రజతోత్సవాలు అతికించిన బేర్లకూ ఉంటాయి...

సరిగ్గా ఈ రోజుకి పాతికేళ్ల క్రితం
సరిగ్గా ఇదే రోజు...

అది ఓ వర్షం కురిసిన రాత్రి
కిటికీ అవతల చినుకుల చిందులు 
బెంగళూరు వర్షం -
పొద్దున్నే మొదలైన వాన
పొద్దుగూకిన తర్వాత వచ్చిన చుట్టమయింది

కిటికీ కీవల అమ్మాయి మనసులో దిగులు 
అమ్మ మురిపెంగా పెట్టే రెండూ కావాలనిపించాయ్
నాన్నతో కబుర్లాడే వేళలు - నాలుగందాల నవ్వులు గుర్తొచ్చాయ్
ఆటపాటల తోడుండే చెల్లెళ్ళు, చెలులు కళ్ళ ముందు కదిలారు
బెంగటిల్లిన ఆ వేళ వాననీటికి పోటీగా కన్నీటి ధార
అప్పుడా అమ్మాయికి ఎదురుగా మెరుపులా కదిలిన ఓ ప్రేమంత్ర-దండం
పదంటే పది నిముషాల్లో - తెల్లటి చార్ట్ పేపర్ మీద వెలిసిన టెడ్డీ-బేర్ల బృందం

అది చూసిన అమ్మాయి కంట నీరాగి గలగలల నవ్వయింది
అబ్బాయి పెదవి మీద చిట్లిన పగడపు చినుకయింది
ఆ రోజుటి ఆ కాయితపు అతికింపు 
ఈ నాటికి పాతికేళ్ల మురిపెపు జ్ఞాపకమయింది ...
మరి అందుకే చెప్పాలనిపించింది -
రజతోత్సవాలు అతికించిన బేర్లకూ ఉంటాయి- అంటూ...