - మా బుజ్జికిరణ్ స్కూల్ కి వెళ్దామని ఏడింటికి లేచి వచ్చాడు. సుహాస్ కిరణ్ కి గుర్తు చేసాడు - తమ్ముడూ! ఇవాళ తలస్నానం చేయాలి -అల్లరి చేయకుండా అని. కిరణ్ దానికి ఏదో "కుహు - కుహు" అంటున్నాడు (అంటే బుజ్జి పక్షిలా తల అడ్డంగా తిప్పి చేయను అన్నాడు కానీ - మళ్ళీ అన్న చెప్పాడని బుద్ధిగా తలంటు పోయించుకున్నాడు). రోజూలాగే వాడి లంచ్ క్యాలెండర్ చూస్తున్నాను - ఏంటా ఇవాళ స్కూల్ లో లంచ్ కి అని. అందులో చీస్ రావియోలి అని వుంది. పోన్లే కాఫెటేరియా కి ఏమీ నోట్ పంపించక్కర్లేదు అనుకుంటూ వున్నాను (లంచ్ క్యాలెండర్ లో బీఫ్, పోర్క్ ఐటమ్స్ వుంటే స్కూల్  కాఫెటేరియా కి నోట్ పంపిస్తాను-వేరే ఐటం పెట్టమని కిరణ్ కి ). 


ఈలోగా కిరణ్ ఇవాళ - ఇండియా లో న్యూ ఇయర్ అని చెప్పావు. నాకు లంచ్ కి పులిహోరు (వాడి భాషలో పులిహార) కావాలీ..ఈ..ఈ.. అన్నాడు. వాడు ఇంకా ఎన్ని ఈ..ఈ..లు కలుపుతాడో దానికి అని గబగబా "పులిహోరు" చేసి బాక్స్ లో పెట్టాను. నిన్న రాత్రి (ఆదివారం) వాడికి ఆమ్ తినిపిస్తూ వుంటే అడిగాడు - సాంబారు ఎప్పుడు చేస్తావు అని. అలవాటుగా "రేపు డిన్నర్ కి " అనేశాను. వెంటనే కిరణ్ ఇవాల్టి  మెన్యూ ఇలా చెప్పాడు -అదీ- అలా పుట్టింది - "పొద్దున్న పులిహోరు-సాయంత్రం సాంబారు" అనే టైటిల్ :)) 


ఆగండాగండి - అమ్మయ్య మీ కొత్త సినిమాకి టైటిల్ దొరికిందని అప్పుడే సంబరపడి పోకండి -అక్కడితో కథ అయిపోలేదు - మా కాపీ రైటెడ్ టైటిల్ ఇంకొంచెం పెద్దది. మా మున్ను సుహాస్ కి గులాబ్ జామూన్ చాలా ఇష్టం. నేను ఉగాది కోసం మామిడికాయ, కొబ్బరికాయ లాంటి పచ్చడి సామాగ్రి కొనడానికి వెళ్తుంటే కనీసం నాలుగుసార్లు గుర్తుచేశాడు - గులాబ్ జామూన్ ప్యాకెట్ తెమ్మని. ఓ..అలాగే అని ఆ నాలుగుసార్లూ తలవూపి మాంచెస్టర్ రోడ్ మీద వున్న కొత్త ఇండియన్ స్టోర్ - హర్ష గ్రోసరీస్ లోకో వెళ్లి కూడా తేవడం మర్చిపోయాను. అయ్యో అనుకునేలోగా దార్లో "జబీహా గ్రోసరీస్" లో అదృష్టవశాత్తూ గిట్స్ గులాబ్ జామూన్ పాకెట్స్ దొరికాయి. పాపం! ఇంటికి రాగానే చేయమని అడిగినా పండగకి చేస్తాననగానే ఊరుకున్నాడు. సుహాస్ కి చెప్పాను - రేపు (సోమవారం) స్కూల్ నుంచి వచ్చేటప్పటికి చేసి ఉంచుతానని. ఇవాళ... అదే... ఉగాది రోజు మధ్యాన్నం నాలుగున్నరకి ఆఫీసు వర్క్ అయిపోగానే - సుహాస్ ఆరింటికి వచ్చేలోగా తొందరగా చేసేయాలని - చాలా శ్రద్ధగా ప్యాకెట్ మీద ఇన్స్ట్రక్షన్స్ మీద నమ్మకం లేక నా ఫ్రెండ్ విజయకి ఫోన్ చేసి, విసిగించి ;) గులాబ్ జామూన్ పర్ఫెక్ట్ గా రావాలని మ్రొక్కుకుని జాగ్రత్తగానే చేసాను - ఎప్పుడు సుహాస్ వస్తాడా అను ఎదురుచూస్తూ వుంటే వాలీ బాల్ అయిపోగానే వచ్చాడా- ఆశగా ఒక రెండు జామూనులు బౌల్ లో వేసుకుని తిని - "ప్చ్" అని పెదవి విరిచి స్నానం కి వెళ్ళిపోయాడు.  స్కూల్ నుంచి వచ్చేటప్పటికి చేసి వుంచుతానంటే - వాడు వచ్చే టైం కి అప్పుడే వేడిగా చేస్తూ వుంటాననుకున్నాడట :( కుంచెం కమ్యూనికేషన్ గ్యాప్ :( ఏం చేస్తాం...రేపు మళ్ళీ చేసి పెడదామనుకున్నాను. వాడికి చెప్పలేదు. హుష్! మీరూ చెప్పకండేం!!? 


అదండీ - అలా ఒక కొత్త టైటిల్ సినిమా కోసం కాపీ రైట్  చేసి పెట్టాను - "పొద్దున్న పులిహోరు, సాయంత్రం సాంబారు - గులాబ్ జామూన్ గుర్!" అని. మీకెవరికన్నా సినిమా తీయాలని వుంటే చెప్పండి.

పేరులో  "ఖరం" వున్నా ఈ  ఖర నామ సంవత్సరం మీ అందరికీ -

శ్రీకరం

శుభకరం

శ్రేయస్కరం -

కావాలని శుభాకాంక్షలు తెలుపుతూ....

~లలిత