మనసే జతగా పాడిందిలే - 1 - కవలపాటలు (భాగ్యరేఖ)

మాట మనుషుల్ని కలిపితే
పాట మనసుల్ని కదుపుతుంది
ఒక్కో పాట కళ్ళు మూసుకుని వినాలనిపిస్తుంది
ఇంకో పాట కాళ్లు కదిపి నిలవనీయనంటుంది
విరజాజుల సువాసన ఓ పాట గాలై మోసుకోస్తే
సిరిమువ్వలసందడి ఇంకో పాట గజ్జై మోగిస్తుంది.

పుట్టినప్పటినుంచి పాట వింటూ - పాట తోడుగా - పాడిందే పాటగా - పాడుతూ పెరిగాను.

నచ్చిన పాట - అదున్నట్టూ కాక - నే విన్నట్టూ కాక - నాకొచ్చినట్టు పాడుకోవడం - నాకిష్టం - నా ఇష్టం. 
నే మెలకువగా వున్నంతసేపూ - నా పాట పొలకువ వుండాల్సిందే .

నేను వినే పాటల్లో రకరకాలుంటాయి -
నేను కావాలని వినే - తెలుగు, హిందీ, ఇంగ్లీష్, కన్నడ, తమిళం - భాషలవి.
నేను కావాలనుకోకపోయినా - వినిపించే - కొరియన్ భాషవీ ఉంటాయి - అన్నగాడు ఇంటి పట్టున వుండే సెలవు రోజుల్లో.

అందులో కొన్ని -
>>>వినగానే నేర్చేసుకోవాలి అనిపించేవి.

>>>వింటుంటే ఇదెక్కడో విన్నానే అనిపించేవి.

>>>విన్నాక రాసేసుకుని దాచేసుకోవాలనిపించేవి.

>>>వింటూనే - "అసలు పాట ఇదా - మొన్నే కదా మన తెలుగు సినిమాలో విన్నాం - ఇన్స్పిరేషనో ఏమోలే" అని ముచ్చటపడిపోయేవి; అసలు పాటని-కొసరు పాటని పక్కపక్కనే విని - అయినవారితో పంచుకుని మురిసిపోయేవి  - కవల (కాపీ?) రాగాలనబడేవన్నమాట.

>>>వినేసి - గబగబా నేర్చేసుకుని - చులాగ్గా పాడేయగల్గే - కూనిరాగాలు కొన్ని. 

>>>ఇది నన్ను వినకపోతే బావుండును - అని అనుకుంటూనే - తప్పించుకోలేక  - నా పాల బడి - పాట్లు పడలేక  - పాటే పాటుపడి దాక్కోవాలనుకునే - ఖూనిరాగాలు ఇంకెన్నో.

ఇన్నిరకాల పాటల్లోనూ - నాకు  కవల-పాటలంటే భలే సరదా.
కవల-పాటలంటే ఇంచుమించుగానో, అచ్చుగుద్దినట్టుగానో ఒకేలా వినిపించేవి.

అసలీ కవల-పాటలు పలు రకాలు.
ఒకే సినిమాలో - ఒకే భాషలో -
 
>నవ్వు రకం, ఏడుపు రకం (దసరా బుల్లోడు)

>ఆడ పాట, మగ పాట (భాగ్యరేఖ)

>చిన్నప్పుడు, పెద్దప్పుడు (దేవదాసు)

ఒకే సినిమాలో (డబ్బింగో, రీమేకో) - పలు భాషల్లో -

>(సువర్ణసుందరి - తెలుగు, హిందీల్లో; ఆహ్ - హిందీ, ప్రేమలేఖలు - తెలుగు )

>(పూజ-తెలుగు, ఎరడు కణసు - కన్నడ)

వేరే వేరే సినిమాల్లో - 

>పాత సినిమా పాట మెల్లిగా సాగుతూ , కొత్త సినిమా పాట గబగబా పరిగెడుతూ (బుల్లెమ్మ-బుల్లోడు, వాన)

>పాత సినిమాలో తండ్రి హీరోగా, కొత్త సినిమాలో కొడుకు హీరోగా (ఘరానా మొగుడు, మగధీర)

>ఒకే సంగీత దర్శకుడు ఒక ట్యూనునే రెండు వేరే వేరే పాటలకి వాడుతూ - (ఇళయరాజా - అన్వేషణ, అభినందన); (కీరవాణి - అక్టోబర్ 2, ఛత్రపతి)

>ఇలాగే కాక వేరే భాషలోంచి దిగుమతి అయి తెలుగాస్తి అయిన పాటలు - సినిమాల మధ్య ఏ  పోలికా లేకుండా కొన్ని - అసలు  సినిమాలతోనే  సంబంధం లేకుండా ఇంకొన్ని. 

అసలు ఒక్క పద్యంలో చెప్పాలంటే -  మాటలతో ఆడుకునే వెలదినే కానీ ఆటవెలదులు రాయలేను కాబట్టి - ఇదిగో గిద్యంలో చెప్పేశా -

ఆపాట ఈపాట ఒక్కరాగమునుండు
పాడి జూడ మాటల జాడ వేఱు
పాటలందు కవల పాటలు వేరమ్మా 
వీనులవిందే మళ్లిమళ్లి  వినవె భామ! 

కవల-పాటలంటే ఏంటో చెప్పేశాను మరి - నాకు తెలిసిన కొన్నిపాటల-జతల్ని  - నాలాగే పాటలంటే ఇష్టమున్న హితులతో, స్నేహితులతో, సన్నిహితులతో - ఈమెయిళ్లలో, వాట్సాప్పుల్లో, ఫోనుల్లో - టైపు చేసి, చెప్పి - ఆట్టే ఆయాసపడకుండా - నా బ్లాగులో పోస్ట్ చేసేస్తే - ఒక్క పోస్టుకి పలు రీడ్లు - అనేసుకోవచ్చని - సునాయాసపడిపోతున్నాను.

ఆ వరసలో ముందుగా నాకిష్టమైన భావకవి - అందమైన ముగ్గు-గుమ్మల్లా వుండే తెలుగు అక్షరాలమీద నాకు మరింత మక్కువ కలిగేలా చేసిన దేవులపల్లి వారి పాటలు - వేణువుని వెన్నలో ముంచి తీశారా అనిపించేలా వినిపించే పెండ్యాల వారి సంగీతంలో - అపర-జయంతుడు ఎన్టీఆర్, ఆయనకి తెరీడూ-జోడూ అయిన  జమున అభినయించిన ఈ రెండు పాటలూ - (ఒకే సినిమాలో - ఒకే భాషలో - ఆడ పాట, మగ పాట) కి - అద్భుతమైన ఉదాహరణలు.

మొదటి పాటలో - తెలతెలవారుతున్న సమయంలో చలచల్లని గాలి వీస్తుంటే - ఒక ఒద్దికైన అందమైన అమ్మాయి ఏడుకొండలవాడిని స్మరిస్తూ - పాటపాడుతూ - పూజకై పూలు కోస్తుంటే - ఆ పాటకి మెలకువ వచ్చిన అబ్బాయి వచ్చి- ఆ అమ్మాయిని ముచ్చటగా చూడడం - నిజంగా చూడముచ్చటే  ... (వీడియో  కోసమైతే కింద చూడొచ్చు  -  కానీ పాట మంచిగా వినాలంటే : https://www.youtube.com/watch?v=ThPHJ8mYp-o)

తేనె నింపుకున్న గొంతుతో పి. సుశీల పాట - వనలక్ష్మిలా జమున ఆడిన ఆట... 

ఊఁ ... .... ....
నీవుండేదా కొండపై - నా స్వామి - నేనుండేదీ నేలపై
ఏ లీల సేవింతునో  - ఏ పూల పూజింతునో

ఊఁ ... .... ....
శ్రీ పారిజాత సుమాలెన్నొ పూచే  - ఈ పేదరాలి మనస్సెంతో వేచే
శ్రీ పారిజాత సుమాలెన్నొ పూచే  - ఈ పేదరాలి మనస్సెంతో వేచే
నీ పాదసేవ మహాభాగ్యమీవా నాపై నీ దయజూపవా నా స్వామి

నీవుండేదా కొండపై - నా స్వామి - నేనుండేదీ నేలపై
ఏ లీల సేవింతునో  - ఏ పూల పూజింతునో
 
దూరాన నైనా కనే భాగ్యమీవా - నీ రూపు నాలో సదా నిల్పనీవా
ఏడు కొండల పైన వీడైన స్వామి - నాపై నీ  దయజూపవా నా స్వామి 

నీవుండేదా కొండపై - నా స్వామి - నేనుండేదీ నేలపై
ఏ లీల సేవింతునో  - ఏ పూల పూజింతునో


ఆ అమ్మాయిని అనుసరిస్తూ - ఆమె పాటని అనుకరిస్తూ - తమాషా చేస్తూ - అతనుడి లాంటి అతను పాడిన పాట వినాలంటే - కిందనున్న వీడియో చూడాలి మరి.

వెన్నపూస తిని నున్ననైందా అనిపించే ఏ. ఎం. రాజా స్వరం  - కనుబొమల కదలికలోనే  చిలిపిదనం, వలపుధనం కురిపిస్తూ ఎంటీవోడి అభినయం...

నీవుండేదా కొండపై - నాస్వామి - నేనుండేదీ నేలపై 
ఏ లీల సేవింతునో  - ఏ పూల పూజింతునో ... 

- అంటూ మొదలుపెట్టి అబ్బాయి పాడుతుంటే - ఒక చిన్నపాప చేయి పట్టుకుని స్నానం చేయించడానికి వెళ్తోందో ఏమో - భుజమ్మీద తువ్వాలుతో - హఠాత్తుగా ఆగి  -  సిగ్గు పడుతూ కళ్లు మాత్రం ఎత్తి  అతని కేసి చూడబోయిన అమ్మాయి -  నాకైతే - రాబోయే తుమ్మునాపుకున్నట్టనిపించింది.

నీ సిగ్గే సింగారమే ... నీ సొగసే బంగారమే ... 

నీ సిగ్గే సింగారమే - ఓ చెలియా - నీ సొగసే బంగారమే
కనులార గని మెచ్చెనే - ఓ వనలక్ష్మి - మనసిచ్చి దిగివచ్చెనే 
ఉఁహూహూ ... 


ఓ ... ... ...
నీ నవ్వు పూలు అవే మాకు చాలు  - నీ ఒయ్యారాలు అవే వేనవేలు
ఓ పేదరాల - మరే పూజలేల - మాపై నీ  దయజూపవా ఓ నా చెలీ


నీ సిగ్గే సింగారమే - ఓ చెలియా - నీ సొగసే బంగారమే
నీ సిగ్గే సింగారమే

ఓ ... ... ...
మా తోటపూచే వసంతమ్ము నీవే - మా బాట చూసే ప్రభాతమ్ము నీవే
మాలోనకొలువైన మహాలక్ష్మి నీవే - మాపై నీ  దయజూపవా ఓ నా చెలీ 
అక్కా... ...      (అబ్బాయి పాటకి మైమరచిన అమ్మాయి ఉలికిపడేలా - అమ్మాయి చేత జడ వేయించుకుంటున్న చిన్నపాప పిలుపు) 


నీ సిగ్గే సింగారమే - ఓ చెలియా - నీ సొగసే బంగారమే
కనులార గని మెచ్చెనే - ఓ వనలక్ష్మి - మనసిచ్చి దిగివచ్చెనే 
ఊ ఉ ఊఁ ...

బావున్నాయి కదూ ఈ కవలపాటలు?!
ఇలాంటివే ఇంకొన్ని పాటలతో - మరెన్నో కబుర్లతో
నెలలో ఒక వారంలో - ఒక పాటల పోస్టుతో
మీతో నా పాటల సరదా పంచుకోవాలనుకునే

~ పాటలభైరవి