నలభీమపాకం vs మా నాన్న చేసిన సప్తధాతుచూర్ణం

 పగలూ రాత్రీ ఏ టైం లో అయినా ఆకలి అంటే చాలు హడావిడి పడిపోతూ వండి పెట్టే అమ్మలు వున్నా కూడా అదేంటో మరి - వాళ్ళెంత వండేశారో వార్చేశారో ఎవరం చూడలేదు కానీ నలుడూ, భీముడూ గో.... ప్ప వంటలు రుచిగా చేసే వాళ్లనే పేరు కొట్టేశారు. దానికి మళ్లీ పేటెంట్ తీస్కున్నట్టు నలభీమపాకమని ఒక పేరు పెట్టించేసుకున్నారు.

అది అసలు అయితే గియితే బాహుక-వలల పాకం అయివుండాలి కానీ నలభీమపాకం ఎలా అయిందో నాకిప్పటికీ మిలియన్ "పాకర్"ల ప్రశ్న (పాకర్ అంటే పాకం చేసేవాడని - పాకేవాడని కాదు).

అంటే అంతగా గుర్తింపు లేని ఆ మారు వేషాల పేర్లు పెడితే ఎవరూ పట్టించుకోరని వాళ్ళు చేసిన ఎవరూ-ఎప్పుడూ రుచి చూసిన "పాకాన" పోని ఆ ఇంతోటి కాల్పనిక  వంటలకి నలభీమ పాకం అని పేరు పెట్టడం లోనే వాళ్ళ గుర్తింపు సంక్షోభం - అదే - ఐడెంటిటీ క్రైసిస్ తెలిసిపోతోంది.

సరే - ఇంతకీ ఆ బాహుకుడూ-వలలుడూ వండిన వంటలు ఎలా వుంటాయో కనీసం ఎక్కడా  మచ్చుకి ఒక రెసిపీ కూడా నాకు తటస్థ పడలేదు కానీ మా నాన్న మాత్రం దగ్గర బోల్డన్ని రెసిపీలు వున్నాయి.

మా అమ్మ - పాపం - అడిగిందే తడవు అన్నీ చేసి పెట్టేదా - అయినా సరే అమ్మ వంటెప్పుడూ - టేకెన్ ఫర్ గ్రాంటెడ్ (taken for granted).

ఏ వసంత కోకిలలానో, వర్షం చూసిన నెమలిలానో అప్పుడప్పుడూ నాన్న చేసే వంట మాత్రం  - లాడెడ్ విత్ ప్రైడ్ (lauded with pride).

ఆ వరసలో రాసిందే ఒకప్పటి నా పోస్ట్: మా నాన్న గారు నేర్పిన "సకల పప్పు సహిత ఓట్స్ పాకం"

మళ్లీ ఈ వారానికి కబుర్లేంటా అని ఆలోచిస్తూ వుంటే మెరుపై మెరిసింది మెదడులో - మా నాన్న రాసిన ఓ వంటోత్తరం.

వెంటనే మనసులో - ముందడుగులో శోభన్ బాబు - 'నాకొక శ్రీమతి కావాలి' - అని పాడుకున్న వరసలో

నాబ్లాగ్కొక టాపికు కావాలి 

మీ అనుమతి దానికి కావాలి 

- అని పాడేసుకుని మా నాన్నకి ఫోన్ చేశాను. 

"హలో! నాన్నా!"

"ఆ! లల్లీ! చెప్పు"

"బావున్నారా నాన్నా?"

"అందరం బావున్నాము"

"ఏం చేస్తున్నారు నాన్నా ?"

"ఏం చేస్తాం? నేను టీవీ చూస్తున్నాను - మీ అమ్మ తొలేకాదశి కదా - ఏదో పూజ చేస్తోంది"

"ఏం టీవీ చూస్తున్నారు నాన్నా?"

"ఏం చూస్తాను ?! ఏదో చూస్తున్నాను " - కొంచెం విసుగు గొంతులో 

"చూశారా - మూడో ప్రశ్నకే విసుగొచ్చేస్తోంది మీకు " 

"హ హ హ హ " - నవ్వేశారు 

"సరే! ఇంతకీ ఎందుకు చేశానంటే - అప్పుడెప్పుడో నాకొక ఉత్తరం  రాశారు గుర్తుందా? విశేషాలు రాయండి నాన్నా అంటే వంటలు రాశారూ - అది - నా బ్లాగ్ లో పోస్ట్ చేసుకోనా ?"

"ఓహో ! 'కాపీ' కి రైట్-రైట్  అనాలా?" - గొంతులో హుషారు 

"అదే మరి - కాపీరైటంటేనే - ఎ రైట్ టు కాపీ - కాదా మరి?!"

"కదా మరి! మరింకెందుకు ఆలశ్యం - రాసేసుకో నీ బ్లాగులో"

 నాన్న అనుమతి ఇవ్వడమేంటి - ఆయన రాసిన ఇన్లాండ్ లెటర్ తీసుకుని - అందులో వున్నది వున్నట్టు నా పోస్ట్ లోకి చూసి-టైపు చేసేశాను. 

---------------------------------------------------------------------------------------------------------

మా నాన్న రాసిన పాక-లేఖ:


                                                       Safe                                                     RJY
                                                                                             Dt. 02.8.2011


Dear Lalli, Badari, Suhas & Kiran,

            ఇ||క్షే||.   అ||క్షే|| అని తలుస్తాను. అనాతవరం, కాకినాడ, శివకోడు, విశాఖ, హైదరాబాదు, బెంగుళూరు - అంతా క్షేమం. గత లేఖలో నా డైరీ మొత్తం వ్రాశాను. కాబట్టి ఇంక ఎక్కువ విశేషాలు లేవు. 

 ఈసారి "సప్తధాతుచూర్ణము" తయారీ విధానము మరియు వాడకము గురించి విషయాలు. 

సప్తధాతువులు - కావలసిన కొలతలు:

1) ధనియాలు 25 గ్రా (2) జీలకర్ర 25 గ్రా (3) వాము 25 గ్రా (4) మిరియాలు 10 గ్రా 
(5) మెంతులు 10 గ్రా (6) సోంప్ 15 గ్రా (7)దాల్చిన చెక్క 15 గ్రా 

పై దినుసులు నూనె లేకుండా ఒకసారి వేయించి, మిక్సీలో వేసి మెత్తగా చూర్ణము చేసి గాలి తగలని సీసాలో భద్రపరచవలెను. 

Airtight చేస్తే చాలా కాలము నిల్వ ఉంటుంది. పై వాటిలో 5 గ్రా పసుపు కలపవలెను. 

ఆ చూర్ణము ప్రతిరోజు 1 స్పూను రైస్ లో కలుపుకునే కూరలో గాని, చట్నీలో గాని, రసంలో గాని, పెరుగులో గాని కలుపుకు తినవచ్చు. దానివల్ల అరుగుదల బాగుంటుంది. Body లో Resistance Power పెరుగుతుంది. జలుబు, దగ్గు వంటివి తగ్గుతాయి. దాల్చించెక్కలో Fibre ఎక్కువగా ఉంటుంది. 

మసాలా పొడి:

1) ఏలకులు 10 గ్రా (2) లవంగాలు 15 గ్రా (3) దాల్చించెక్క 15 గ్రా. 
 పై దినుసులు ఒకసారి నూనె లేకుండా వేయించి మిక్సీ లో వేసి మెత్తటి పొడి చేసుకుని Airtight సీసాలో నిలువ చేసుకొనవచ్చు. ఇది ఉప్మాలోకి, Veg బిరియాని లోకి చాల బాగుంటుంది. 

నువ్వులపప్పు:

50 గ్రా నూనె లేకుండా వేయించి మిక్సీలో పొడి చేసి నిల్వ చేసుకుని అన్ని కూరలలో వాడవచ్చు మంచి Calcium food.

వేరుశనగపప్పు: 

50 గ్రా పైన నువ్వులపొడిలా చేసుకుని చట్నీలలో వాడుకొనవచ్చు. మంచి Protein food.

1) పెసరపప్పు (2) మినపప్పు (3) పచ్చిశనగపప్పు Each 100 గ్రా నూనె లేకుండా వేయించి మిక్సీలో వేసి - ఇష్టమైతే 6 వెల్లుల్లి రేకలు వేయించి మిక్సీలో వేసి ఇందులో కలపవచ్చు. ఇది కూడ అన్ని రసాలలోకి, సాంబారు, పెరుగులోకి కలపవచ్చు. 

ఈ సారి ఇంతే. 
     
                                                            నాన్న Uncle తాతాతూ!

 --------------------------------------------------------------------------------

దీనితో నా బ్లాగు-పోస్టు-కార్యం, పాకవిధానం-భద్ర పరచు-కార్యం - రెండూ నెరవేరాయి.

ఆ నలభీములే వచ్చి వండినా వాళ్ళ పాకం కన్నా పిల్లలకి నచ్చేలా నాన్నలే (ఎప్పుడూ కాకపోయినా - అప్పుడప్పుడు మాత్రమే వండినా) వండగలరు అని నాకైతే గట్టి నమ్మకం.

అప్పుడెప్పుడో హనుమాన్ అన్నట్లు : జయహో - పాకపితా!