ఉషస్సు ఎటూ లేదు - ఉగాది! నువ్వెక్కడ?

మా వూర - నాల్గు రోజులై
ముసురేసిన  ఆకాశం
ముసుగేసిన ప్రకాశం
ఉషస్సు ఎటూ లేదు!

తగులు-మిగుళ్ల నిశిలో చైత్ర పాడ్యమి మసిబారింది
ఉన్నపళాన - నింగి నిచ్చెననెక్కి అందుకోలేని వేప్పూత ఆకాశకుసుమమైంది
తన తర్వాత అందుకోవడానికి విళంబి ఏడాదికావల వేచివుండగా 
తనలో చేరిన మునుపెన్నడూ ఎరగని '(హే)మలంబ' ని  పోల్చుకోలేక
తన పేరు తానే - ఇల్లలకకుండానే - మర్చిపోయి బిక్కమొహం వేసిన హేవిళంబి -
వెతుక్కోవాలేమో ఇక
ఉగాది! నువ్వెక్కడ?



పంచాంగాల పట్టింపుల్లో
మారు-పేర్ల ఉగాదుల్లో
నీరుకారిన మనసులో
మెరుపులా మెరిసింది
చిరునవ్వు మొలిచింది 
ఈరోజు - ఈలాగుండునని
ఆ రోజే - ఊహించి రాశారేమో అనిపించి -
అనుకోకుండానే గుర్తొచ్చిన - కృష్ణశాస్త్రి గారి కవిత
కారుమబ్బు అంచున మెరిసిన తటిల్లత

నాకుగాదులు లేవు - నాకుషస్సులు లేవు 

నేను హేమంత కృష్ణానంత శర్వరిని 

నాకు కాలమ్మొక్కటే  కారురూపు 

నా శోకమ్ము వలెనే - నా బ్రతుకు వలె  - నా వలెనే

  
భావమేదైతేనేం - పొల్లులేని ఆ  భాష
నిలిపింది నా మదిన - వెల్లువైన వసంతం
చిరునవ్వు - చిరుజల్లు - కలిసి కురిసి
వెల్లవేయగా - హేవిళంబి ఉగాది - నా సొంతం