కాంతార ఛాప్టర్ 1 ... దృశ్యవిధ్వంసం

    దాదాపు మూడేళ్ల క్రితం నేనేం రాశానో ఒక్కసారి గుర్తుచేసుకుంటున్నాను.

    కాంతార... దృశ్య విశిష్టం!

*** *** *** *** *** *** ***

*** *** *** *** *** *** ***

    నిన్న అనగా అక్టోబర్ ఐదవ తేదీన వెళ్లి "కాంతార ఛాప్టర్ 1" చూసి వచ్చాము. 

సినిమా గురించి చెప్పడానికి ఏమీ లేదు

అదొక న-స్మరామి సినిమా. 

అంటే...

ఏం చూశానో గుర్తు లేదు

ఏం విన్నానో గుర్తు లేదు

మాట, పాట ఏమీ గుర్తు లేవు

అసలు సినిమా చూసినట్టే లేదు

    సినిమా బావుందేమో - దాంట్లో బోల్డంత అర్థం, ఇంకా బోల్డంత పరమార్థం వున్నాయేమో - కానీ నా సింప్లెస్టాతిసింప్లెస్టు మెదడుకి - ఏంటో ...ఏమీ అర్థం కాలేదు, ఏ పరమార్థమూ తోచలేదు.

    ఈ సినిమా గురించి చెప్పడానికి ఏమీ లేదు. ఈ prequel కి ముందొచ్చిన దీని sequel తో కలిపి ఏదో ఒకటి చెప్తా. 

*** *** *** *** *** *** ***

*** *** *** *** *** *** ***

    "కాంతార" అసలు థియేటర్లో చూద్దామనే అనుకోలేదు - కానీ రెండుసార్లు వెళ్లి చూసొచ్చాం.

    "కాంతార ఛాప్టర్ 1" గురించి తెలియగానే తప్పకుండా వెళ్లాలి అనుకుని అనుకుని వెళ్లి చూశాము. ఒక్కసారి కూడా ఎందుకొచ్చామురా బాబూ అనుకున్నాం. 

*** *** *** *** *** *** ***

    "కాంతార" చూస్తూ థియేటర్లో మైమరచిపోయాం. 

    "కాంతార ఛాప్టర్ 1" చూస్తూ థియేటర్ మరచి పారిపోదామనుకున్నాం.

*** *** *** *** *** *** ***

    "కాంతార" కథ గురించి "రిషభ్ షెట్టి అనే దర్శకుడు తనకు తెలిసిన కథని తరతరాలకి నిలిచిపోయేలా తెర మీద తీరుగా తెలిపిన కథ." అని రాసుకున్నా.

    "కాంతార ఛాప్టర్ 1" కథ గురించి "రిషభ్ షెట్టి అనే దర్శకుడు తనకు తెలుసనుకున్న కథని తనకు తోచినట్టుగా తీసుకున్న కథ." అని రాసుకుంటున్నా.

*** *** *** *** *** *** ***

    "కాంతార" లో వున్న కథ వెనకాల కథలన్నీ తరచి తరచి చదువుకున్నా.

    "కాంతార ఛాప్టర్ 1" లో వున్న కథే అర్థం కాక - కథ వెనక కథలు వున్నాయో, లేవో కానీ - నాకు వెతికే ఓపిక లేక వూరుకున్నా. 

*** *** *** *** *** *** ***

    "కాంతార" లో పాటలు ఇప్పటికీ వింటున్నా - గొంతు చేర్చి పాడుకుంటున్నా.

    "కాంతార ఛాప్టర్ 1" లో పాటలున్నాయా అని గుర్తు చేసుకోవడానికి ప్రయత్నిస్తున్నా. 

*** *** *** *** *** *** ***

    "కాంతార" లో చెప్పదలుచుకున్న విషయానికి కొంచెం కూడా అటూ-ఇటూ జరగలేదు సినిమా కథ.

    "కాంతార ఛాప్టర్ 1" లో చెప్పదలుచుకున్నా విషయమే లేక అడవుల పట్టిపోయింది సినిమా కథ.

*** *** *** *** *** *** ***

    "కాంతార" లో దొర దేవేంద్ర వచ్చి కుర్చీలో కూర్చుని ఊళ్లో వాళ్లందరినీ హింస పెట్టి చపుతాడు.

    "కాంతార ఛాప్టర్ 1" రాజు కులశేఖరుడు గుఱ్ఱమ్మీదొచ్చి తిరుగుతూ అడవిలో వాళ్లని చంపుతాడు.

*** *** *** *** *** *** ***

    "కాంతార" లో శివని ఒకసారి గుళిగ ఆవహిస్తాడు. అద్భుతంగా అనిపిస్తాడు. 

    "కాంతార ఛాప్టర్ 1" లో బెర్మెని గుళిగ రెండు, మూడుసార్లు ఆవహిస్తాడు. ఆవలింతలు తెప్పిస్తాడు. 

*** *** *** *** *** *** ***

    ఇహ చాలు బాబూ! ఇంత కన్నా చెప్పడానికేమీ లేదు.

    కానీ ఇక్కడ సినిమా కన్నా మహా -ఇంట్రష్టింగు విషయం ఒహటుంది. 

    అదేంటంటే... నాకు ఏదన్నా సినిమా చూడాలనుకున్న తర్వాత ఆ సినిమా చూసే ముందు రివ్యూలు చదవాలనిపించదు. చదవను కూడా. 

    కానీ...బద్రి ఎక్కడో చదివిన రివ్యూలో "కాంతార ఛాప్టర్ 1"  చూసిన తర్వాత కథేంటీ అనడిగితే ఎవరూ చెప్పలేరు అన్నారట ఎవరో. 

    అంత తెలిసీ నాకవేమీ చెప్పకుండా, నేను "కాంతార ఛాప్టర్ 1" చూద్దామనుకోగానే టికెట్లు కొని, ఓ నలభై ఐదు నిముషాలు drive చేసి నాతో సినిమాకొచ్చి, తను కొవ్వొత్తిలా కరిగిపోతుంటే ఆ వెలుగులో - నేను సినిమా చూశానట. 

    ఇది కూడా తనే చెప్పారు. 

    మహాత్యాగి బద్రి!

    అన్నట్టు... నేను సినిమా చూస్తూ - తెర మీద ఏం జరుగుతోందో ఏమీ అర్థం కాని ఒకానొక అయోమయ క్షణంలో - ఒకసారి అసలు బద్రి ఎలా చూస్తున్నారా ఈ సినిమా అని - తల తిప్పి చూస్తే - తను నవ్వుతూ నాకేసి చూస్తుండేసరికి - నాకు ఇంకా అయోమయంగా అనిపించింది. 

    మొదలైందగ్గర్నుంచి ఎప్పటికప్పుడు ఇప్పటి కన్నా ఇకముందు బావుంటుందేమో అనుకుంటూ  - ఎప్పటికీ బాగుండేలా అనిపించక - ఎప్పటికి అవుతుందో అనుకుంటూ -  సినిమా మొత్తం చూసి లేచి వస్తుంటే చివర్లో "అదింకో దంతకథ" అన్న మాట విని, ఆ వెంటనే "కాంతార ఛాప్టర్ 2" అన్న రాత చదివి - "దొంతర్ల కొద్దీ దంతకథలెన్ని తీసినా ఇక థియేటర్‌కి రానేరాము" అని ఒట్టు పెట్టుకుని మరీ బయటికొచ్చాము. 

    మామూలుగా అయితే ఏదైనా సినిమా చూశాక ఇంటికి తిరిగి వస్తూ - ఇల్లు చేరే దాకా - ఆ సినిమా గురించి మాట్లాడుకుంటూ వుండే మేము - మాట్లాడుకోడానికి ఏమీ లేక, అస్సలు మాట్లాడుకోకుండా వున్నది ఈ  "కాంతార ఛాప్టర్ 1"  సినిమాకే. 

*** *** *** *** *** *** *** 

చివరాఖరిగా ఓ రెండో, మూడో మాటలు...

ఇప్పటికి - అప్పుడు

కాంతార... దృశ్యవిశిష్టం

కావాలని మరీ - రెండుసార్లు చూశా

ఇప్పటికి - ఇప్పుడు

కాంతార ఛాప్టర్ 1 ... దృశ్యవిధ్వంసం

కావాలని - చూసినదే మర్చిపోయా

ఇప్పటికి - ఎప్పుడో...

కాంతార ఛాప్టర్ 2... దృశ్యవిముక్తం

కావాలని అనుకోను - చూడను

~ ఇట్లు,

సినీ-మా-లక్ష్మి 

బేరు...బేరు...బెంబేరు!

    మే నెలలో అస్సలు మంచిదే కాని ఒక కారణానికి భారతదేశం వెళ్ళాల్సి వచ్చింది. జూన్ పదో తేదీకి మళ్ళీ వెనక్కి వచ్చేశాను. 

    ఏదో చెప్పలేని చికాకు, ఏమీ చెయ్యలేని విసుగు. 

    ముళ్ళపూడినీ, P. G. Wodehouse నీ మార్చి మార్చి చదువుకుంటూ, కృష్ణగీత మననం చేసుకుంటూ, నడకలో పగళ్లనీ - నిద్రలో రాత్రులనీ కొలుచుకుంటూ - ఆఫీసు పని కూడా అన్యమనస్కంగా జరుపుకుంటున్న రోజులవి. 

    ఈలోగా అందరూ ఆహా-ఓహో అంటున్న సినిమా విశేషాలు యూట్యూబ్‌లో కనిపించాయి. 

    కాలక్షేపానికి ఎప్పుడు టీవీ పెట్టినా తెర నిండా నాగార్జున, ధనుష్, దేవిశ్రీప్రసాద్, వాళ్లతో పాటు ఎక్కడ చూసినా దర్శకుడు శేఖర్ కమ్ములతో ముఖా-ముఖీ కార్యక్రమాలు. 

    నాకూ కొంచెం ఆసక్తీ, ఆశా కలిగాయి. 

    అంతటి అనుభవం వున్న కథానాయకుడు నాగార్జునే గొప్పగా వచ్చింది సినిమా అంటున్నాడు. ధనుష్షుని సెట్లో పోల్చుకోలేనంత అద్భుతంగా వున్నాడూ అని కూడా చెప్పాడు. ఇంకా విలేఖరులు, సినిమా నిర్మాతలూ సినిమా గురించి ఒక కళాఖండమన్నట్టు పరవశంతో మాట్లాడుతున్నారు. 

    దాంతో ఈ సినిమా ఎలా తీశారో అన్న ఆసక్తీ,  దీన్ని చూస్తే కొంచెమన్నా వేరే విషయాల మీదకి మళ్లి  -  మనసులో వున్న చికాకు తగ్గుతుందన్న ఆశా కలిగాయి నాకు. 

    ఓ రోజు సాయంత్రపు నడకలో బద్రీని అడిగాను "బావా! కుబేర సినిమాకి వెళ్దామా?" అని. 

    సినిమా అన్న మాట నా నోట్లోంచి పూర్తిగా రాకుండానే టికెట్లు కొనేసే బద్రి ఆ రోజు మాత్రం - చాలా క్లుప్తంగా "వద్దు" అన్నారు. 

    అంతే ! అక్కడితో ఆ ప్రశ్నోత్తరాల కార్యక్రమం ముగిసి మిగిలిన దారంతా వేరే కబుర్లతో కొలిచి ఇంటికొచ్చేశాం. 

*** *** *** *** *** *** ***

*** *** *** *** *** *** ***

    సరే! థియేటర్‌కి వెళ్లకపోతే ఏమయ్యింది OTT లో రాకపోదా, నే చూడకపోతానా అనుకున్నాను. 

    అనుకున్నట్టే నిన్న - అంటే జులై 18వ తేదీన - Prime లో "కుబేర" వస్తుందని తెలిసింది. ఇక బద్రీ, నేనూ మా శుక్రవారపు సాయంత్రానికి ఆట్టే వెతుక్కోకుండా ఓ సినిమా దొరికిందని ముర్సిపోయాం. 

    రాత్రి తొమ్మిదింటికి చూడడం మొదలు పెట్టాము. 

    మధ్యలో ఆపుతూ, ఇక ఆపేద్దామనుకుంటూ, మొదలెట్టాం కదా ఆపకుండా చూసేద్దామనుకుంటూ - మొత్తానికి రాత్రి పన్నెండున్నర దాకా కూర్చుని సినిమా చూడడం పూర్తి చేశాం. 

    సినిమా అయ్యాక - 'ఒక వేళ ఈ సినిమా చూడడానికి థియేటర్‌కి వెళ్లి వుంటే ఏం చేసేవాళ్లమా?' అని మాకు మేమే ఒక ప్రశ్న వేసుకున్నాము. 

    ఆ ప్రశ్నకి మా ఇద్దరికీ ఏకగ్రీవంగా తట్టిన సమాధానం - "కుబేర" ఇచ్చిన యాచక-స్ఫూర్తితో  - ఆ సిన్మాహాలువాడుగారి దగ్గరికి వెళ్లి - 'బాబ్బాబూ... మమ్మల్ని ఇంటికి పంపించెయ్‌రా బాబూ!' అని అ*క్కునేవాళ్లం.

    మొత్తానికి "కుబేర" బెంబేరెత్తించి - బేరుమనిపించింది. 

*** *** *** *** *** *** ***

*** *** *** *** *** *** ***

    సినిమా తెర మీద చాలా చెత్త కనపడుతుంది. చెత్త అంటే నిజంగా చెత్త. 

    సినిమా మొదలైందగ్గర్నుంచీ ఎక్కడో అక్కడ చెత్త అంటే trash కనబడుతూనే వుంటుంది.

    చివరాఖరికి వచ్చేటప్పటికి అందరూ ఆహా-ఓహో అన్న real location shooting ఇదేనా అనిపించింది. 

    చాలా వరకు సినిమా నేను కళ్ళు మూసుకునే చూశాను. 

    చాలా హింస కూడ వుంది సినిమాలో - పిల్లల మీదా, ఆడవాళ్ల మీదా. 

    సినిమా చూస్తున్నంత సేపూ బోల్డన్ని లాజిక్కు లేని సీనులు - మాట్లాడుకోవడం కూడా అనవసరం. 

    అన్నట్టు రష్మిక మీద తీసిన ఓ సరదా పాటేదో OTT లో ఎత్తేశారు. 

    OTT లో వుంచిన ఒకే ఒక్క ("పోయిరా మామా!) పాటలో సందర్భశుద్ధి లేని expressions తో రష్మికతో కూడా నాలుగు స్టెప్పులు వేయించారు. 

    ఇహ ఇందులో చెప్పుకోవడానికి ఏమీ లేదు. 

    కొట్టుకోవడం, పొడుచుకోవడం, పేల్చుకోవడం, కాల్చుకోవడం, ఇంకా చెప్పలేని హింసలతో  కూడుకున్న ఈ సినిమా నిజ్జంగా "కళా-ఖండనమే"! 

    ఏదేమైనా చాలా రోజుల తర్వాత నా చేత బ్లాగ్ రాయించింది. 

~ సినీ-మా-లక్ష్మి

 

స్మర వారం వారం ...సంక్షేపరామాయణం - 24

  క్రిందటి శ్లోకం / Previous slOkaH:  స్మర వారం వారం ...సంక్షేపరామాయణం - 23

*** *** *** *** *** *** ***

*** *** *** *** *** *** ***

శ్లోకం - 24

స జగామ వనం వీరః

ప్రతిజ్ఞామనుపాలయన్

పితుర్వచననిర్దేశాత్

కైకేయ్యాః ప్రియకారణాత్

*** *** *** *** *** *** ***

*** *** *** *** *** *** ***

ప్రతిపదార్థాలు

సః  జగామ  వనం  వీరః

ప్రతిజ్ఞాం  అను-పాలయన్

పితుః  వచన-నిర్దేశాత్

కైకేయ్యాః  ప్రియ-కారణాత్

సః  వీరః = ఆ వీరుడు (రాముడు)

ప్రతిజ్ఞాం = ఇచ్చిన మాటని 

అనుపాలయన్ = అమలు చేయడానికి

పితుః వచన-నిర్దేశాత్ = పితృవాక్య పరిపాలనకై

కైకేయ్యాః = కైకేయికి

ప్రియ-కారణాత్ = ప్రియం కలిగించాలనే కారణమునకై

వనం = అడవికి 

జగామ = వెళ్లాడు

*** *** *** *** *** *** ***

*** *** *** *** *** *** ***

అర్థం: 

    ఆ వీరుడు (రాముడు) ఇచ్చిన మాటని అమలు చేయడానికి పితృవాక్య పరిపాలనకై, కైకేయికి ప్రియం కలిగించాలనే కారణమునకై అడవికి  వెళ్లాడు.

*** *** *** *** *** *** ***

*** *** *** *** *** *** ***

श्लोकः - 24

स  जगाम  वनं  वीरः 

प्रतिज्ञामनुपालयन् |

पितुर्वचननिर्देशात् 

कैकेय्याः  प्रियकारणात् ||

*** *** *** *** *** *** ***

*** *** *** *** *** *** ***

Word to word meaning:

सः   जगाम  वनम्  वीरः 

प्रतिज्ञाम्  अनु-पालयन्  |

पितुः  वचन-निर्देशात् 

कैकेय्याः  प्रिय-कारणात् ||

सः  वीरः = That hero (Rama)

प्रतिज्ञाम्  = the pledge (the word given)

अनु-पालयन्  = in order to keep

पितुः  वचन-निर्देशात्  = in obedience to his father's command

कैकेय्याः  = to Kaikeyee

प्रिय-कारणात् = for the reason of giving pleasure

वनम् = to the forest

जगाम = went

*** *** *** *** *** *** ***

*** *** *** *** *** *** ***

Meaning in English

 

    That hero (Rama), in order to keep the word given in obedience to his father's command and for the reason of giving pleasure to Kaikeyee, went to the forest.

*** *** *** *** *** *** ***

*** *** *** *** *** *** ***

To be continued....స్మర వారం వారం ...సంక్షేపరామాయణం - 25, 26

స్మర వారం వారం ...సంక్షేపరామాయణం - 23

 క్రిందటి శ్లోకం / Previous slOkaH:  స్మర వారం వారం ...సంక్షేపరామాయణం - 18, 19, 20, 21, 22

*** *** *** *** *** *** ***

*** *** *** *** *** *** ***

శ్లోకం - 23

స సత్యవచనాద్రాజా 

ధర్మపాశేన సంయతః

వివాసయామాస సుతం 

రామం దశరథః ప్రియం

*** *** *** *** *** *** ***

*** *** *** *** *** *** ***

ప్రతిపదార్థాలు

సః  సత్య-వచనాత్  రాజా 

ధర్మ-పాశేన  సంయతః

వివాసయామాస  సుతం 

రామం  దశరథః  ప్రియం

సత్య-వచనాత్  = సత్య వచనముల వల్ల

ధర్మ-పాశేన = ధర్మపాశమునకు 

సంయతః = బద్ధుడై

సః  రాజా దశరథః = ఆ దశరథ మాహారాజు

ప్రియం సుతం రామం = ప్రియసుతుడైన రాముడిని

వివాసయామాస = రాజ్యం నుంచి బహిష్కరించాడు (వనవాసానికి పంపించాడు)

*** *** *** *** *** *** ***

*** *** *** *** *** *** ***

అర్థం: 

    సత్య వచనముల వల్ల (రాణి కైకేయికి ఇచ్చిన మాట వల్ల) ధర్మపాశమునకు బద్ధుడై ఆ దశరథ మాహారాజు ప్రియసుతుడైన రాముడిని రాజ్యం నుంచి బహిష్కరించాడు (వనవాసానికి పంపించాడు)

 

*** *** *** *** *** *** ***

*** *** *** *** *** *** ***

श्लोकः - 23

स  सत्यवचनाद्राजा 

धर्मपाशेन  संयतः |

विवासयामास  सुतं 

रामं  दशरथः  प्रियम् ||

*** *** *** *** *** *** ***

*** *** *** *** *** *** ***

Word to word meaning:

सः   सत्य-वचनात्  राजा 

धर्म-पाशेन  संयतः |

विवासयामास  सुतम् 

रामम्   दशरथः  प्रियम् ||

 सत्य-वचनात्  = As he spoke the truth

धर्म-पाशेन  = by the ties of Dharma

संयतः  = bound

सः  राजा  दशरथः = that King Dasaratha

प्रियम्  सुतम्   रामम्   = his beloved son Rama

विवासयामास = exiled

*** *** *** *** *** *** ***

*** *** *** *** *** *** ***

Meaning in English

    Having spoken the truth (by the word given to the Queen Kaikeyee), bound by the ties of Dharma, that King Dasaratha exiled his beloved son Rama (sent him to live in forests).

*** *** *** *** *** *** ***

*** *** *** *** *** *** ***

To be continued....స్మర వారం వారం ...సంక్షేపరామాయణం - 24

కాఫీ విత్ కలిమి - 8 - ఒమాప్ర - పమాజ

    

    ఇంతకు ముందు చెప్పిన బోల్డన్ని కలిమితో కబుర్లు

1. కాఫీ విత్ కలిమి - 1 - ఫస్ట్ సిప్
2. కాఫీ విత్ కలిమి - 2 - రెలిజియన్, పాలిటిక్స్, గ్రేట్ పంప్కిన్ ....అదే వరసలో... పిల్లలూ, ఫిల్ములూ...
3. కాఫీ విత్ కలిమి - 3 - "కలి-మి"తో కబుర్లు
4. కాఫీ విత్ కలిమి - 4 - టీనేజ్ vs. బీనేజ్
5. కాఫీ విత్ కలిమి - 5 - అనగా వంచించారు - తినగా వంచినచారు
6. కాఫీ విత్ కలిమి - 6 - హింసధ్వని విని ఆయె హంసానంది!
7. కాఫీ విత్ కలిమి - 7 - A friend in teens is a friend in beens అన్న ఓ Guyయాళి

*** *** *** *** *** *** ***

*** *** *** *** *** *** ***

ఆ హోటల్మేడలో 

ఇరవైనాలుగో అంతస్తులో

ఇరునాలుగుల గదిలో...

నింగిలో చూపు సారించినంతటా కమ్ముకున్న నల్లనల్లని మొయిళ్లు

నేల మీద చూపానినంత మేరా పరచుకున్న నీలినీలి సంద్రపు నీళ్లు

ఆ నీటి మధ్య దీపాల దీవిలా మెరుస్తున్న అంతస్తుల మేడలు

ఆ నింగినీ - ఈ నేలనీ

మేడల కొమ్మున వేలాడే మిలమిలలాడే దీపాల దండల్నీ

కనులెదుట చిత్తరువులా నిలిపింది

నిలువెత్తు కిటికీ అద్దం...

చూపుకందినవి చేతికందక 

గాలి సోకనీయని గాజు తెరల మాటున

ఒంటికంబపు మేడలో చిక్కిన చిలకప్రాణంలా వుంది నా పరిస్థితి...

"కభీ తన్‌హాయియోం మే యూఁ

హమారీ యాద్ ఆఏగీ...

అంధేరే చా రహే హోంగే

కి బిజ్‌లీ కౌంధ్ జాఏగీ..."

ముబారక్ బేగం - ఓ... తెగ - పెదవుల మీద మూగి మోగిపోతోంది.

అప్పుడు మోగింది నా చేతిలో వున్న ఫోన్ - కలిసొచ్చే కాలానికి కలిమితో కబుర్లన్నట్టు. 

    ఇహ ఇవాళ్టి నా blog కబుర్లు... ఆరోజు  - కలిమితో  - మాటాడుకున్న - మాటలతో ఆడుకున్న  కబుర్లు...

    "హలో! ఎలా వున్నావ్? ఏం చేస్తున్నావ్?"

    "నేను బావున్నా. నువ్వూ?"

    "నేనూ బాగుగానున్నానూ...బాగుగానూ, నున్నగానూనూ" 

    "నువ్వు మరీనూ... నువ్వు నున్నేంటీ?"

    "నేన్నున్న కాక సన్నేంటీ? అద్సరే గానీ... మధ్యాహ్నం రెండయ్యింది....ఏమన్నా తిన్నావా?"

    "హ్మ్... తింటున్నా"

    "ఏం తింటున్నావ్?"

    "అన్నం"

    "ఏం వేసుకునీ?"

    "పచ్చడి"

    "ఏం పచ్చడీ?"

    "ఆవకాయ"

    "అబ్బా! 'ఏమన్నా తిన్నావా?' అన్న ప్రశ్నే సవివరముగా వివరింపుము అన్నట్టు లేదూ? దానికెంతైనా చెప్పొచ్చు కదా! అలా  అడిగితే ఒక్క వాక్యంలో 'ఇప్పటి దాకా తినలేదూ, ఇప్పుడే నీ ఫోన్ వచ్చేముందే మొదలుపెట్టి ఆవకాయ కలుపుకుని అన్నం తింటున్నాన'ని  చెప్పొచ్చు కదా?! ఇలా బిట్టు పేపర్లో సమాధానాల్లా ఒమాజలు ఇస్తావేంటీ?"

    "ఒమాజలు...? అంటే?"

    "ఓ పద్నిమిషాలు పోనీ...నీకే అర్థమౌతుంది. నేను ఫోన్ చేసి ఏమడుగుతానో, దానికి ఏం జవాబిస్తే దానికి ఇంకేమంటానో, ఎందుకొచ్చిన తలనొప్పని ముందే ఆలోచించుకుని - నేనేదడిగినా ఒక్కటంటే ఒక్క మాటలో మాత్రం బదులిద్దామనుకున్నట్టున్నావ్ కదూ!"

    "ఛా...అలా ఏం కాదు."

    "ఆ 'ఛా' అని ఒత్తి పలకడంలోనే తెల్సిపోతోంది - అది అలానే అని"

    "నువ్వైతే ఎలా చెప్తావు తల్లీ?"

    "నేనా...?! ఒక మార్కు ప్రశ్నక్కూడా పది మార్కుల జవాబు రాసే రకం"

    "క్లుప్తంగా చెప్తే బావుంటుందని. నువ్వే అంటుంటావు కదా Beauty lies in simplicity అని." 

    "అంటుంటాలే - కానీ అవి నా మాటలు కాదు. ఎవరో అన్నవి. నచ్చాయని అంటుంటా.  నేనైతే 'క్లు...కు....మీ...తె....' అంటా"

    "హహ్హహ్హహ్హా! "క్లు...కు....మీ...తె...." అంటే...?"

    "అంటే క్లుప్తత కుత్తుక మీదికి తెస్తుంది? నీకు చీమ కథ తెలుసు కదా?"

    "ఏ చీమ కథా?"

    "అనగనగా ... అనేకానేక చీమల్లో ఓ అనామక చీమ. శివుడాజ్ఞ లేందే కుట్టలేకపోతున్నానని కోపమొచ్చి ఆ శివుడి తోనే తేల్చుకుందామని తపస్సు చేసింది. శివయ్యొచ్చి 'చీమా ...చీమా ...! ఏం కావాలీ?' అనడిగితే బెట్టుకి పోయి క్లుప్తంగా 'కుట్టాలీ, చావాలీ' 'అంది. శివయ్య 'అలాక్కానీ' అన్నాడు. అంతే! అప్పటికప్పుడు కంటిక్కనిపించి-కాలికడ్డొచ్చినవాణ్ణొకణ్ణి కుట్టింది. వాడు చెయ్యెత్తి-చెళ్లున-చరిస్తే కిక్కురుమనకుండా టిక్కుమంది. అదే ఆ పిచ్చిమొహం చీమ అంత పోజు కొట్టకుండా 'నేను కుట్టాలీ, నే కుట్టినవాడు చావాలీ'' అనుంటే అంతటి చీమా అప్పట్నుంచీ ఇప్పటిదాకా బోల్డుమందిని కుట్టుకుంటూ బతికిపోయేది కదా? 

    "హహ్హహ్హహ్హా! భమే బావుంది నీ చీమ-కథ. అవునూ... ఇంతకీ నువ్వు తిన్నావా?"

    "నేనా...నేను ఇవాళసలే పొద్దున్న బ్రేక్‌ఫాస్ట్ చెయ్య లేదు. బాగా ఆకలేస్తోందని కొంచెం తొందరగా పదకొండింటికే భోంచేసేద్దామని అనుకున్నానా? అనుకోకుండా ఆఫీసు కాల్ ఒకటి బాగా సాగి అదయ్యేటప్పటికి దాదాపు పన్నెండున్నరైపోయింది. పోనీ అప్పుడైనా తిందామనుకుంటే ఇంతలో ఇంట్లో కిచెన్ సింక్ కుళాయి బాగు చెయ్యటానికి - అంటే అచ్చంగా ఇవాళే బాగు చెయ్యడానికి కాదూ - అసలు బాగు చెయ్యడానికి ఎంతవుతుందో ఎస్టిమేట్ ఇవ్వడానికి ప్లంబర్ ఒకతను వచ్చాడు. అతను అటు ఒంగీ, ఇటు ఒంగీ - ఆ కుళాయిని ఇటు వంచీ, అటు తిప్పీ అన్ని కోణాల్లోంచి పరీక్ష చేసి అదింక బాగుపడదూ, ఏ హోండిపోకో వెళ్లి కొత్తది తెచ్చుకున్నాక కబురు చెయ్యి , అప్పుడొచ్చి ఈ పాతది తీసి ఆ కొత్తది బిగించడానికి ఎంతవుతుందో చెప్తా అని చెయ్యూపి వెళ్లిపోయాడు. అప్పటికి గడియారం ముళ్లు పెద్దదీ, చిన్నదీ కూడా ఒకటి మీద ఒకటిగా కలిసిపోయాయి. అంటే అర్థమయింది కదూ...ఒంటిగంట దాటి ఐదు నిముషాలయింది. అంటే నీ కర్థం కాదని కాదూ...M.S. చేశావు, ఆ మాత్రం తెలీకుండా వుంటుందా? ఇంతకీ ...నువ్వడిగిన దానికి నేనింకా జవాబు చెప్పనేలేదు కదూ! ఇంకప్పటికి ఆకలి కూడా అటకెక్కినట్టనిపించింది - ఓ అరటిపండు తిని ఓ కప్పుడు పాలు తాగాను. అదీ నా భోజనం ఈ పూటకి."

    "ఊఁ "

    "హహ్హహ్హ! ఇంతవరకు చెప్పిందంతా అర్థమయిందని 'ఊఁ' అన్నావా? లేకపోతే ఇప్పటికైనా ఆపానని 'ఊఁ' అని నిట్టూర్చావా?"

    "నువ్వు మరీనూ...నీతో మాట్లాడుతుంటే ఊపిరి తీసుకోవడానికే gap ఉండదు - ఇంక నిట్టూర్పుల మాటెక్కడా?"

    "అవునూ...నువ్వు గమనించావా?"

    "ఏంటి?"

    "అదే ... 'నువ్వు తిన్నావా?' అన్న నీ చిన్ని ప్రశ్నకి 'అవునూ, కాదూ' అని ఒక్క మాటలో జవాబు చాలు కదా? కానీ అతి-సంకల్పిత-ప్రతీకారచర్యలా ఇంత పొడుగున పమాజ చెప్పా"

    "పమాజ...అంటే?"

    "అంటే...నీది ఐదు మార్కుల ప్రశ్నకి ఒమాజ ఐతే నాది ఒక మార్కు ప్రశ్నకి పమాజ."

    "అర్థం కాలే!"

    "అంటే ...ఇప్పుడు ఎవడైనా నన్ను మల్టిపుల్ చాయిస్ ప్రశ్నకి సమాధానం రాయమని అడిగాడనుకో...

ప్రశ్న: అన్నం తిన్నావా? 

ఆప్షన్ ఎ) తిన్నా, 

ఆప్షన్ బి) తింటా, 

ఆప్షన్ సి) తినబోతున్నా 

ఆప్షన్ డి) నన్ అఫ్ ది ఎబౌ

    నేనేం చేస్తానో తెలుసా 'ఆప్షన్ డి) నన్ అఫ్ ది ఎబౌ' మీద టిక్కు పెట్టి ఆ ప్రశ్నకి పైనా కిందా వున్న ఖాళీల్లో నేనా పైన చెప్పిందంతా ఇరికించి ఇరికించి మరీ రాస్తా. అడిగినవాడు తిండీ-తిప్పలు మర్చిపోయి నానుంచి తప్పించుకోవడానికన్నట్టు కుదిరితే తీర్థయాత్రకి , కుదరకపోతే తీహార్ జైలుకైనా వెళ్లిపోవడానికైనా సిద్ధపడి అడ్డదారిలో పరిగెట్టుకుని పారిపోతాడు."

    "హహ్హహ్హ....నువ్వున్నావే !"

    "ఆ...ఆ...వున్నానూ, వుండాల్సిందాననూనూ" 

    "ఇప్పుడర్థమైందిలే ! అందరూ పదిమార్కుల ప్రశ్నకి ఒక మార్కొచ్చే జవాబు రాస్తే నువ్వు మాత్రం ఒకమార్కు ప్రశ్నక్కూడా పదిమార్కుల జవాబు రాస్తానంటావ్, అంతేనా?"

    "అంతే...అంతే...ఈ రోజుకి ఈ ప్రసారం సమాప్తమంతే ...మళ్లీ ఇంకెప్పుడైనా మాట్లాడుకుందామంటే ఫర్వాలేదంటావా ఐతే?!"

    "సరే...  సరే ... నువ్వలా అంటే నేను 'ఊఁ' అంటానంతే"

    "Bye మరి!"

    "Bye...Bye"

చివరాఖరి సిప్పు:

Thank You,  Life,  for the kind of teacher you are! ~meSayIt

చేవ గలిగిన దర్శకుడు కన్న కల - ఛావా

 ఊళ్ళో వున్నా

ఊరికెళ్ళినా

ఉన్న ఊళ్ళో

ఓ మంచి సినిమా వుందీ అంటే

ఊసుపోని వేళేదైనా కుదిరిందంటే

ఉన్నపళంగా వెళ్దాం-వెళ్దామనుకుంటూ

ఉరుకులపరుగుల మీద సినిమాకెళ్ళేవాళ్ళని 

ఏమంటారు?

సినీ-మా-రాజపోషకులంటారు అనుకుంటే

అందులో మొదటివరసలో వుండేదెవరనుకుంటున్నారు?

మేమే!

*** *** *** *** *** *** ***

*** *** *** *** *** *** ***

    బద్రి ఆఫీసు పని కోసమని నార్ఫోక్ (Norfolk, Virginia) కి వస్తుంటే ఒక్కదాన్నీ ఇంట్లో వుండలేక నా వర్క్ లాప్టాపూ, బ్లాగ్ లాప్టాపూ, నా సంస్కృతం పుస్తకాలూ, ఇంకా టైముంటే చదువుకోవడానికి తెలుగూ-ఇంగ్లీషు పుస్తకాలు - ఇవన్నీ pack చేసుకుని నేనూ తనతో వచ్చేశా క్రిందటి ఆదివారం అంటే ఫిబ్రవరి 9వ తారీఖు. మళ్ళీ 23వ తేదీన ఆదివారం ఇంటికి తిరిగి వెళ్తాం. 

    బద్రీకి ఇక్కడ శని-ఆదివారాలు కూడా సెలవు లేదు అని చెప్పారు. కానీ ఆదివారం (2/16) రోజు సాయంత్రం నాలున్నరకల్లా ఆఫీసు పనైపోయిందని హోటల్ రూంకి వచ్చేశారు తను. 

    వస్తూనే "తొందరగా రెడీ అవ్వు, పది నిముషాలు నడిచి వెళ్తే ఒక మాల్లో 'ఛావా' సిన్మా వుంది. చూసొద్దాం పద" అన్నారు. 

    తనా మాటన్న తొమ్మిదో నిముషంలో రోడ్డుమీద నడుస్తున్నాం. 

    అంతలో నాకే అనిపించింది ఇప్పుడు సినిమాకి వెళ్ళకపోతే ఏం అని? అంటే సినిమా చూడడం మానేద్దామని అనుకుంటున్నానని కాదు  ఏదో కొంచెం మొహమాటపడ్తున్నట్టు అనిపిద్దామని, కనిపిద్దామని అంతే! 

    అదే మాట బద్రీతో అంటే "నువ్వు నార్ఫోక్‌లో సినిమా మళ్ళీ ఎప్పుడు చూడాలీ?! పద పద" అన్నారు.

    ఎంతైనా "మనసెరిగినవాడు ..." కదా! 

    అందుకే తన "పద-పద"కి నేను "సరి-సరి" అన్నా!

*** *** *** *** *** *** ***

*** *** *** *** *** *** ***

    Apple maps పెట్టుకుని Norfolk Downtown లో వున్న Mac ArThur - Regal Crown Club అనే సినిమా హాలుకి వెళ్ళి  - పతీ-సమేత-ముగా (అనగా సినిమా హాల్లో నా మేతకి కొనుక్కున్న చిప్స్‌తో సహా) - ఎక్కే  ప్రతి మెట్టు మీదా కుడికాలు పెట్టి ఎక్కుతూ వెళ్ళి సీట్లో కూర్చున్నాను. 

    మేమెళ్లినప్పుడు అక్కడక్కడా కూర్చున్నవాళ్ళు కొంతమంది మాత్రమే కనిపించారు. ఇంత చలిలో, ఈ డౌన్టౌన్ సినిమాకి ఎవరొస్తార్లే అనుకుంటూ వున్నాం. 

    ఇంతలో "ఆపణ్ కసే ఆహత్?" అంటూ ఒకరినొకరు పలకరించుకుంటూ, మరాఠీలో పరామర్శించుకుంటూ బోల్డంత మంది సకుటుంబ-సపరివార-స"మేత"-సహితంగా  - పెద్దపెద్ద పాప్‌కార్న్ టబ్బులు, పెప్సీ-కోక్ డబ్బాలు పట్టుకుని బిలబిల్లాడుతూ వచ్చి కూర్చున్నారు. 

    సిన్మా-హాలుకే మాటలొచ్చి వున్నట్లైతే "నేనేనా  ఇంత నిండిందీ - ఇలా నిండి ఎన్నిరోజులయ్యిందో ?!" అని గాఠి...గా హా-శ్చర్యపడిపోయేంతగా నిండిపోయింది. 

*** *** *** *** *** *** ***

*** *** *** *** *** *** ***

    "ఛావా" సినిమా పేరు వినగానే ఇదెక్కడి మాటా, దీని అర్థం ఏంటా అని వెతికితే "సింహం పిల్ల" అని కనిపించింది. సంస్కృతంలో "శావః" లేక "శావకః" అంటే కూడా అదే అర్థం. 

    అంటే సింహం ఒక్కదానికే కాదు ఏ జంతువుకి cub అయినా అది శావః / శావకః అనే పిలవబడుతుంది. ఆ 'శావః' కి హిందీ / మరాఠీ వాడుక పదం 'ఛావా' అయుంటుంది.  

*** *** *** *** *** *** ***

*** *** *** *** *** *** ***

    ఇప్పటిదాకా సినిమాకి ఎలా బయల్దేరామో, పేరు వెనకాల భాషా-భావ-విశేషాల గురించి ఏమాలోచించానో చెప్పడం అయిపోయింది. 

    ఇప్పుడు అసలు సినిమా చూశాక నాకు ఏమనిపించిందో చెప్తా.  

*** *** *** *** *** *** ***

*** *** *** *** *** *** ***

    "ఛావా" సినిమా ఛత్రపతి శివాజీ మహారాజు కొడుకు ఛత్రపతి శంభాజీ మహారాజు గురించి. 

    ఈ సినిమా కథకి ఆధారం శివాజీ సావంత్ అనే ఆయన రాసిన మరాఠీ నవల "ఛావా" అట. 

    ఒకవేళ ఆ నవల నేను చదవగలిగిన తెలుగు లోనో, ఇంగ్లీషు లోనో వున్నా కూడా నేను పూర్తిగా చదవలేనేమో. 

    (హంపీ-విజయనగరం అంటే ఇష్టమని అప్పుడెప్పుడో కొనిపించుకున్న A Forgotten Empire Vijayanagar ఇప్పటిదాకా చదవడం పూర్తి చేయలేకపోయాను - అందులో వున్న యుద్ధాలూ, రక్తపాతాల వర్ణనల వల్ల. ఇక ఈ "ఛావా" అయితే అస్సలు చదవనేలేను. దాదాపు పావు భాగం సినిమా కళ్లు మూసుకుని చూశాను.) 

    ఈ సినిమాలో నేను గుర్తు పట్టిన నటులు - వికీ కౌశల్, రష్మిక మందన్న, దివ్యా దత్తా, అశుతోష్ రాణా, ప్రదీప్ రావత్, డయానా పెంటీ. 

    సినిమాలో వచ్చే నటుల పేర్లలో అలోక్ నాథ్ పేరు చూశాను. కానీ ఇప్పటికీ అతని పాత్ర ఏదో గుర్తు కూడా రావట్లేదు. OTTలో వచ్చినప్పుడు సావకాశంగా చూస్తే కనిపిస్తాడేమో!

    సినిమా సగమైపోయి బద్రి చెప్పేదాకా తెలీలేదు - ఔరంగజేబు ఎవరో! అక్షయ్ ఖన్నా అని తెలిశాక నిజ్జంగా ఆశ్చర్యపోయా! 

    నాకు పేర్లు తెలిసి సినిమాలో గుర్తు పట్టిన నటులూ, పేరు తెలిసినా గుర్తు పట్టలేని అలోక్ నాథూ, బద్రి పేరు చెప్పాక గుర్తు పట్టిన అక్షయ్ ఖన్నా, ఇంకా పేర్లు కూడా తెలియని మిగిలిన నటులూ - అందరూ ఎంత బాగా నటించారంటే  - జరిగిపోయిన కథేదో కళ్ల ముందు కనిపిస్తున్నట్టే అనిపించింది. 

*** *** *** *** *** *** ***

*** *** *** *** *** *** ***

    ఇహ పోతే "ఛావా" సినిమాలో నాకు నచ్చిన విషయాలు:

    1. శంభాజీ మహారాజు మరాఠా సైన్యంతో బర్హన్‌పూర్ మీద దాడి చేసినప్పుడు అక్కడున్న ఔరంగజేబు సైన్యం మరాఠా సైన్యం కోట లోకి ప్రవేశించకుండా చెక్క దూలాల్లాటివి అడ్డం వేస్తారు. వాటి మధ్య ఖాళీలు వుండడం వల్ల మరాఠా సైనికుల గుఱ్ఱాలు వాటి మీద ఎక్కి రాలేవని. కానీ కొందరు మరాఠా సైనికులు జఱ్ఱున జారుకుంటూ ఆ చెక్క దూలాల కిందకి దూరి ఆ దూలాల మధ్య నున్న ఖాళీలన్నింటినీ తమ చేతుల్లో వున్న డాళ్లతో (అంటే shields) కప్పేస్తారు. అప్పుడు గుఱ్ఱాల మీదున్న మిగిలిన మరాఠా సైనికులు సులువుగా ఆ డాళ్ల మీదుగా దాటి వెళ్లి అవతల పక్కనున్న మొఘల్ సైనికులతో యుద్ధం చేస్తారు. ఇది చాలా బాగా చిత్రీకరించారు. 

    2. శంభాజీ మహారాజు పాత్రలో పరకాయప్రవేశం చేసిన వికీ "కౌశలం" మహ-గొప్పగా వుంది. కొన్ని కొన్ని పాత్రల్లో జీవించాలంటే ఆ పాత్రకు తగ్గ వేషం (అంటే ఆహార్యం) వేసుకుంటే చాలదు. చాలా గొప్ప పరిశ్రమ కావాలి. అందులోనూ ఒక మహాయోధుడైన ఛత్రపతిలా చేసి మెప్పించాలంటే నోటితో పలికే పలుకు క్లుప్తంగా, గంభీరంగా వుండాలి. చేతల్లో నేర్పరితనం, నైపుణ్యం కనిపించాలి. వికీ కౌశల్ ఎంత కృషి చేసి వుంటాడో తెలియాలంటే సినిమా చూడాల్సిందే. 

    3. తన రాణి యేసుబాయితో మాట్లాడేటప్పుడు శంభాజీ మహారాజు కళ్ళల్లో కనిపించింది అభిమానపూర్వకమైన ప్రేమ. ఎక్కడా వెగటు పుట్టించని హుందా అయిన ప్రవర్తన. మరాఠీ చీర కట్టులో శంభాజీ మహారాజు భార్య యేసుబాయిగా నటించిన రష్మిక మందన్న సినిమా మొదటి నుంచి చివరి వరకు ఎంతో మర్యాదగా, ఒద్దికగా, వీరుడైన భర్తకు ధీర అయిన భార్యగా చాలా చక్కగా నటించింది. హిందీ కూడా చాలా బాగా మాట్లాడింది.  

    4. శంభాజీ మహారాజుకి మామ హంబీర్ రావ్‌గా నటించిన అశుతోష్ రాణా కళ్లల్లో మహారాజు మీద ఇష్టం, వాత్సల్యం  - అదే సమయంలో - మహారాజన్న గౌరవం - ఎంతో గొప్పగా అనిపించాయి. శంభాజీ మహారాజుకి, మామ అయిన హంబీర్ రావ్‌కి మధ్య జరిగిన సంభాషణలు ఎంతో ఉదాత్తంగా వున్నాయి.

    5. శంభాజీ మహారాజుకి సవతితల్లిగా, అనుక్షణం అతన్ని తప్పించి తన కొడుకు రామ రాజేని ఛత్రపతినిగా చేయాలని ఆశపడి కుట్రలు పన్నుతూ వుంటుంది రాజమాత సోయరాబాయి. ఎంత ద్వేషం వున్నా అది ప్రకటించడంలో - ఊరికే గొంతు చించుకుని అరవడమో, మొహం చిట్లించుకోవడమో చేయకుండా - సంతులితంగా నటించిన దివ్యా దత్తా subtelity భళా! అంతలా తనని ద్వేషిస్తోందని తెలిసీ ఆవిడ ఆఖరిక్షణాల్లో చూడడానికి వచ్చిన శంభాజీ మహారాజు తన పాదాలు తాకినప్పుడు స్పృహలో లేని సోయరాబాయి కంటి చివర కనిపించిన కన్నీటి బొట్టుకి భళ-భళా! 

    6. తెలుగు సినిమాల్లో కౄరుడైన విలన్ లాగానో, అస్తవ్యస్తపు హాస్యాలతో నవ్వులపాలుగానో కనిపించే ప్రదీప్ రావత్ "ఛావా" లో శంభాజీ మహారాజు పక్కన ఒక మంచి పాత్రలో కనిపించడం ప్రదీప్ రావత్ కేమో కానీ నాకు మాత్రం బహు మంచిగా అనిపించింది.  

    7. ఔరంగజేబు కూతురుగా చేసిన డయానా పెంటీ మొదటి నుంచి చివరి దాకా చిరునవ్వనేది మొహమ్మీదికి రానీకుండా నిలువెత్తు ద్వేషానికి పేష్వాజ్ వేసి నగలు పెడితే ఇలా వుంటుందేమో అనిపించేలా చేసింది. 

    8. అంతటి సినిమా - ప్రతి ఫ్రేమూ, సీనూ ఎంతో ఇష్టంగా చూశానని అనుకున్నానా - ఇప్పటికీ అందులో అలోక్‌నాథ్ చేసిన పాత్ర ఏదో గుర్తు రావట్లేదు. తప్పకుండా OTTలో వచ్చినప్పుడు చూసి పట్టుకోవాలి. 

    9. అందరి కన్నా ప్రత్యేకంగా నాకు నచ్చింది ఔరంగజేబుగా కౄరించిన అక్షయ్ ఖన్నా. నిర్వ్యాపారంగా బాలీసుల మీద పడుకుని ద్రాక్షపళ్లు తింటూ, తనకు నచ్చని వార్త చెప్పారని తనవారినే నిర్దాక్షిణ్యంగా చంపేస్తూ, క్షణక్షణం శంభాజీ మహారాజు మీద పగతో ఊగిపోతున్నట్టుంటాడు. ముందసలు నేను గుర్తు పట్టలేదు. ఎక్కడో చూసిన మొహంలా వుందనుకున్నా కానీ అది ఈ ఖన్నా దనుకోలేదు. ఇంటర్వెల్‌లో బద్రి "ఔరంగజేబుని గుర్తు పట్టావా?" అనడిగి "అక్షయ్ ఖన్నా" అని చెప్పగానే "అబ్బా! భలే!" అనుకున్నా - "అబ్బా! భలే!" అని పైకే అన్నా!

 

*** *** *** *** *** *** ***

*** *** *** *** *** *** ***

"ఛావా" సినిమాలో అర్థం కాని ఒకే ఒక విషయం: 

    సినిమాలో ఒక చోట శంభాజీ మహారాజు కోటకి ఎదురుగా వున్న ఒక కొండ మీదికి గురి పెట్టి  ఫిరంగి గుండుని పేలుస్తాడు. 

    ఆ సమయంలో అక్కడొక అమ్మాయి మేకలను కాస్తూ వుంటుంది. ఆ ఫిరంగి గుండు పేలిన శబ్దానికి భయపడుతున్న మేకలని అక్కడికి దూరంగా తోలుకుంటూ వెళ్తుంటుంది. 

    ఇంతలో కొండకి అవతల పక్క నుంచి మొఘల్ సైన్యం గుఱ్ఱాల మీద వస్తూ కనిపిస్తారు. ఆ మేకలు కాచుకునే అమ్మాయి మంటల్లో కాలిపోతూ, అరుస్తూ కనిపిస్తుంది. ఆ sequence మాత్రం నాకర్థం కాలేదు. ఫిర్ సే OTT మే దేఖ్‌నా హై! 

    రెహ్మాన్ సంగీతమూ అంతే - బావున్నట్టుంది కానీ - ఫిర్ సే OTT మే సున్‌నా హై! 

*** *** *** *** *** *** ***

*** *** *** *** *** *** ***

    లక్ష్మణ్ ఉటేకర్ - తను కన్న కలని అందంగా, తీద్దామనుకున్న కథని ఉన్నతంగా - శంభాజీ మహారాజు మీద భక్తితో - ఒక సినిమాలా తీసినట్టు కాకుండా పూజ చేసినట్టనిపించింది.  

    చిన్నప్పుడు కథల్లో  చదువుకున్న ఛత్రపతి శివాజీ మహారాజు ప్రత్యేకతైన గెరిల్లా యుద్ధాలని  - మట్టిలో మట్టిగా, నీటిలో నీరుగా, గాలిలో గాలిగా - దాక్కుని మరాఠా సైన్యం మొఘల్ సైన్యాలని చికాకు పెట్టినట్టు  ఈ సినిమాలో చాలా బాగా చూపించారు. 

    రష్మిక మందన్నని మహారాణిగా నిండుగా చూపించినా  - flashback లో పెళ్లికి ముందు కన్నె రాజకుమారిలా చూపించే వంకతో దేవతావస్త్రాల్లాంటి ఉల్లిపొర బట్టలు వేసో, పాటల్లో చెమ్మచెక్కలాడించో - చూపించకుండా వున్నందుకు లక్ష్మణ్ ఉటేకర్‌కి వందకి రెండొందల మార్కులు. 

    రష్మిక అనే కాదు సినిమాలో వున్న నాలుగైదు స్త్రీ పాత్రలను చాలా మర్యాదగా చూపించారు. 

    ఈ సినిమాలో ఒక పాటలో శంభాజీ మహారాజు, రాణి యేసుబాయి డాన్స్ చేస్తున్నట్టు - యూట్యూబ్‌లో - ఒక వీడియో వుంది కానీ అది సినిమాలో లేదు. 

    మహారాష్ట్ర ముఖ్యమంత్రి దేవేంద్ర ఫడ్ణవీస్ శంభాజీ  మహారాజు చేత డాన్స్ చేయించడమేంటని తీసెయ్యమని చెప్తే లక్ష్మణ్ ఉటేకర్ "నాకు సినిమాలో డాన్స్ కన్నా శంభాజీ మహారాజు కథ చెప్పటం ముఖ్యం" అని ఆ డాన్స్ తీసేశారట. 

    హవ్వ! ఇది ఈ రోజుల్లో జరిగింది అంటే ఎవ్వరన్నా నమ్ముతారా? 

*** *** *** *** *** *** ***

*** *** *** *** *** *** ***

    వారెవా ! 

    అది కదా రాష్ట్రం! 

    అది కదా ప్రభుత్వం! 

    అది కదా చరిత్రకి ఇవ్వాల్సిన  గౌరవం! 

    జయహో మహారాష్ట్ర! జయహో మరాఠా! జయహో మరాఠీ భాషా! 

*** *** *** *** *** *** ***

*** *** *** *** *** *** ***

    "ఛావా" - ఒక కథగా విషాదాంతమనిపించినా - ఒక గొప్ప సినిమాగా విజయోత్సవం. 

    మంచి కథని మర్యాదగా తీస్తే మంది మెచ్చే సినిమా అవుతుందని చేసి చూపించిన చేవ గలిగిన దర్శకుడు  కన్న కల - "ఛావా"! 

    చాలా రోజుల తర్వాత  - సినిమా చూశాక  - చూసీ చూడనట్టుండనీయక - చూసినదాన్ని తలుచుకుంటూ రాస్తూ - మళ్ళీ ఇంకోసారి చూద్దామా అనిపిస్తున్న సినిమా "ఛావా"! 

    నాకు నచ్చిన ""ఛావా" ఇంకొందరికన్నా నచ్చుతుందని అనుకుంటూ 

~సినీ-మా-లక్ష్మి 

*** *** *** *** *** *** ***

*** *** *** *** *** *** ***

गृहपाठः (तृतीयः)

गृहपाठः (तृतीयः)

क) पररूपविधायकानि सूत्राणि वार्तिकानि च ( भवद्भिः पठितानि सर्वाणि) 
अत्र लिखन्तु - 

पररूपसन्धिविधायकानि वार्तिकानि -

1. शकन्ध्वादिषु पररूपं वाच्यं तच्च टेः |

2. ओत्वोष्ठयोः समासे वा |

3. सारङ्गः पशुपक्षिणोः |

4. सीमान्तः केशवेशे |

5. अव्यक्तानुकरणे एकाच्-शब्दे पररूपसन्धिः न भवति |

पररॊपस्नधिविधायकानि सूत्राणि -

1. ओमाङ्गोश्च | (6.1.95)

2. अव्यक्तानुकरणस्यात इतौ | (6.1.98)

3. नाम्रेडितस्यान्त्यस्य तु वा | (6.1.99)

ख) स्ववाक्यैः उत्तरन्तु- 

1. प्रकृतिभावसन्धिः कस्मिन् सन्धौ अन्तर्भवति तथा च 'प्रकृतिभाव'-शब्दस्य 
अर्थः कः? 

प्रकृतिभावसन्धिः अच्-संधौ अन्तर्भवति |

"प्रकृतिभाव"-शब्दस्य अर्थः "प्रकृत्या एव तिष्ठति" इति |

2. पदान्ताः अ/इ/उ/ऋ/लू-वर्णाः + ऋ 

अस्यां स्थितौ कस्य सन्धेः प्रथमं प्राप्तिः ? 

अक्-वर्णात् (अ / इ / उ / ऋ /  लू ) ऋकारे परे प्रकृतिभावसन्धिः विकल्पेन भवति |

3. अष्टमाध्यायपठितेषु सन्धिसूत्रेषु युगपत्प्राप्तिस्थले कस्य प्राधान्यम् ? पूर्वसूत्रस्य उत परसूत्रस्य? 

अष्टमाध्यायपठितेषु सन्धिसूत्रेषु युगपत्प्राप्तिस्थले पूर्वसूत्रस्य प्राधान्यं भवति |

4. कस्यां स्थितौ श्चुत्वसन्धिः भवितुं न अर्हति ? 

शकारात् परस्य तवर्गस्य स्थाने चवर्गः आदेशः न भवति |

5. कीदृशीषु स्थितिषु ष्टुत्वसन्धिः भवितुं न अर्हति ? 

1. तवर्गात् षकारेण योगे ष्टुत्वं न भवति |

2. पदान्तात् नाम् - नवति - नगरीशब्दानां विहाय टवर्गात् परस्य सकार-तवर्गयोः ष्टुत्वं न भवति |

ग) अत्र सन्धिस्थलानि परिचित्य अधीतसन्धीनां नामानि सूचयन्तु- 

* कर्म सन्तानयामास सोपाध्यायर्त्विगादिभिः । 

सोपाध्यायर्त्विगादिभिः 

= सोपाध्यायर्त्विक् + आदिभिः - जश्त्वसन्धिः

= (सोपाध्याय + ऋत्विक्)+ आदिभिः - गुणसन्धिः

= (स + उपाध्याय)+ ऋत्विक् + आदिभिः - गुणसन्धिः

* पश्यञ्जनं स्वपरविग्रहवैरमैत्रं हन्तेति पारचर पीपृहि मूढमद्य । 

पश्यञ्जनं = पश्यन् + जनं - श्चुत्वसन्धिः

हन्तेति = हन्त + इति - गुणसन्धिः

* अहो इयं वधूर्धन्या या चैवं भूभुजां पतिम्। 

वधूर्धन्या = वधूः + धन्या - विसर्गसन्धिः (रेफादेशः)

चैवं = च + एवं - वृद्धिसन्धिः

* पश्चिमे द्वे अमूषां ते नामानि नृप वर्णये । 

(अत्र सन्धिः कोऽपि न दृश्यते | )

* यदा नोपलभेताङ्‌घ्रावूष्माणं  पत्युरर्चती । 

नोपलभेताङ्‌घ्रावूष्माणं 

= नोपलभेताङ्‌घ्रौ + ऊष्माणं  - यान्तवान्तादेससन्धिः

= (नोपलभेत + अन्घ्रौ) + उष्माणं - सवर्णदीर्घसन्धिः 

= (न + उपलभेत) + अङ्‌घ्रौ + उष्माणं  - गुणसन्धिः

पत्युरर्चती = पत्युः + अर्चती - विसर्गसन्धिः (रेफादेशः)