ఓ పుష్పోత్తరం - టు పుష్ప-2 డైరెక్టర్ ఫ్రమ్ పుష్ప-వాచర్...

పుష్ప-2 డైరెక్టర్‌కి,

    శానా శానా పుష్పాభినందనలతో ఓ పుష్ప-వాచర్ రాస్తున్న ఓ పుష్పోత్తరం (దుషట సమాసంలా అనిపిస్తే - ఈ తూరికి మన్నించేయప్పా, సుక్కప్పా!). 

    పుష్ప చుట్టూ వుండేవోళ్లంతా వాళ్లవాళ్లోళ్ల పేర్లతో, ఇంటిపేర్లతో గాకుండా పుష్ప-అమ్మ, పుష్ప-అన్న, పుష్ప-మేనేజరు, పుష్ప-డ్రయివరు అంటా పేమస్సు అయిపోయుండారుగా...అందికే పుష్ప-సిన్మా తీసినోడు పుష్ప-డైరెక్టరు, పుష్ప సిన్మా చూసుండిన నేను పుష్ప-వాచరు గాక ఇంకేమిటి అయ్యుండేది? అదీ పుష్ప-లెక్క!

    సుక్కప్పా! బలేనప్పా! సిన్మా మొదలవుతూనే బలే క్యామెడీ చూపిచ్చినావే. 

    అదెట్లెట్లా! 

    జపాన్లో గూడా విలన్లు మన దగ్గరి మాదిరే నెత్తి మీద జులపాల జుట్లేస్కుని, ఒంటి మీద సూట్లేస్కుని - ఫైటింగనేటప్పటికి కత్తులూ, గొడ్డళ్లేసుకొస్తారా? పైగా అందరూ ఒక్క తూరి మీద బడి తన్నక ఒక్కోళ్ళే వరసలో బోయి పుష్పతో  తన్నిచ్చుకున్నారు గదా!

    పుష్ప అనుకుంటే ప్యానిండియా అనుకుంటి గానీ జపానిండియా అనుకోనేలేదబ్బా! 

    మన పుష్పా నలఫైరెండ్రోజులు గాలీ, ఎలుతురూ రాకుండా నాలుగు పక్కలా మూసేసిన కంటెయినర్లో 30 రోజుల్లో జపాన భాష పుస్తకం సదివినాడంటే ఆడెట్టాంటి మనిషబ్బా! వాళ్ళావిడ శ్రీవల్లి జెప్పినట్టు బగమంతుడెట్టా?! ల్యాపోతే ఆ కంటెయినర్లో ఆ ఎఱ్ఱచందనం దుంగల మద్దెన పరుపేసి, పక్కేసి , ఏసీ గూడా పెట్టించావా ఏంది పుష్ప వస్తుండాడని? 

    అవునూ....పుష్పరాజుని జపాన్లో సముద్రంలో ముంచావు. అక్కణ్ణుంచి ఊరికి సీను తిప్పిచ్చి  పిల్ల-పుష్పరాజ్ నీళ్ళల్లో మునిగిన మాదిరి చూపించావ్. ఆమిటికి  మళ్ళీ పెద్దోణ్ణి చేసి పీడకలేదో కన్నట్టు నిద్ర లోంచి లేపిచ్చినావ్. ఇంతకీ  ఆ జపాన్ ఫైటు కలంటావా? కలపలేక మర్సిపోయిన కతంటావా? 

    మూడు గంటల పైగా తీస్తే తీశావ్ గానీ సినిమా అంత బాగుండనట్టు అనిపిచ్చకుండుండె.  ఎట్టనిపిచ్చిద్దిలేబ్బా! సిన్మా మొదలైన పద్నిమిషాలకే తల పంజేయడం ఆగిపోయుండుండ్లా? ఇంక ఎంత సేపు చూసుండామో లెక్కపత్రం తెలిసేదెట్టా? నోరెళ్ళబెట్టుకుని చూస్చానే వుండిపోయా. 

    ఆ పుష్ప నోటెంబడి మాట సరింగా ఇనిపిస్తే గదా... దాంతోడు నాటకాల్లో హార్మనీ పెట్టె తొక్కిన మాదిరి ఒకటే కుయ్యి-కుయ్యి BGM సాగతానే వుండే సిన్మా పొడుగూకి. 

    పుష్పకి ఎదురే ల్యాకుండా ఏకపాత్రాభినయమనిపిచ్చింది. విలను షెకావత్తు వేషమేసిన ఫహాదుతో క్యామెడీ చేపిచ్చి అంతటి విలన్నూ నవ్వులపాలు జేపిచ్చినావే!

    సుక్కప్పా! హీరోయిన్ల మీద పూలూ, పళ్ళూ ఏపిచ్చిన రాఘవేందర్రావుని నువ్వు మించిపోయుండావబ్బా... పుష్ప బొడ్డు మీద పచ్చిమిరపకాయేసి. 

    పుష్ప-1 లో ఒక పాటలో ఆడిచ్చిన సమంతాని పుష్ప-2 రష్మికాలో పాటపాటకీ గుర్తు చేపిచ్చినావే! ఒగ టికెట్టుకి మూడు సిన్మాలన్నట్టు. 

    జాతర్లో కాంతారాని దించినట్టనిపిచ్చింది. 

     పుష్పరాజ్ కాళ్ళూ-చేతులూ కట్టిపిచ్చినా ఎగిరెగిరి విలన్లందరినీ కరిచి, కరిచి మరీ చంపె కదప్పా! స్పైడర్-మ్యాను దారాలేసుకుని గోడలెక్కగా లేంది మన వైల్ద్-ఫైర్ మ్యాన్ పుష్ప ఆ మాత్రం జేయకూడదా అంటావా.

    నాకైతే సిన్మా ఏదో చుట్టేసినట్టనిపిచ్చిందిలేబ్బా! 

    ముందు చూపించిన జపాన్కి, చివరాఖర్లో చూపించిన శ్రీలంకకి లింకు చూపిచ్చలేక పుష్పాల్లో బాంబు పెట్టి పేలిపిచ్చి పుష్ప-3 వున్నట్టు చూపిచ్చినావు. 

    ఇంకో మూడేళ్లకి అయిడియాలు దండిగ రావా ఏంది? ఇప్పటికి చూసిందంతా మర్చిపోయి మేమంతా ఇంకో తడవ పుష్ప-3 చూసేదానికి ఎగబడమా ఏంది? నీ బుద్ధి సూక్ష్మమబ్బా! 

    ఎట్లైనా మాష్టార్వి గదా - పిలకాయలకి ముందు చదివిన సిలబస్సు మతికుండేదేల్యా అని నీకు తెల్సిపాయె. 

    ఇంకో తూరి "పార్టీ వుండాది, పుష్పా" అనుకుంటా నువ్వొచ్చేదీ, మందికి పుష్ప-3, 4, 5, 6, 7....అనుకుంటా హారీపాటర్ సిరీసు మాదిరి  పుష్పాలు పంచిపెట్టిచ్చేదీ ఖాయమనిపిస్చాందప్పా! 

ఇంకో పుష్పాకి ఎదురు చూస్చా ఇంకుంటా మరి,
పుష్ప-వాచర్